Daily news
Зголемени контролите во шумите како мерки против шумските пожари
Министерството за земјоделство, шумарство и водостопанство информира дека активно презело мерки за заштита на шумите од појава на пожари.
„Во согласност со Законот за шумите, по барање на ЈП „Македонски шуми“ на 11.7.2017 година, министерот за земјоделство, шумарство и водостопанство, Љупчо Николовски, даде согласност за делумна забрана за движење во шумата или во одделни нејзини делови во период од 15.7.2017 до 15.8.2017 година.
Оваа одлука од страна на МЗШВ е донесена пред да почне сезоната на шумските пожари. Меѓутоа, по активирањето на поголемиот број шумски пожари на целата територија на Република Македонија, министерот Николовски, на 5.8.2017 година даде согласност за целосна забрана за движење во шумите или во одделни нејзини делови за периодот 5.8.2017 година до нејзиното отповикување.
Владата на РМ во согласност со Законот за управување со кризите донесе одлука за постоење кризна состојба заради превенција и справување со пожарите на подрачјата Македонски Брод и Чашка од 5.8.2017 година.
Министерот Николовски во согласност со донесената владина одлука ги зајакна капацитетите на Државниот инспекторат за шумарство и ловство (ДИШЛ) и му наложи, покрај редовните, да изврши и вонредни контроли врз работата на ЈП „Македонски шуми“, управувачите на заштитените подрачја и приватните сопственици на шуми.
По барање на министерот Николовски, Шумската полиција ги зајакна контролите на терен кога беа прогласени делумни и целосни забрани за движење во шума. Се евидентираа сите лица затекнати во шума и истовремено им се укажуваше за опасноста од појава на пожари.
Според Законот за шумите, субјектите што стопанисуваат со шумите и сопствениците на шуми (односно ЈП „Македонски шуми“, управувачите на заштитените подрачја и приватните сопственици), во зависност од степенот на загрозеност на шумата, должни се да преземаат посебни мерки за заштита од пожари (правење просеки во шума, подигање појаси од лисјарски видови дрвја во иглолисни шуми, поставување набљудувачници, организирање набљудувачка, известувачка, противпожарна служба и слично).
Според истиот закон, правните и физичките лица, кои преку вршење на својата дејност предизвикуваат шумски пожари, се должни да им ја надоместат штетата на субјектите што стопанисуваат со шумите, како и сопствениците на шуми.
Посебните мерки за заштита на шумите од пожари (односно правилникот за посебни мерки за заштита на шумите од пожари) ги пропишува Министерството за земјоделство, шумарство и водостопанство во согласност со Дирекцијата за заштита и спасување, во соработка со единицата на локалната самоуправа. ЈП „Македонски шуми“, националните паркови и сопствениците на приватни шуми, имаат законска обврска да го спроведуваат правилникот и имаат законска обврска за гаснење на шумските пожари во соработка со Дирекцијата за заштита и спасување.
Сите ангажирани лица од наведените претпријатија даваат сѐ од себе за брзо и ефикасно гаснење на пожарите за кои за некои од нив постои сомнеж дека се намерно подметнати. Дополнително како Министерство ја зајакнавме комуникацијата со институциите во однос на навремено информирање на граѓаните. Владата на Република Македонија во иднина ќе спроведе крупни реформи во системот за справување со кризи“, се вели во соопштението на Министерството за земјоделство, шумарство и водостопанство.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.