Daily news
Заев-Звиздиќ: Западен Балкан не е дел од проблемот, туку дел од решението
Зоран Заев, претседателот на Владата на Република Македонија, веднаш по средбата со претседавачот на Советот на министри на БИХ, Денис Звиздиќ, на заедничка прес-конференција за медиумите истакна дека Македонија и Босна и Херцеговина се пријателски земји кои соработуваат меѓу себе, без отворени политички прашања. Тие двајца на средбата констатираа дека честото дружење помеѓу двајцата државници е порака кон Европската Унија дека Западен Балкан не е дел од проблемот, туку дека е дел од решението.
„Целиот Западен Балкан, т.е. сите 6 земји аспиранти за полноправно членство во ЕУ градиме заедничка стратегија и меѓусебно се поддржуваме и си помагаме, градиме заеднички настап, со што ќе си помогнеме за побрз влез во ЕУ, но и продлабочување на соработката меѓу двете земји и на целиот регион“, рече премиерот Заев.
На заедничката прес-конференција премиерот Заев ги повика деловната заедница, граѓаните на Македонија и на БиХ, туристичките и работниците од областа на културата и образованието да градат поинтензивна и покооперативна соработка меѓу двете земји.
Заблагодарувајќи се на поканата, од свое лично име и од името на Советот на министри на Босна и Херцеговина, претседавачот на Советот на министри, Звиздиќ, рече дека му е чест и задоволство повторно да се сретне со премиерот на Македонија, што, како што рече тој, го потврдува високото ниво на соработка помеѓу Република Македонија и Република Босна и Херцеговина.
Звиздиќ во своето обраќање исто така рече дека резултатот од локалните избори по одржаните парламентарни избори го потврдуваат создавањето нова визија за стабилен економски развој и евро-атлантски интеграции, визија што има цел, како што рече тој, отворање нови работни места и задржување на младите во својата држава.
„Оваа визија наиде на плодна почва и покажува што навистина граѓаните од регионот на Западен Балкан сакаат – тоа се мир, стабилност, економски развој, поврзување и интеграција, што од секоја држава во нашиот регион ќе направат и просперитетно општество и просперитетен регион“, изјави господинот Звиздиќ.
Според него, во периодот што следува двете држави треба да се фокусираат на подобрување на квалитетот на поврзувањето помеѓу двете држави, но и помеѓу целиот Западен Балкан.
Звиздиќ во своето обраќање уште рече и дека моментната транспортна мрежа не оди во прилог на развојот на земјите од регионот и поради тоа, како што рече тој, ќе мораме ние сите заедно да настапуваме кон заинтересираните инвеститори и кон фондовите на Европската Унија, што би значело зајакнување на трговската комуникација и врските помеѓу граѓаните на двете држави.
Тој рече дека само заеднички настап на земјите од Западен Балкан пред светските пазари е нешто што може да го врати регионот во фокусот на големите инвеститори, кои би можеле да бидат интегратори на производството на земјите од регионот.
Пораките што ги испраќа во последно време господинот Заев и процесите што ги води, како што истакна во својот говор господинот Звиздиќ, се добра матица и порака за Европската Унија, а честото дружење помеѓу двајцата државници е порака кон Европската Унија дека Западен Балкан не е дел од проблемот, туку е дел од решението затоа што овие две држави во секоја смисла припаѓаат на Европската Унија.
Господинот Звиздиќ најави набргу посета на Советот на министри на Босна и Херцеговина на Владата на Република Македонија, можност во која би се потпишале новите договори за соработка, што ќе го трасира правецот на заедничкото дејствување.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.