Daily news
Кoлкава пензија ќе добива Франсоа Оланд?
Во понеделник Франсоа Оланд се приклучува на компанијата на поранешниот француски претседател Валери Жискар Дестен, Жак Ширак и Никола Саркози и како нив ќе добива импресивна пензија, пишува весникот “Фигаро”.
Согласно законот од 1955 година поранешните претседатели на Франција добива плата, изедначена на онаа на државен советник, или 5.164 евра.
Кон оваа прва пензија може да се додаваат уште 14. 000 евра на месец, но отако ќе се пресметаат сите одбитоци на сумата, односно во неговата пензија влегуваат и различните пензии добиени од претходните позиции или вработувања.
Во случајот на Оланд тој би требало да добива вкупно нето над 15 000 евра месечно.
Сумата е збир од четири различни пензии – како поранешен претседател на Републиката (5164 евра нето), поранешен пратеник (6208 евра нето), поранешен советник во Судот на ревизори (3473 евра нето) и поранешен претседател на департаментниот совет (235 евра нето).
Покрај тоа, како сите поранешни претседатели, Франсоа Оланд ќе добие декориран и опремен службен стан, со две лица сервисен персонал, како и службен автомобил со двајца возачи. Кон ова се додаваат и двајца полицајци, кои деноноќно ќе стражарат и седум соработници за тековни работи.
Сепак во октомври 2016 година, на иницијатива на Оланд со декрет се намалени придобивките односно по петтата година од заминувањето на Елисејската палата се предвидува постепено намалување на бројот на соработниците.
Тогаш постојаните соработници се намалуваат од седум на тројца, а телохранителите од двајца на еден. Друга лоша вест за идните поранешни француски претседатели е тоа што веќе нема да можат да се возат бесплатно со државните железници.
Побараните од Оланд реформи се резултат на многуте полемики околу огромните трошоци за поранешни претседатели.
Според проценките на пратеникот социјалист Рене Дозиер годишната сума на материјалните трошоци за тројцата живи поранешни претседатели Валери Жискар Дестен (3,9 милиони евра), Жак Ширак (2,4 милиони евра) и Никола Саркози (3,3 милиони евра), достигнува вкупно околу 10 милиони евра.
А, во оваа сума не влегуваат месечната пензија на поранешниот претседател, ниту платата која во моментов ја добива Валери Жискар Дестен, како член на Уставниот суд.
Рене Дозиер смета дека реформата на Оланд треба да биде проширена и да се прекинат материјални издршки на поранешните претседатели и тоа по пет години по завршувањето на нивниот мандат. Прашањето станува уште итно земајќи предвид дека новиот претседател Емануел Макрон, ако не биде реизбран, ќе започне да добива пензија на 44-годишна возраст, забележува “Фигаро”.. Крај/мф/кс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.