Daily news
ВМРО-ДПМНЕ ќе поднесе кривична пријава против Александар Чичаковски
На денешната прес-конференција, која се одржа во централниот штаб на ВМРО-ДПМНЕ, Драган Данев го обвини претседателот на Државната изборна комисија, Александар Чичаковски, затоа што, како што рече Данев, ДИК се ставила во служба на СДСМ, а Чичаковски бил соучесник во криминалните избори одржани минатата недела.
Дури и ОБСЕ утврди дека има несовпаѓање на 922 места на бројот на лица што се запишани дека гласале и бројот на изборените гласачки ливчиња во гласачките кутии. Ова е ноторен доказ дека е спроведено полнење кутии со однапред заокружени ливчиња за СДС со т.н. метод на бугарски воз, рече Драган Данев на денешната прес-конференција.
„ОБСЕ го забележа и го нотира овој огромен криминал, но државните институции под палката на СДС и ДИК, која е под контрола на власта, не реагираат и го премолчуваат изборниот криминал од огромни размери. ДИК се стави во служба на СДС. Криминалните избори се аминувани од ДИК, со што Чичаковски станува соучесник во тоа. ВМРО-ДПМНЕ ќе поднесе кривична пријава против Александар Чичаковски, претседател на Државната изборна комисија, за сторено кривично дело злоупотреба на службената положба и овластувањето од чл. 353, ст. 1 од КЗ. Имено, Чичаковски во текот на првиот и вториот изборен круг од локалните избори 2017 година со грубо кршење на законите со умисла ги пречекори границите на своето службено овластување и му овозможи корист на СДС“, рече Данев.
Тој нагласи дека Чичаковски во својство на претседател на ДИК не презел ништо во насока на поништување на изборите на гласачките места за кои имало реални докази за извршен бугарски воз, т.е. полнење кутии со однапред заокружени ливчиња за СДС.
„До ДИК беа доставени докази и записници што утврдуваат како гласачки ливчиња од Карпош се најдени во гласачки кутии во Охрид, а од Врапчиште во Гостивар. Ова е јасен показател за извршен бугарски воз и за систематска акција на полнење кутии од страна на власта. Овој очигледен изборен криминал беше занемарен од страна на Чичаковски и беше озаконет со недејствувањето на ДИК. Имено, ДИК во согласност со чл. 151 е должна со решение да го поништи гласањето доколку тоа не е спроведено во согласност со Изборниот законик. Но, и покрај законската обврска, Чичаковски, иако му беа познати случаите на изборен криминал кои индицираат на спроведен бугарски воз, не презема ниедно дејство за да го санкционира ваквиот криминал и да ја гарантира објективноста на изборите“, нагласи Данев на прес-конференцијата.
ДИК не го поништи гласањето ни на ИМ 2657, како што рече, за каде што постојат јасни докази дека е прекршена тајноста на гласањето. За ова биле приложени многубројни докази, но ДИК не постапи во согласност со законот и го прекрши чл. 151, ст. 1 од Изборниот законик.
„Ова е со умисла спроведено криминално изборно фалсификување. СДС ги злоупотреби институциите и ДИК, која ја држи преку Чичаковски, и изврши брутално кршење на демократијата и волјата на граѓаните. СДС и сите прекршители на законите ќе одговараат за ваквиот криминал врз Македонија и македонските граѓани“, рече Данев на крајот на прес-конференцијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.