Daily news
Червар: Вардар е фаворит, ние да дадеме достоен отпор
Македонските тимови Металург и Вардар викендов официјално ќе ја започнат новата ракометна сезона. Металург ќе го пречека европскиот првак во воведното коло, во регионалната СЕХА-лига. По тој повод шефот на стручниот штаб на Металург, Лино Червар, заедно со играчите Филип Кузмановски и Халил Јагањац одржа прес-конференција.
„Оваа година Металург има поинаков состав. Ги нема Обрадовиќ, Младеновиќ, Веин, го нема Марчец. Малку ја сменивме структурата на екипата, тука е Халил Јагањац, кој е кадетски репрезентативец на Хрватска. Се обидовме да направиме рамнотежа во старосната граница. И оваа година го имаме најмладиот тим и во СЕХА-лигата и во Лигата на шампионите. Во првиот тим приклучивме неколку млади играчи: Серафимов, Танковски, Димитровски, Шилегов. Откривме дека на овие момци им се потребни натпревари така што со нив ќе комбинираме, ќе играат во СЕХА кога ќе процениме дека треба да играат, ќе играат и во Лигата на шампионите и во националното првенство. Сакаме да тренираат со првиот тим и да играат на што е можно повеќе натпревари“, рече стратегот на Металург и дополни дека противникот е апсолутен фаворит на претстојниот натпревар.
„Секако дека тие се големи фаворити, ние тоа го знаеме. Ќе се обидеме да покажеме дека имаме волја и желба да му се спротивставиме на апсолутниот фаворит. Би сакал, со целиот можен респект кон противникот нашите момци да прикажат повеќе, да се обидат да дадат достоен отпор. Малку сме послаби шутерски, сепак Обрадовиќ ни ја нудеше ширината на искуството, но сега ја имаме ширината во младоста, што е добро. Сега не треба да зборувам за квалитетот на Вардар. Тоа е екипа што добро е тренирана, добро водена на теренот. Мислам дека ќе имаме многу проблеми со нивната обрана, високи се и брзи, добро ги играат двете одбрани (6-0, 5-1), одлични се во транзиција. Но, ова се работите што сите тимови во Европа ги знаат“, рече Червар.
Хрватскиот тренер потенцира дека ќе бара од своите ракометари да бидат 100 отсто концентрирани и борбени не само на овој меч туку во целата сезона.
Фаворитската улога на Вардар му ја препушти и капитенот на тимот Кузмановски, кој ги повика ракометните фанови да дојдат во што е можно поголем број во арената „Борис Трајковски“.
„Имаме чест првиот официјален натпревар да ни биде против европскиот првак. Имавме добри подготовки, во Маврово, одигравме добар турнир во Струга, финиширавме со седумдневни подготовки во Охрид. Ова е млада екипа, повеќе работевме на тактиката. Иако СЕХА-лигата дојде некако набрзина, мислам дека сме подготвени“, рече Филип Кузмановски.
Пред ракометната јавност денес првпат се појави и Халил Јагањац, кој во Металург пристигна во преодниот рок од редовите на ПСЖ.
„Драго мие што сум во Металург. Ова е голема можност да направам позитивен скок во мојата кариера, да играм во две силни натпреварувања. Мислам дека со ваков стручњак, каков што е Лино, млад играч може само да напредува. Се надевам дека против Вардар ќе бидеме борбени“, рече Јагањац.
Македонското дерби, кое ќе се одигра во рамките на првото коло во СЕХА-лигата, на програмата е в сабота (17.45 часот) во СЦ „Борис Трајковски“.
Ненад Цветанов
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.