Daily news
Што е сексуална интелигенција и колку сте вие сексуално интелигентни?
Дали се раѓаме со овој вид на интелигенција или ја стекнуваме и како може да ја усовршиме?
Луѓето, како и сите живи битија, се раѓаат со сексуален нагон. Но, тоа нема врска со сексуалната интелигенција, бидејќи не е вродена и не може да ја наследиме, туку е фактор кој доаѓа од средината во која живееме. На прво место е начинот на кој родителите кај децата ги задоволувале основните потреби за блискост, нежност, поддршка, интима и љубов, а подоцна се развива и низ процесот на осамостојување. Важно е и влијанието од врсниците, бидејќи децата низ игра активно ја истражуваат својата сексуалност, приказна, а подоцна и преку гледање на порно содржини. Неспорно е и вниманието од медиумите, содржината и изборот на медиумските фигури. Дали со време ќе ја усовршуваме интелигенцијата зависи од нашето лично активно и свесно настојување тоа да го направиме.
Зошто е важно да работиме на себе?
Сексот е само еден од начините да се искуси и употреби сексуалната енергија, но не и единствен. Важно е да сфатиме дека е сеприсутна, не само за време на сексот туку и надвор од него – кога се одмараме, тушираме, рекреираме, размислуваме. Сексуалната интелигенција почнува да се развива во оној момент кога ќе го пренасочиме вниманието од чинот на енергија. Ова е од суштинска важност, бидејќи ако го промениме начинот на кој мислиме за својата сексуалност, може да го промениме и целокупниот сексуален живот, и тоа засекогаш!
Како се дефинира поимот сексуална интелигенција?
Познатиот сексуален терапевт, Марти Клајн, ја споредил сексуалната интелигенција со општата интелигенција, која се дефинира како способност на прилагодување во нови ситуации. Така сексуално интелигентен човек може да го препознаеме кога ќе го „фрлиме“ во непозната средина во кој не знае јазик и нема „скршен денар“, бидејќи ќе успее да креира и да ја одржи желбата дури и во крајно непријатни околности. Ќе се адаптира на телесни промени кои со тек на годините го чекаат, ќе сака да дознае многу работи и ќе биде отворен за истражување на значењето на задоволство, близина и уживање. Луѓето со висока сексуална интелигенција знаат што сакаат, умеат да комуницираат и ги препознаваат своите и потребите на партнерот, ги познаваат своите нагони и може да ги контролираат, водат сметка дека енергијата се разменува со обострано задоволство.
По што може да заклучиме дека на некој му недостига оваа интелигенција?
Сексуално неинтелигентниот човек секогаш е роб на своите ригидни стратегии на освојување, глув за туѓите потреби, без такт да ја почувствува границата. Нема емпатија за другиот и рефлексиите за своите сексуални постапки. Делува егоистично, бидејќи за време на интеракцијата константно се преокупира со тоа како изгледа неговото тело во очите на партнерот и дали самиот чин нему му одговара.
Што се случува кога ќе се привлечат два екстреми – интелигентен и неинтелигентен?
Ако тоа се случи, најверојатно сексуално интелигентната личност ќе може да ги разбере потребите на партнерот, додека разбирањето во спротивниот правец ќе изостане, што кај личноста може да доведе до фрустрација и отпор да се усогласи со партнеровите идеи и желби. Сепак, работата не мора секогаш да заврши фатално. Ако супериорниот е доволно вешт да ја негува и стимулира сексуалната интелигенција на партнерот, заедно имаат шанса да развијат однос.
Дали може да се пресмета коефициентот на сексуалната интелигенција?
Со оваа интелигенција работата е далеку покомплицирана од општата интелигенција. Мерењето повеќе е ствар на квалитет, отколку на квантитет, не е важно колку, туку како нешто се прави. Коефициентот на сексуалната интелигенција се пресметува според формулата – информација плус емоционални вештини плус телесна свест. Задоволувачки е ако личноста ги примила информациите за сексуалноста од вистинските извори, развила способност за емпатија, блискост и интимност и има развиена саморефлексност за телесни потреби.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.