Daily news
Реакција: Винко Грубишиќ за текстот „Филмски скандал со политички импликации: Каде завршија 4,6 милиони евра“
Во врска со текстот објавен во „Макфакс“, за кој редакцијата го подготвува продолжението со нови детали, објаснување во форма на демант испрати продуцентот Винко Грубишиќ од Хрватска, кој со својот „Јадран филм“ е носител на грандизониот проект „Македонија“, серија што треба да се снима во маратонски епизоди, во четири сезони, а се однесува на повеќе епохи од македонската историја. Дописот до редакцијата е повеќе објаснување и, како што вели, извинување до македонската јавност што порано не се огласиле информации за оваа тема, но и наведува дека неговата добра намера е инструирана од локалните политички игри. Тој негира дека ги добил овие милионски суми, но, секако, потврдува дека серијата ќе чини најмалку во рамките на овој буџет одобрен од Агенцијата за филм на РМ. Целосното објаснување на Грубишиќ ви го пренесуваме подолу во текстот, а новите детали за кои „Макфакс“ интензивно истражува ќе ги објавиме наскоро во новата сторија за снимањето на серијата „Македонија“.
Почитувана редакцијо, ви се обраќам по повод објавувањето на текстот „Филмски скандал со политички импликации“ на авторката А. Василевска, во име на „Јадран филм“ ДООЕЛ Скопје. Во текстот се наведуваат некои извори кои сакаат да останат анонимни, но тие анонимни извори изнесуваат крајно неосновани шпекулации. Наспроти нив, ние сосем јасно и транспарентно, со имиња и презимиња на целиот авторски тим, како и најголемото студио на територијата на бивша Југославија – фирмата „Јадран филм“, стоиме зад овој проект. Исто така, ѝ стојам на располагање и на госпоѓата Василевска за сите информации во врска со проектот, вклучително и за одговори на она што го наведуваат „анонимните информатори“. Како долгогодишен уредник на редакција за култура знам дека на новинарите што пишуваат за нашата филмска фела, проектите и јавните пари воопшто не им е лесно, земајќи го предвид фактот дека се изложени на многу информатори кои ги наметнуваат своите интереси. Можеби ова, сега и тука, ќе звучи малку чудно, но јас како Хрват, како странец, им должам извинување и на госпоѓата Василевска и на македонската јавност во врска со „информациите“ од Хрватска. Затоа, ве молам, примете го моето извинување поради невистините на кои сте изложени од страна на личности од Хрватска, личности што се сменети од јавни функции откако им се утврдени најтешки прекршувања на законот во врска со располагањето со јавни пари, па затоа сега се обидуваат, заради одмазда, неуспешно да се фалат заканувајќи се дека ќе ни го отворат јужниот фронт. Сите народи се изложени на одредени стереотипи, па така нас, Хрватите, нè следи еден вид хрватска злоба, која можеби како нематеријално наследство треба да се заштити во УНЕСКО. Но, тоа веќе е станато здодевно и предвидливо, па затоа ја молам колешката новинарка, но и целата македонска јавност да ги занемарат зависта и злобата, од која страна и да се појават, бидејќи во нашата професија секогаш биле присутни. За нас ќе зборува успехот на серијата „Македонија“. Како што е запознаена стручната јавност во Македонија, во тек е интензивна работа на ТВ-серијалот „Македонија“. Се работи за историски, крајно изискателен проект, кој ќе се снима на голем број локации во Македонија, странство, како и во студијата на „Јадран филм“ во Загреб. Самиот проект, сценаријата и другите негови креативни делови за време на конкурсот и по него ги добија најдобрите рецензии, вклучително и од странски рецензенти, но и од нашите американски партнери. Го читаа и дадоа свои рецензии десетина професионалци од сите страни на светот. На серијалот работат голем број прекрасни соработници од Македонија, како и од повеќе странски земји. Благодарение на методите на работа и оригиналниот концепт на серијата, нејзиниот production value ќе биде неколкукратно поголем од вообичаените очекувања во македонската јавност. Како резултат на сето ова веќе е договорена интернационална дистрибуција на ТВ-серијалот „Македонија“, но и нејзина интернационална промоција на ТВ-маркетот во Кан, на што навистина се гордееме. Со други зборови, создаваме серија која ќе биде гордост за Македонија, серија што ќе биде гледана во светот. Дозволете ми, како на странец, но и како на човек кој е емотивно врзан за Македонија уште од далечната 1983 година, да споменам дека македонската историја, случките и ликовите што ги обработуваме во серијата се толку интересни и важни и за европската и за светската историја што ќе придонесат да бидат широко прифатени. Затоа, морам да забележам дека во никој случај не се работи за проект што имплицира какви било тесни политички интереси како што од изворите што сакаат да останат анонимни би можело да се заклучи ниту, пак, станува збор за проект што има каква било врска со политичките конотации за кои се пишува. Оваа проект-серија е за Македонија, ама како светски проект за светскиот пазар. А таквите проекти не сакаат никаква политичка инструментализација. Моето огромно искуство што се споменува гарантира дека никаква политичка инструментализација на серијата нема и не може да се случи. Ќе ја замолам госпоѓата Василевска за сето ова да разговараме кога ќе ја гледа серијата. На пример, еден од ликовите и наратор во првата сезона е револуционерот Павел Шатев. Друг исклучително важен лик е измислениот американски продуцент со македонски корен Никола Немов, преку чии предци, семејството Немови, се крши македонската историја, што е типичен американски пристап на раскажување. За ова доказ е восхитот од прочитаните сценарија на нашите американски партнери, како и исклучителни и докажани хрватски професионалци кои не знаат ништо за македонската историја, ама во еден здив ги исчитаа приказните. Драматуршката доктрина и начинот на кој се претставува македонската историја со emotional impact добија еднакви одлични оценки како во Македонија така и во странство. Серијалот студиозно го подготвуваме долго време. Нашите соработници во Македонија и странство ги проучија сите елементи потребни за ваква серија – од македонската историја, па сè до иконографијата, етнологијата и музиката. Слободно можам да заклучам дека сите надворешни соработници кои се вклучени во проектот, а не се оптоварени со сето она што би можело нас од овие простори да нè мачи, едноставно, се воодушевени. Проектот е поделен во четири сезони, а така е распоредено и неговото финансирање. Значи, сосема е неточно дека сме примиле пари како што се пишува. Ниту е така договорено ниту така се случило. Дозволете ми да напоменам дека механизмите за надгледување на реализацијата на проектот од страна на Агенцијата се такви што ама баш никаква злоупотреба не е возможна. Сите документи се заверени на нотар и претставуваат ригорозни и детални договорени одредби и обврски. Исто така, ве молам, износот што е планиран за првата сезона на серијата да го споредите со средствата што досега биле одобрувани за слични проекти (филмови), па сами ќе се уверите како стојат нештата или, пак, од колегите што „сакаат да останат анонимни“, а се споменуваат во текстот, да побарате мислење за висината на буџетот во однос на изискувањето на продукцијата. На пример, цела сезона од серијалот чини помалку од просечен игран филм. Исто така, можам со гордост да ја известам македонската јавност дека и „Јадран филм“ е еден од оние што вложуваат во серијалот, но и дека за одделните делови од серијата што се случуваат во странство вложуваат и други странски партнери. Како дел од промоцијата на серијата наскоро ќе го промовираме најавениот спот, па пошироката јавност, од тој мал детаљ во серијата, јасно ќе може да ја процени целта кон која тежнееме. Сосема сум сигурен дека ќе ја оправдаме довербата што на нас и на вака смислениот проект ни е укажана. Исто така, ви најавувам дека ќе им бидеме на располагање на скорешна прес-конференција во Скопје, на сите новинари и на целата јавност, на која ќе може да ги постават сите прашања што ги интересираат за ТВ-серијата „Македонија“ и „Јадран филм“ ДООЕЛ, Винко Грубишиќ.
Филмски скандал со политички импликации: Каде завршија 4,6 милиони евра?
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.