Во своето прво интервју Петар Богојески, новиот заменик-генерален секретар на ВМРО-ДПМНЕ и еден од лидерите на Иницијативата за реформи во партијата, вели дека ВМРО-ДПМНЕ во моментов е во состојба на соочување самата со себе и со своето минато.

„Како поминува времето така преовладува заклучокот дека е неопходно да се направи јасно разграничување помеѓу времето на Груевски и новото време кое нужно доаѓа. Реформите за засилување на структурата на партијата и акумулирање нова позитивна и победничка енергија не се лесен процес, а тоа беше и очекувано. Бара време, мудрост, трпение и човечки ресурси. На дел од старите кадри сè уште им е тешко да се соочат со реалноста, но тоа е неповратлив процес“, вели Богојески. Тој смета дека ако реформите се реализираат во рок од една година, Владата на СДСМ ќе биде загрозена пред крајот на овој мандат и додава дека колку реформите се подолги, толку СДСМ ќе биде покомотен.

Колкав временски период е потребен за процесот на реформи на партијата да биде завршен?

Среќен сум што иницијативата и предлозите за позитивни реформи на партијата, за нејзина демократизација, модернизација и европеизација се широко прифатени и поткрепени од големото мнозинство активисти, но веројатно процесот ќе потрае подолго од очекуваното. Со изборот на новиот претседател на ВМРО-ДПМНЕ, Мицкоски, се отвори простор и се почна постапка за донесување нов Статут на партијата. Тоа е суштинска реформа, тоа е базата за сè понатаму. Намерата е ВМРО-ДПМНЕ да го промовира „најдемократскиот“ Статут од сите политички партии во овој дел од Европа и на тој начин да станеме лидер во промоција на одржливо демократско управување на државите преку политичките партии. Се надевам дека квалитетот на донесените решенија во новиот Статут ќе биде потврден од страна на правните експерти на ЕНП.

Сведоци сме дека голем дел од иницијаторите за реформи сте веќе дел од органите на партијата. Тоа предизвика различни реакции во јавноста и во партијата?

Морам да нагласам дека донесувањето  нов Статут само на хартија не е успех, напротив истиот треба да заживее. Токму тука ја гледам нашата улога и нашето учество во сите структури на ВМРО-ДПМНЕ, а тоа е да направиме новиот статут вистински да се практикува, да направиме „новото време“ вистински да се почувствува од сите во Македонија, да ја поттикнеме модернизацијата на партијата и да го промовираме концептот „Македонија од 21 век“!

Што подразбирате под тој концепт „Македонија од 21 век“? Тоа е ново што го слушаме од ВМРО-ДПМНЕ.

Да, тоа е иднината на Македонија, која ќе дојде како понуда од модерната ВМРО-ДПМНЕ. Тоа е алтернатива на концептот на СДСМ „Едно општество за сите”. Нашата визија во фокусот го става реалниот човек, го истакнува индивидуализмот како алтернатива на застарениот етнонационализам на СДСМ, се грижи за персоналниот интегритет, морал и етика. Два столба го носат в раце концептот „Македонија од 21 век“. Тоа се реформите на политичко-правниот систем и технолошка експанзија во земјата. Првиот ќе предизвика одземање на власта од рацете на политичките партии и пренесување на истата во рацете на Републиката! Во фокусот е одлучно спроведување на вистинските коренити реформи во правосудниот систем. Не површни, како овие на СДСМ.  Вториот столб е технолошката модернизација на земјата, што всушност е иднината на сите нас. Ја сакаме Македонија како лидер во производство на енергија од обновливи извори, сонцето, водата и воздухот да бидат носители на економскиот просперитет, тоа се нашите природни ресурси. Македонија лидер во користење на најсовремените технички решенија во светот, Македонија врвен софтвер извозник, еколошки транспорт, евтина енергија, „искрен“ туризам, едноставно технолошки модерна и напредна држава. ВМРО-ДПМНЕ има капацитети и ресурси истото да го реализира.

Во овој момент ВМРО-ДПМНЕ е перцепирана како националистичка партија, која не нуди решенија на проблемите во едно мултиетничко општество како нашето. Што е новото во таа насока?

Решението е во вистината за ВМРО-ДПМНЕ, а тоа е дека ние како современа политичка партија ја негуваме Идејата на историското ВМРО и се трудиме да го продолжиме Делото. Од минатото имаме еден завет, а тоа е да се бориме за слободата и човечки правдини. Тоа е нашата идеолошка матрица. Во таа насока ќе потенцирам дека со промената на раководството на партијата се почна процес за меѓународна деизолација и обновување на нашите пријателства во светот. Целиот кредибилитет кој ние, како иницијатори за реформи, го создадовме на тоа поле го ставивме на располагање на партијата. Продолжуваме во таа насока и очекувам кредибилитетот на ВМРО-ДПМНЕ пред меѓународната заедница драстично да се подобри. Во поглед на внатрешните општествено-политички односи работиме на неколку концепти, кои ќе доведат до: релаксирање на тензиите помеѓу политичките субјекти; модерен концепт со моќен инклузивен капацитет за припадниците на сите народи во земјава и разните маргинализирани групи; реални граѓански права за реални граѓани.

Ваша оценка за Владата на СДСМ и ДУИ, како најсилни партнери во неа?

Владата на Република Македонија потфрли токму на полето во кое најмногу ветуваше, а тоасе подобрување на домашните општествено-политички услови за живот. Концептот „Едно општество за сите“ се покажа како неспроведлив, токму преку неговиот најистакнат нус-производ, Законот за јазиците. СДСМ покажа дека нема визија и искреност да дебатира и донесува решенија на транспарентен начин, а се обидува насила да наметнува квази етнонационализам. Да бев јас денес Албанец, ќе побарав итно повлекување на тој предлог-закон и ќе предложев национален консензус по тоа прашање. Се надевам дека ДУИ ќе покаже поголема зрелост од СДСМ и ќе го отвори тој процес.  Од друга страна, да не беа активностите на министерот Димитров на меѓународен план, сосема видливо ќе беше огромното уназадување на реформските процеси во разни области на домашен план. Едноставно Владата не работи на спроведување на сопствената програма, за која доби мандат, а за волја на вистината, и владината програма не е нешто за истакнување. На Македонија ѝ треба Влада која создава, а не која се занимава цела година со рушење на направеното. Најважно за ВМРО-ДПМНЕ во овој момент е да изгради кредибилна критика кон Владата и истата да биде презентирана од кредибилни носители. На тој начин ќе помогнеме јавноста да добие реална слика за состојбите во земјава, а на Владата да ја подобри својата работа.

Споменавте меѓународни активности, а целото внимание е насочено кон решавање на проблемот со името?

Најважно по ова прашање е да отвориме домашна дискусија и како резултат на истата да изградиме национален консензус не само на политичките партии туку и на народите во Македонија. Не смееме да направиме потег кој не е добро пресметан и не е добро промислен. Прво зачудува молкот на стручната јавност, веројатно станува збор за некоја автоцензура наметната од огромниот набој во општеството по ова прашање. Ако веќе немаме доволно „стручни лица’, тогаш можеме слободно да се повикаме на пријателите на Македонија од целиот свет, максимално да ја користиме меѓународната арбитража и посредување во процесот на преговори. Грција има ресурси во таа смисла и е во одредена предност пред нас.Решение мора да има, тоа мора да биде логично и правно издржано, согласно со меѓународните стандарди, а патот на Република Македонија кон НАТО и ЕУ отворен. Факт е дека многу од грчките барања се надвор од нормална логика, особено она за промена на Уставот, кој е еднаш променет токму по желба на Грција. Имам впечаток дека Грција е охрабрена да го спречи влезот на Македонија во НАТО, од еден светски центар на моќта, поради неговиот национален интерес. Загрижен сум за капацитетот на грчкото општество да се издигне над ситуацијата на шовинизмот и иредентизмот, кои ги емитуваат кон нас, и да најдеме решение. ВМРО-ДПМНЕ како сериозна политичка партија и носител на националните интереси на Република Македонија ќе изнајде сила да го отфрли концептот на патриоти и предавници, кој ни доаѓа од минатото и таму треба да остане, и ќе биде носител на изградбата на национален консензус по овој тежок предизвик за сите нас македонските државјани. Со оглед на извесниот ризик, Грција сепак да го спречи решението на проблемот што тие го имаат со името на нашата држава, и неоснованиот оптимизам што го создава нашата Влада по ова прашање, Република Македонија мора да развие резервно сценарио – специјален статус за нас во НАТО и ЕУ. Нема веќе простор за одлагање. Секако тоа треба да почне со билатерален разговор со нашиот најголем стратегиски партнер и најголем пријател во историјата на постоењето на македонскиот народ и држава, Соединетите Американски Држави. Моделите може да бидат различни, но секако чесни и фер за Република Македонија. По таков процес, Владата на Република Македонија мора да направи храбар чекор кон ефектуирање на пресудата на Меѓународниот суд и поништување на времената спогодба со Република Грција. Меѓународниот поредок мора да функционира.