Daily news
„Сеавус едукативен и развоен центар“ со Академија за програмирање во Охрид
„Сеавус едукативен и развоен центар“ (СЕДЦ) ја проширува својата мрежа на дејствување со отворање Академија за програмирање во Охрид.
Изминатата сабота претставници на центарот пред охриѓани ја промовираа Академијата за програмирање, која ќе почне од октомври оваа година.
Академијата за програмирање е една од најатрактивните програми на „Сеавус едукативен и развоен центар“, на која секоја година драстично расте бројот на запишани студенти.
Токму поради големиот интерес тимот донесе одлука програмата да ја понуди на уште една локација во земјата, а тоа е Охрид. На овој начин СЕДЦ географски ќе биде поблиску до сите млади од Охрид, Струга, Битола, Ресен и околните градови кои својата иднина ја гледаат во ИТ-индустријата.
Code&Cocktails го организиравме со цел да им дадеме шанса на сите заинтересирани од Охрид и околните места поблиску да се запознаат со работата на СЕДЦ и особено со програмата на Академијата за програмирање и тимот што е стои зад оваа академија. Задоволни сме што интересот за настанот беше голем и очекувано помина во мотивирачка, а сепак опуштена атмосфера во еден од охридските локали. На настанот говореа координаторот и дел од тренерите на Академијата – искусни професионалци во „Сеавус“, а со свои искуства придонес дадоа и поранешни студенти на СЕДЦ, сега веќе наши колеги. Освен за искуствата од академијата, се водеше интересна дискусија и за атрактивноста на професијата, како и изборот на разни технологии и нивната применливост денес. Настанот го заокруживме со т.н. Speed Challenge – односно онлајн тест натпревар, кој на една од пријавените учесници во натпреварот ѝ донесе полустипендија за Академијата за програмирање”, изјави Весна Иваноска, генерален менаџер на СЕДЦ.
Академијата за програмирање, односно развој на веб-технологии, е комбинација на последните веб-технологии и традиционалниот пристап во изучувањето на компјутерските науки. Академиите што ги нуди СЕДЦ важат за најсовремени програми од ИТ-индустријата, студентите работат со врвна технологија во одлични услови и најважно од сѐ учат од докажани професионалци во својата област. Покрај Академијата за програмирање, која е достапна за изучување во Скопје и Охрид, во главното седиште на „Сеавус едукативен и развоен центар“ во главниот град функционираат и академиите за компјутерски мрежи и дизајн.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.