Daily news
Сведоците за „Космос“ ќе се сослушуваат на 9 февруари
По четири часа, судот и одбраната се договорија двапати да даваат воведен говор откако одбраната оспоруваше дека не сака да каже ништо без доказите да бидат доставени од СЈО до одбраната. Адвокатот Димитар Дангов пред судот во воведниот говор кажа дека обвинетите Јанакиески, Груевски и двајцата вработени во Општина Гази Баба не се виновни за делата што им се ставаат на товар.
„Кога СЈО ќе ги предаде бараните докази, ќе даде дополнување на воведниот збор“, рече Дангов. „Ние со докази ќе докажеме дека градбата е надвор од градежните прописи, со тоа е бесправна и во согласност со прописите мора да биде урната“, рече Еленко Миланов, адвокат на Груевски.
Боро Тасевски, образложувајќи го воведниот збор, кажа дека треба да се почитува пресумцијата на невиност, а исто така да се овозможи увид во доказите. „Одбраната бараше и сè уште бара доказите да бидат доставени како фотокопија, не рачно да се препишуваат бидејќи се на илјадници страници. Одбраната точно посочи кои докази до овој момент на давање воведен говор не ѝ беа достапни, а кои докази преку увид, односно рачен препис, се дозволени. Не мора да значи дека сите тие докази се приложени со листата на докази и обвинителниот акт. Посочувам дека водите постапка за случај што не е криминоген, односно нема основа за кривично дело. Евентуалната криминогеност во овој случај не потекнува од политички прашања, туку од фактот дали сите преземени дејства се за рушење објект кој бил незаконски. Односно, дали инвеститорот и изведувачот се придржувале кон Законот за градењето во согласност со ГП и ДУП. Тоа ќе го докажеме во постапката. Тие досега во низа случаи признаваа дека оделе преку законите и граделе над дозволеното. Тоа го кажуваат самите тие и со барања во Општината за измени на ДУП и веќе доставениот проект за ваквите нивни незаконски дејства да бидат легални“, рече Боро Тасевски.
Адвокатот Дончо Наков, кој ги застапува членовите на комисијата при Општина Гази Баба, иако кажа дека нема да дадат воведен збор, го промени мислењето и се произнесе. „Правата на обвинетите ми дава право во оваа постапка со доказите на СЈО да кажам дека Марика и Александра се ставени во овој случај како обвинети само како декор бидејќи ниту од временски аспект ниту од волева компонента, а ниту правно ниту фактички е можно извршувањето на делото. Затоа ќе покажам и докажам дека обвинението не дозволува да бидат обвинети. Нема правна позиција на вакво обвинение да бидат осудени, а доказите за дејствата на СЈО за време на извршувањето покажуваат дека нивните дејства не се причина да дојде до каква било штета“, рече адвокатот Дончо Наков. Рочиштето со дополнување на воведниот говор и доказната постапка со сослушување сведоци е закажано на 9 февруари.
К. Ландов
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.