Daily news
Ракометарот Стоилов се вклучи во кампањата „Јас внимавам“
Ракометарот и репрезентативец Стојанче Стоилов се приклучи кон кампањата „Јас внимавам“ чија цел е подигнување на свеста за потребата од поголема безбедност во сообраќајот. Кампањата, која компанијата ОКТА ја започна во март годинава, активностите за овој месец ги насочи на темата „Се грижам за безбедноста на пешаците во сообраќајот“. Стоилов со својот личен пример и влијание како популарен спортист во наредниот период ќе ги промовира во јавноста пораките од кампањата со цел да придонесе кон унапредување на сообраќајната култура во земјава.
– При запознавањето со кампањата ми беше укажан податок дека во 2016 година поради грешки на пешаци се случила дури 161 незгода со потешки последици и тоа треба да биде причина да се испрати апел до сите учесници во сообраќајот. Возачите да застанат на пешачки премин и да дозволат пешакот безбедно да премине, а пешаците да преминуваат на обележан премин и да не претрчуваат каде било. Со ваквото однесување, кога возрасните ќе ги почитуваат пропишаните сообраќајни правила, ќе бидат соодветен пример од кој ќе учат и децата, со што ќе се придонесе кон подобрување на севкупната сообраќајна дисциплина. Сообраќајните патишта се за сите, ни припаѓаат на сите нас, возачи, мотоциклисти, велосипедисти и пешачи и затоа сите треба да внимаваме, бидејќи подеднакво носиме одговорност за безбедноста на сите учесници во сообраќајот – изјави Стојанче Стоилов.
Националната кампања „Јас внимавам“, која секој месец ги потсетува граѓаните дека секогаш треба да се почитуваат сообраќајните правила и прописи, и овој пат ги наградуваше со вредносни ваучери за гориво од компанијата ОКТА, совесните возачи кои ги пропуштаа пешаците безбедно да преминуваат улица на обележан пешачки премин.
Кампањата, создадена од ОКТА во соработка со Министерството за внатрешни работи со својата сеопфатност на актуелната проблематика, досега доби поддршка од голем број јавни личности и граѓани. Активностите од кампањата се насочени и кон едукација на најмладите учесници во сообраќајот. Компанијата ОКТА преку донации во основните училишта на едукативни сообраќајни полигони, дистрибуција на боенки на тема основни сообраќајни правила за децата, како и изведување театарска претстава што претставува симулација на сообраќајни ситуации со кои децата најчесто се соочуваат, има за цел да даде свој придонес кон подобрување на сообраќајната едукација на најмалите, а со тоа и зголемување на нивната безбедност во сообраќајот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.