Daily news
Националистот Каракачанов стана министер за одбрана
Новоименуваниот бугарски премиер Бојко Борисов денес ги доставил до претседателот Румен Радев имињата на новите министри и она што е најголема вест за Македонија е дека меѓу нив е и контроверзниот Красимир Каракачанов од бугарското ВМРО-БНД.
Каракачанов, познат по националистичките провокации во нашата држава, ќе биде идниот министер за безбедност и за одбрана.
Каракачанов е правник по професија и историчар, но кариерата во политиката и надвор од неа ја направи на „македонското прашање“, при што се покажа дека во време на комунистичка Бугарија работел како агент за службите на државната безбедност под прекарот Иван. Задолжен бил за следење на „македонскиот национализам“ во Бугарија, практично од времето кога бил студент во 1989 година.
Од предвремените избори во 2014 година ВМРО-БНД е во коалиција со”Патриотски фронт” на Валери Симеонов и заедно ја поддржуваа втората влада на Борисов со 19 пратеници.
Коалицијата наречена “Обединети патриоти” доби 27 пратеници на парламентарните избори годинава и стана фактор во составувањето влада. Пратеници од ГЕРБ инсистираа дека Каракачанов не е погоден за функцијата, бидејќи ќе има проблем со добивањето пристап до тајните информации од НАТО поради неговото минато, но од неговата партија реплицираа дека тој веќе имал таков пристап како пратеник.
Од НАТО наводно веќе порачале дека „и онака не споделуваат чувствителни информации со Софија, бидејќи немаат доверба во неа“, тврдат бугарските медиуми.
Во врска со случувањата во Македонија Каракачанов деновиве даде умерени изјави, веројатно бидејќи се подготвувал за функцијата.
„Секој меѓуетнички судир во Македонија носи закана за целиот регион, бидејќи таму се испреплетуваат интересите на неколку земји. Од оваа гледна точка позицијата на Бугарија треба да е јасна и категорична. Бугарија е гарант за територијалниот интегритет и независноста на Република Македонија “, рече Каракачанов пред една недела.
Некој ден порано тој порача дека очекува „пораст на конфронтациите во Макеоднија и кон неа да се насочат луѓе како оние што ги гледаме на Блискиот Исток “.
Причините за конфликтот според него се “цинична борба за власт, во која и двете страни користат секакви начини”. На крајот тој препорача Бугарија да излезе со категорична позиција за зачувување на територијалниот интегритет на Македонија, а внатрешните проблеми да се решаваат на законски начин“.
Од другите имиња на листата е и Екатерина Спасов Гечева – Захариева, нова министерка за надворешни работи. Иако непозната кај нас, таа веќе беше министер за регионален развој и урбанизам, вицепремиер за економски прашања и министер за правда во претходните бугарски влади. Таа има 41 година и во Бугарија ја препознаваат како „десната рака на Росен Плевнелиев“, поранешен претседател на Бугарија.
Таа беше единствената што учествуваше во речиси сите нестабилни владини кабинети изминатите години, вклучувајќи ја и техничката влада на Марин Рајков. Крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.