Daily news
(Фото) Србин во Барселона отворил ресторан чие име навлече огромен гнев кај локалните жители
Србин кој веќе дваесет години живее во Барселона и се занимава со угостителство налути многу луѓе поради називот на неговиот најнов ресторан.
Имено, Марко Миленковиќ својот ресторан го нарекол „Ескобар“ според познатиот колумбиски наркобос Пабло Ескобар, но таа негова постапка предизвикала гнев меѓу Колумбијците во Шпанија кои преку друштвените мрежи покренале акција против него.
Угостителот од своја страна тврди дека тој немал намера никого да се навреди, а името на ресторанот било инспирирано од популарната телевизиска серија „Наркос“, која се занимава со животот на познатиот криминалец.
„Сакав да отворам ресторан инспириран од некој филм или серија. Изборот на крајот падна на извонредната серија ‘Наркос’“, изјавил Марко во шпанските медиуми.
Медиумите во веста за Миленковиќ објавиле и фотографии од декорацијата на ресторанот, во кој се наоѓаат слики од соработниците на Ескобар и познати цитати од колумбискиот „крал на дрогата“.
Ваквиот декор ги разгневил Колумбијците од шпанската заедница, особено погодени од фактот дека Марко оброците во својот ресторан ги именувал според соработниците на Ескобар, пишува шпански „Ел Тиемпо“.
Слики од ресторанот на социјалните мрежи споделила Колумбијката Марија Изабел Кајаио, со коментар:
„Јас сум бесна. Мојата земја е повредена. Пред околу еден месец во Барселона е отворен ресторан со името на Ескобар во знак на почит кон ликовите одговорни за тешките времиња во Колумбија. Кој ли се сети на ваква страшна идеја?“, прашала таа.
Во продолжение ја објавила и адресата на ресторанот и ги повикала луѓето да го бојкотираат и да остават лоши оценки и рецензии за да го изразат својот револт.
Марко, пак, тврди дека не сакал да провоцира ниту, пак, да повреди некого.
„Јас само сакав ресторан на тема Пабло Ескобар“, вели тој, додавајќи дека во ресторанот не се продава дрога туку дека само имињата на јадењата се инспирирани од ликовите од картелот Меделин.
Повикот за бојкот, сепак, наиде на голем одзив. На фејсбук-страницата на ресторанот повеќе од двесте корисници го оцениле само со една ѕвезда и оставиле многу лоши коментари.
„Овој ресторан е нешто најодвратно што сум го видел. Веројатно вам ви е интересно и смешно тоа што се случувало во мојата земја каде стотици луѓе умирале поради трговијата со дрога. Ова е потсмевање со жртвите. Од срце ви посакувам да банкротирате што побрзо“, гласи еден од многуте негативни коментари на „Фејсбук“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.