Daily news
Георгиевски: ВМРО-ДПМНЕ цела година не ги санира штетите од поплавите
Денеска се навршува точно една година од катастрофалната поплава во која што загинаа 23 луѓе. Поплавите што ја зафатија општина Гази Баба нанесоа огромна материјална штета на населените места Стајковци, Сингелиќ и Инџиково , како на домовите, така и на земјоделското земјиште и патната инфракструктура. Институциите коишто тогаш беа раководени од кадри на ВМРО ДПМНЕ, целосно потфрлија. Неспособноста на институциите и на градоначалниците на Скопје и Гази Баба создадоа дополнителни проблеми со кои граѓаните се соочуваат и денес – изјави Борче Георгиевски, претседател на ОО СДСМ – Гази Баба.
„Наместо да ги решават проблемите на граѓаните од овие населени места, градоначалниците од ВМРО-ДПМНЕ, Коце Трајановски и Тони Трајковски се грижат единствено за тендерите и своите бизнис интереси. И по цела година од поплавите, се уште постојат подрачја што не се целосно санирани. Таков е примерот и со оваа обиколница на која што се наоѓаме. Како што можете да забележите, северната забиколоница чија што санација беше дадена на сомнителен тендер во четири очи на фирмата „Трансмет“ за договорена сума од 4 милиони евра, се уште не е готова и не е ставена во употреба.
Дополнително, во селата Виниче, Страчинци , Сингелиќ и Инџиково, се уште има преку 100 хектари земјоделска површина која граѓаните не може да ја обработуват поради нерасчистените наноси и оштетувања од природната непогода.
Очигледно е дека Трајановски и Трајковски ги заборавија жителите на улиците 24, 25, 5, 7, 8, 9 и 10 во Стајковци, од улиците 10, 20, 28 и 34 во Сингелиќ како и граѓаните од улиците во Инџиково кои до ден денес не се санирани иако беше ветувано дека истите ќе бидат асфалтирани.
Ваквиот селективен пристап на ВМРО-ДПМНЕ и нерешавањето на проблемите на граѓаните од погодените подрачја е срамен и недозволив. Недозволиво е личните и партиските интереси да бидат над интересите на граѓаните.
Затоа по промените на парламентарните избори, во октомври потребни се промени и на локално ниво. Ѓраѓаните на Скопје и Општина Гази Баба ќе стават крај на владеењето на неодговорните градоначалници. Заврши времето на сомнителни зделки и тендери во милионски суми, договорени во четири очи и многу анекс договори. Доаѓа време на нова одговорна локална власт кој ќе работи чесно и посветено и ќе обезбеди квалитетен живот за сите граѓани без разлика дали живеаат во урбаните или руралните населени места“ – изјави Георгиевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.