Daily news
Заев: Владата е достоинствен партнер и ваш сервис, честитки за компаниите што се меѓу топ-100
Сметајте на вашата Влада како достоинствен партнер и ваш сервис, порача претседателот на Владата на Република Македонија, Зоран Заев, при обраќањето на настанот „Топ-100 компании“ во организација на Стопанската комора на северозападна Македонија и упати честитка до компаниите што се помеѓу првите 100.
Рече дека примарната одговорност на менаџментот е да обезбеди услови за да се реализира циклусот во кој инвестицијата ќе возврати со профит.
„Тоа е еден од предусловите за создавање можности за пораст на платите како еден од двигателите на економскиот раст, што е врвен приоритет на економската политика на Владата. За да го забрзаме и да го добиеме трендот на посакуваниот економски раст, во програмата за економски раст на Владата на Републиука Македонија се предвидени повеќе мерки за зголемување на конкурентноста на приватниот сектор“, изјави Заев.
Претседателот на Владата појасни дека некои од тие мерки биле креирани во непосредна консултација и со претставниците на Стопанската комора на северозападна Македонија и со другите комори во земјата, а како дел од нив ги издвои поддршката за новокреирани работни места со плата 50 отсто повисока од минималната, понатаму поддршката за високоплатените кадри кои се стручни во професии од клучно значење за развојните перспективи на компаниите, како што се професионалците од информатичката технологија, како и поддршка за формирање развојни центри во приватниот бизнис.
„Иницијативноста и иновативноста на компаниите, со поттикот што доаѓа од стимулативните мерки на економската програма на Владата, има цел создавање фер и еднакви услови за сите за остварување на тој циклус. Како дополнителен влог на компаниите останува одговорноста кон вработените во однос на платите и во однос на стимулирачкото работно опкружување. Создавањето мотивирачки работни услови не треба да се перципира како трошок, туку како инвестирање за поголема продуктивност и за нов раст на профитот на компаниите. Во конкурентен пазарен амбиент потрошувачите треба да бидат главна грижа на менаџментот. Стоките и услугите мора да бидат со соодветен стандард и квалитет и да се испорачуваат соодветно на очекувањата на потрошувачите“, истакна Заев.
Потенцира дека како дел од нивната општествена одговорност, компаниите мора да сметаат на законско работење, на чесно плаќање на сите обврски кон државата, а владините политики мора да се фокусираат и да произлегуваат од постојаниот отворен дијалог со бизнис-заедницата за создавање услови за натамошен раст и за поуспешно премостување на предизвиците со кои компаниите се соочуваат на терен.
„Ова е особено важно ако се имаат предвид потенцијалите на првите 100 рангирани компании членки на Стопанската комора на северозападна Македонија, кои само во 2016 година имале обрт од 661 милион евра, добивка од речиси 43 милиони евра и приближно 6.000 вработени лица. Тоа се бројки за почит и ја потврдуваат општествено одговорната улога на менаџментот на овие компании во однос на благосостојбата на заедницата и на граѓаните во средините во кои егзистираат и работат, кои имаат влијание и во вкупното општествено живеење во Република Македонија“, истакна Заев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.