Daily news
Дождот спречи нов штрајк против Синдикатот во „Фени“
Над 400 вработени во кавадаречкиот металуршки комбинат „Фени индустри“ и за денеска планираа штрајк против синдикалното раководство, но го одложија поради дождот. Тие во петокот повеќе од еден час протестираа пред управната зграда на фабриката со барање да им се исплати платата и синдикатот да престане со притисоците во корист на бугарски „Енекод“.
„Баравме објаснување од синдикалното раководство за доцнењето на платата. Додека ние штрајкуваме, тие се криеја во канцелариите. Синдикатот одамна не нè претставува нас работниците, туку притиска на сите начини бугарската компанија да ја добие фабриката. Викендов се вршеше невиден притисок врз вработените. Ни се јавуваат дома, се закануваат дека ќе нè бркаат од работа ако не го поддржиме Синдикатот. Нас не нè плаши притисокот, денес не излеговме само поради дождот, а сегашното синдикално раководство повеќе не важи за нас. Тие сами си носат одлуки. Еве и денес на состанок повикаа само двесетина луѓе што ги сметаат блиски за повторно да кажуваат лаги. Им кажале дека плата нема и дека ќе се чека рочиштето в среда за нова одлука за исплата на платата. Нема одлука ниту дали ќе им ги вратат парите за огревно дрво на оние што платија преку Синдикатот. Останаа беа дрва, без пари и без плати“, вели вработен во „Фени“.
Според него, небулозни се заканите дека работниците ќе ја исклучат печката во „Фени“ ако не им се исплати платата за што минатата недела извести Синдикатот на вработените во индустријата, енергетиката и рударството. Вработените велат дека се свесни дека исклучување на печката значи крај за „Фени“, а тоа, според нив, им одговара само на малкумина.
„Зад заканите дека ќе се исклучи печката повторно стои криминално раководство и поддржувачите од Синдикатот на фабриката. За да не се открие криминалот, тие се спремни и да ја изгасат последната линија, која се одржува на минимум. Ако и неа ја изгасиме, ќе останеме без леб, каде ќе бараме работа?“, велат вработените.
Претседателот на Синдикатот на „Фени“, Ѓоре Палитов, и денеска не беше достапен за коментар.
В среда судот во Велес треба да расправа за можноста за отворање стечај за „Фени“. Ова ќе му биде втор обид на овој суд да ја почне постапката кога на 13 номеври на првото рочиште директорот на „Фени“, Рајчо Кацаров, кој во исто време е директор и на бугарски „Енекод“, пред почетокот на судењето побара изземање на судот со барање тоа да се одржи во некој скопски суд оти банките се од Скопје. Врховниот суд го отфрли барањето и повторно го врати предметот во Основниот суд во Велес.
Стечај за „Фени“ иницираа банките кредитори на комбинатот поради долг што надминува 60 милиони евра, од кои 40 милиони кон нив и 20 милиони евра кон други доверители.
Банките не ја исклучуваат можноста за нова правна опструкција од страна на раководството на „Фени“, кое на секој начин се труди да ја одолжи постапката за сечај.
Минатата недела во состојбата на „Фени“ увид направија претставници од три компании заинтересирани да ја купат фабриката. Од новиот инвеститор, како што рече вицепремиерот за економски прашања, Кочо Анѓушев, зависи и платата на вработените. Таа ќе се исплати во моментот кога новиот инвеститор ќе депонира пари во банките.
(М.И.П.)
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.