Daily news
Генерал Ангелов: Не излегувајте на протести во одбрана на криминалци
Водачот на Достоинство и поранашен генерал Стојначе Ангелов на Фејсбук ги повика граѓаните да не излегуваат на протести „од погрешни причини, бранајќи криминалци“. Неговиот статус на Фејсбук го пренесуваме во целост.
И покрај се, знам дека ве има многу. Чесни и искрени но изманипулирани. Затоа сакам да ви порачам нешто.
Присуството на протестите не е вистинскиот начин да се брани татковината. Колку во овој момент и да ви изгледа дека сте во право – вие сепак не сте во право. Да, можеби унитарноста е загрозена но не на начинот на кој ве убедуваат. Да, можеби унитарноста треба да се брани, но не на начинот на кој ве повикуваат. Верувајте ми, знам подобро од повеќето вас.
Затоа, чесни луѓе и изманипулирани патриоти!
Ве повикувам да не излегувате на протести чија цел е одбрана на криминалци, не излегувајте на протести чија цел е одбрана на лажни патриоти. Лажни патриоти кои со години наназад ја продаваат нашата држава а богами добар дел од неа купија и тие со од нас украдените пари. Сетете се само кои и колкави отстапки кон ДУИ направи токму лажниот патриот Никола Груевски. Доколку сепак не можете да се сетете отворете Гугл, напишете “Стојанче Ангелов Достоинство албански екстремизам“ и прочитајте. И сега истиот тој Груевски ве убедува дека Македонија е загрозена токму од неговиот довчерашен, десетгодишен партнер. А додека Груевски беше во политичка љубов со Али, дотогаш Али не ја загрозуваше Македонија, дотогаш Али беше ОК.
Чесни луѓе и изманипулирани патриоти!
Не излегувајте на протести после кои, доколку работата тргне на лошо, Груевски ќе се откаже од вас. Ќе се откаже од вас правдајки се дека е против насилство а дека вие, а не тој, сте насилни, дека вие, а не тој, сте виновни за насилствата, дека вие, а не тој, сте виновни за скршените глави, дека вие а не тој, сте виновни за можната смрт на некој од пратениците, полицајците или граѓаните.
Чесни луѓе, изманипулирани патриоти!
Исто како што Груевски деновиве се откажа од првите уапсени од вас, така утре ќе се откаже и од следните уапсени од вас! Ќе ве остави на цедило, во затвор, без вашите семејства и деца, дури и без пари за адвокат. Додека вие ќе гниете во затвор, тој ќе се обидува да ја летне некаде на сигурно за да ги троши на раат милионите украдени од нас.
Вистински но изманипулирани патриоти!
Имам понуда до вас. Останете дома, не одете на протести, не влегувајте во нивниот криминален филм. Да! Македонија е загрозена но не начинот на кој тие ви кажуваат на вас. Да!
Македонија треба да се брани но не на начинот на кој тие ве лажат вас. Не` со протести, не` со спречување на формирање Влада. Македонија најсигурно ќе се одбрани ако се формира нова реформска Влада без разлика колкави ќе бидат реалните реформи. Македонија најсигурно ќе се одбрани со нејзиното влегување во НАТО бидејки дури тогаш нашите граници ќе бидат како бетон. Македонија најсигурно ќе се одбрани со влегување во Европската Унија бидејки дури тогаш сите Македонци ќе живеат во една Унија а границите помеѓу нас Македонците ќе можат да се минат без никаков пасош. Сите Македонци од Балканот во една Унија, сите Македонци од Балканот во Европската Унија.
За крај, доколку утре некој, било кој, вистински го загрози територијалниот интегритет и независност на Република Македонија, јас ќе дојдам прв и ќе застанам до вас. Рамо до рамо со вас. Доколку е потребно ќе застанам и пред вас. Ќе застанам пред вас за одбрана на татковината. Вистинска одбрана со пушки, бомби и пиштоли, а не фиктивна одбрана со свирчиња, ленти и мегафони. Вистинска одбрана со искусни воини и херои а не одбрана со режисери, глумци, оперски пејачи, криминалци и насилници.
П.С. Овој повик се однесува само на чесните и изманипулирани патриоти а не и на оние кои на протести одат поради личен интерес, вработувања, функции и пари.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.