Daily news
Трамп изолиран околу Иран
Светските сили застанаа зад Иран изолирајќи го претседателот Доналд Трамп во настојувањето да го прекине нуклеарниот договор со Иран. Поддршка на Трамп му дадоа само Саудиска Арабија и Израел.
Велика Британија, Франција и Германија заеднички наведоа дека договорот е „во заеднички национален безбедносен интерес“, додека ЕУ порача дека „не може една земја да прекине работен договор“.
Иранскиот претседател Хасан Рохани рече дека САД се „изолирани како никогаш досега“.„Може ли претседателот самостојно да поништи меѓународен договор?“, праша Рохани.
„Очигледно тој не знае дека овој билатерален договор не е потпишан само меѓу Иран и САД“, додаде тој.
Договорот во 2015 година беше потпишан од Иран и шест други земји – Велика Британија, САД, Русија, Франција, Германија и Кина. Тој подразбира ограничување на иранската нуклеарна програма во замена за олеснување на санкциите кон таа земја.
Во говорот што го одржа во петокот, Трамп го нарече Иран „фанатичен режим“ и наведе дека земјата ги прекршила принципите на договорот. Тој го обвини Техеран за поддршка на тероризмот и предложи нови санкции.
„Нема да продолжиме да одиме на патот што води кон повеќе насилство, поголем терор и вистинска закана од ирански нуклеарен напад“, рече Трамп.
Како што пишува Би-би-си, меѓународните набљудувачи велат дека Иран целосно дејствувал во согласност со договорот.
Откако Трамп ја објави одлуката, само Кина не се огласи, но претходно ги повика САД да го почитуваат она што е потпишано.
Руското Министерство за надворешни работи соопшти дека жали за одлуката на Трамп, но не очекува таа да го запре спроведувањето на договорот.
Конгресот бара од американскиот претседател на секои 90 дена да потврдува дека Иран се придржува до договорот. Трамп веќе два пати одби да потврди, а сега Конгресот има 60 дена да одлучи дали да го напушти договорот и да ги зајакне санкциите.Иако некои се плашеа дека Трамп ќе нареди целосно повлекување на САД, тој во суштина му го префрли прашањето на Конгресот.
Европските лидери предупредија дека какви било еднострани акции би можеле да доведат до колапс на договорот, што би ја вратило нерешената „нуклеарна игра“ на Блискиот Исток.Шефицата за надворешна политика на ЕУ, Федерика Могерини, рече дека Европа не може „да поднесе прекин на договор што функционира, особено сега“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.