Daily news
Форум за регулативата на работните односи во ИКТ секторот
Проектот на УСАИД „Партнерство за подобра бизнис-регулатива“ одржува форум на тема: „Регулатива на работни односи кои се специфични за ИКТ (информатички и комуникациски технологии) секторот“.
Целта на овој настан е да ги претстави главните предизвици во областа на работните односи кои се специфични за ИКТ секторот во Македонија.
“„КТ индустријата е еден од најбрзорастечките економски сектори во Македонија. Има огромен потенцијал за вработување и извоз и обезбедува можности за вработување со плати што се двојно повеќе од просекот во Македонија. ИКТ е исто така важен извор на вработување на високообразовани млади “, изјави Дејвид Атебери, директор на мисијата на УСАИД Македонија во својот говор.
Во своето обраќање министерката за труд и социјална политика, Мила Царовска, истакна дека соработката помеѓу коморите и министерството е исклучителна важна за зголемување на работливоста, а со тоа да се придонесе за раст и развој на бизнисите и економијата на ниво на целата држава.
„Законот за работни односи е во процес на менување и токму вакви настани и анализи ќе дадат голем придонес за реално согледување на промените кои треба да се направат во новиот закон. Законот може да биде совршено напишан, но доколку ставот на бизнис-заедницата не е вклучен во промените кои треба да следат, тогаш имплементацијата на одредени законски решенија може да биде неуспешна. За таа цел соработката помеѓу министерството, коморите и бизнис-заедницата е од клучно значење“, додаде Царовска.
„МАСИТ како глас и ресурс на ИКТ секторот во Македонија активно се занимава со сите прашања и предизвици со кои се соочуваат ИКТ компаниите во своите секојдневни бизниси. Овој настан е организиран како одговор на потребите на компаниите за понатамошно подобрување на регулирањето на работните односи со цел да го поддржи растот на нивниот бизнис “, изјави Анета Антова Пешева, заменик-претседател на Управниот одбор на МАСИТ.
Во анкета направена во септември со поголем број деловни субјекти, а спроведена од страна на сите партнери во проектот – првичните резултати укажуваат дека 76% од анкетираните фирми сметаат дека не биле консултирани во процесот на носење на законската регулатива. Како дополнување на ова, на анкета со граѓанските организации спроведена од Епицентар во август повеќе од 64% од анкетираните организации изјавија дека никогаш не биле вклучени во процесор на носење на законската регулатива. „Ова несомнено укажува на потребата за подобрување на процесот на јавно приватен дијалог, што е и една од клучните цели на проектот ‘Партнерство за подобра бизнис регулатива’”, истакна Љубомир Димовски, шеф на проект на УСАИД „Партнерство за подобра бизнис регулатива“.
Целта на конференцијата е да одговори на тековните предизвици поврзани со регулирањето на работните односи кои се специфични за ИКТ секторот, односно: презентација и анализа на проблемите и предизвиците со кои се соочуваат ИКТ компаниите во однос на Законот за работни односи, плати и надоместоци од вработување; успешни приказни и искуства од регионот.
Во наредниот период, проектот ќе работи на дефинирање и решавање на прашањата кои ќе се дискутираат на овој настан, а во исто време проектот ќе работи на конструктивни решенија предложени како резултат на механизмите за јавно-приватен дијалог поддржани преку проектот „Партнерство за подобра бизнис регулатива“. Сите проектни активности ги спроведува ЕПИ ЦЕНТАР Интернационал и трите клучни партнери: Стопанската комора на Македонија, Стопанската комора за ИКТ – МАСИТ и Стопанската комора на северо-западна Македонија. Преку активно учество во спроведувањето на овој проект, коморите ќе го градат својот капацитет за подобро да им служат на МСП.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.