Daily news
ВМРО-ДПМНЕ обвинува за чистка во институциите

„Додека Владата предводена од ВМРО-ДПМНЕ вложи огромни напори и направи низа реформи со цел да направи отчетна, одговорна и професионална администрацијата ориентирана кон потребите на граѓаните, со доаѓање на власт на новата Влада предводена од СДС, наместо да продолжи со професионализација на администрацијата, започна со спроведување на чистка во иституциите со флагрантно прекршување и непочитување на ниеден Закон. Дополнително на тоа ниту еден именуван функционер не ги исполнува минимум условите за да биде назначен, а при водењето на самата постапка користат и лажни документи“, изјави Невенка Стаменковска од ВМРО-ДПМНЕ.
Според неа, незаконските разрешувања и именувања, како и самоволието во овој период освен во администрацијата, се гледаат и во јавните претпријатија и трговските друштва каде што се особено масовни. „Прекршувањата на законот се уште поголеми и говорат и за сторени фалсификати и антидатирања, што претставуваат и кривични дела. Тоа се институции во кои директорот се избира со одлука од Управниот одбор, кој исто така треба да биде избран во законска пропишана постапка“, додава таа.
„Владата на СДС во брзање своите партиски членови да ги промовира во државни функционери, буквално гази врз законите па така имаме евидентирано случаи кога Управен одбор кој е именуван од Влада и кој се уште не е ниту верификуван во Централен регистар како орган на управување, носи одлука за именување на директор на јавното претпријатие, кој што како и Управниот одбор не чека да биде запишан во Централен регистар и истиот ден кога е именуван донесува одлука за разрешување на најголем дел подрачни раководители во институцијата. Самоволието што го манифестира Владата на СДС не ги заобиколи ниту институциите во здравството и социјалната заштита, без оглед на фактот дека станува збор за исклучително важни сфери во секојдневното живеење на граѓаните на Република Македонија. Самоволието на СДС посебно се одрази во судството, посебно во СЈО со непотизмот, барање одговорност од судии за даден личен став и уверување при донесување на судска одлука“, вели Стаменковска.
Според неа, Комисијата за правни работи на ВМРО ДПМНЕ нема да биде нем и пасивен сведок на овие незаконски разрешувања на лицата што професионално одговорно, чесно и посветено ја извршувале својата работна должност. „Активно ќе ги следиме овие постапки за што веќе во рамките на Комисијата формиравме и посебна работна група која ќе дава правна помош и заштита на лицата што се жртви на незаконското разрешување и самоволие на СДС“, изјави Невенка Стаменковска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Daily news
Бислимовски – Лорковски: Реформите во енергетиката мора да продолжат

Претседателот Марко Бислимовски, заедно со членовите и раководителите на секторите на Регулаторната комисија за енергетика, водни услуги и услуги за управување со комунален отпад (РКЕ) остварија средба со Артур Лорковски, директорот на Енергетската заедница.
Реформите во енергетиката мора да продолжат, континуитетот е клучен – фокусот да се задржи на активностите поврзани со интегрирање на пазарите за електрична енергија, нивна транспарентност и интегритет, како и неопходните реформи на пазарот со природен гас, што ќе обезбедат фер пристап за сите учесници, согласно новите европски мрежни правила – се сложија соговорниците.
Претседателот Бислимоски му се заблагодари на директорот Лорковски за позитивниот наратив за работата на РКЕ при презентацијата на Извештајот за имплементација на законодавството на Енергетската Заедница за 2024 година за државава во Собранието.
„Во очекување на новиот Закон за енергетика, РКЕ во соработка со Министерството за енергетика континуирано работи на подготовка за имплементација на новиот енергетски пакет. Интегрираниот пристап помеѓу сите чинители досега покажа дека е клучен за квалитетна и успешна регулатива, која ќе биде основа за развој на енергетските пазари . Капацитетите со кои располагаме, професионалниот тим кој се гради со години наназад и овој пат може да одговори на сите предизвици кои претстојат. “ изјава Марко Бислимоски, претседател на РКЕ
Лорковски посочи дека Енергетска Заедница ќе остане партнер во понатамошните процеси и дека стојат на располагање за поддршка во делот на креирање на подзаконските акти, откако ќе се донесе новиот закон за енергетика. Процесот на транспонирање на ЕУ правилата е клучно за да осигура работата на РКЕ за стратешките прашања поврзани со обезбедување на сигурна, стабилна и континуирана испорака на енергија.
Daily news
Измамници се претставувале како Бред Пит и навеле обожавателки да веруваат дека почнале романтична врска со него

Во Шпанија уапсени се пет лица кои изнудиле 325.000 евра од две жени претставувајќи се како познатиот американски актер Бред Пит, соопшти денеска МВР на таа земја на својата официјална веб-страница.
Во текот на истрагата се покажа дека криминалците контактирале со своите жртви преку веб-страница за обожаватели на американскиот актер, ја добиле нивната доверба и ги навеле да веруваат дека почнале романтична врска со Бред Пит.
Потоа со лажно претставување ги натерале жртвите да инвестираат во комерцијални проекти.
Daily news
Спаси жена што сакаше да скокне од мост, а со години бесплатно ги хранеше бездомниците: Џон Бон Џови ја враќа вербата во човештвото

Познатиот рокер Џон Бон Џови пред десетина дена беше тема на сите светски медиуми кога убеди непозната жена да не скокне од мост. Овој потег не е единствениот што ја докажува неговата емпатија и хуманост кон луѓето што не ги познава.
Џон Бон Џови, американскиот музичар и фронтмен на познатиот бенд „Бон Џови“, на пешачкиот мост го снимал спотот за песната The People’s House кога од другата страна на оградата забележал жена.
На снимките од надзорните камери што ги сподели локалната полиција може да се види како Џон со член на својата екипа ѝ приоѓа на потресена жена. Потоа се потпрел на оградата и почнал да разговара со неа повикувајќи ја да се врати на безбедно по што ѝ помогнал да се прекачи преку оградата.
Бон Џови потоа ја прегрна и тие стоеја така околу една минута пред заедно да одат по мостот.
Полицискиот оддел Метрополитен во Нешвил го сподели видеото на нивниот канал на „Јутјуб“ и рече дека пејачот ѝ помогнал на очајна жена.
Секоја чест за Џон Бон Џови и неговиот тим што ѝ помогнаа на една жена на пешачкиот мост „Сејгенталер“ во вторникот вечерта.
„Бон Џови успеа да ја убеди да се симне од платформата на мостот на реката Камберленд на безбедно“, објави полицијата на платформата X.
Обожавателите на рокерот не беа изненадени од неговиот потег. Имено, тој во 2011 година основал непрофитна организација, односно синџир ресторани, каде што немало ценовници, а плаќањето на сметката било опционално.