Daily news
Милевски го објави некомплетниот список за ЕП во Полска
Селекторот на младата фудбалска репрезентација на Македонија, Благоја Милевски, го објави нецелосниот список на играчи кои ќе патуваат на Европското првенство во Полска. Селекторот комплетиниот список ќе го објави в недела, на 4 јуни.
Седумнаесетте фудбалери на кои смета Милевски се оние кои го изнесоа најголемиот товар во квалификацискиот циклус преку кој беше остварен најголемиот успех во историјата на македонскиот фудбал, Пласман на Европското првенство за играчи до 21 година.
„Овие 17 фудбалери дадоа голем придонес на остварувањето на историскиот резултат. Мое е да го испочитувам она што тие го дадоа за националниот тим, тие сигурно ќе бидат на ЕП. Списокот ќе биде дополнет со играчи од генерацијата 1996/1997“, рече на прес-конференцијата Милевски.
Инаку, пред стартот на подготовките за ЕП Милевски ќе одржи камп со фудбалерите од генерацијата 1996/1997, која на 5 септември во Ерменија ќе ги почне квалификациите за пласман на ЕП во Италија.
Милевски повика 26 фудбалери, кои со своите подготовки ќе почнат на 1 јуни, а шест или седум од тие играчи ќе се најдат на списокот за Полска.
Македонија во Полска ќе игра против Шпанија, Португалија и Србија, силни селекции чии играчи настапуваат во најсилните европски првенства, а голем број од нив редовно играат во Лигата на шампионите или Лига Европа.
„Квалитетите на овие селекции ни се добро познати. Играат во најсилните европски првенства, имаат искуство кое ние го немаме. Искуството на играње на такви тешки и квалитетни натпревари е нешто што не можеме да го надополниме бидејќи 70 отсто од нашите играчи настапуваат во домашното првенство. Но, сметам дека можеме да им се спротивставиме, доколку повторно ја најдеме онаа сила која нè водеше низ квалификациите. Можеби ние немаме искуство, но покажавме дека можеме да се носиме со силни репрезентации, во квалификациите зад нас ја оставивме силната Франција“, рече селекторот.
Македонија подготовките за Полска ќе ги почне на 4 јуни, кога ќе биде одигран меѓусебен натпревар помеѓу двете млади селекции. Според планот, младите репрезентативци во Скопје ќе се подготвуваат до 12 јуни, а потоа тимот ќе патува за Полска.
Првиот меч Македонија ќе го одигра на 17 јуни (20:45 часот) против Шпанија.
Списокот на Благоја Милевски:
Голмани: Алексовски, Шишковски
Одбрана: Зајков, Велковски, Муслиу, Мурати, Бејтулаи, Демири
Среден ред: Николов, Барди, Давид Бабунски Аврамовски
Радески, Ангелов, Ѓорѓев, Пивковски, Маркоски. крај/мф/нц
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.