Daily news
Јовиќ сака играчите од мачиња да се трансформираат во лавови
Без шефот на стручниот штаб, Лино Червар, Металург одржа прес-конференција во пресрет на натпреварот од третото коло во Лигата на шампионите против Спортинг Лисабон.
Екипата од Автокоманда сè уште е без победа во Лигата на шампионите, поради што фаворитската улога на овој натпревар им ја препуштаат на гостите од Лисабон. Инаку, тимот по непланираниот пораз од Бешикташ работеше под палката на Александар Јовиќ, но од клубот информираа дека шефот на стручниот штаб, Лино Червар, ќе го предводи тимот против Спортинг.
„Лино Червар е отсутен, тој е на седница на стручниот совет на хрватската ракометна репрезентација и се очекува во Скопје да пристигне доцна вечерва или утре претпладне и ќе биде тука за натпреварот со Спортинг“, информираат од клубот.
„Фаворитската улога ја има екипата на Спортинг, се работи за една искусна екипа која игра цврсто во одбраната и е многу опасна во транзиција. Моето видување во овој период додека работев со екипата е дека во еден колектив сите вработени имаат свои права и обврски. Од страна на клубот спрема нас, вработените, се исполнети сите обврски и мислам дека на овој натпревар треба ние да ги исполниме нашите обврски кон клубот, кон публиката и нашиот газда, кој сите овие години вложува во наша афирмација. Треба да завршиме со криење од типот имавме лош ден или имавме лошо судење. На овој натпревар треба да се трансформираме, односно од мачиња да станеме лавови. Само така ќе може да му се спротивставиме на Спортинг“, рече на прес-конференцијата првиот асистент на Червар, Александар Јовиќ.
Рецептот за победа, според Јовиќ, е максимална борбеност, односно цврста и ангажирана игра во одбраната и паметно и трпеливо во нападот, она што Металург го немаше против Бешикташ, кога ништо не функционираше во играта на тимот од Автокоманда.
„Проблем е кога имате млада екипа да го задржат континуитетот и да им се објасни каде грешат за да не ги повторуваат грешките. Имаме два порази во серија од Војводина и Бешикташ, а сметам дека сме поквалитетни од двете екипи“, дополни Јовиќ.
„Ракометот е колективна игра. Јас и соиграчите околу мене, ако имаме ‘свој ден’ и ако сè е во наша полза тогаш од еден вака млад тим може да се очекува победа. Меѓутоа, за поразот против Бешикташ сакам лично да понесам одговорност, соиграчите на теренот немаа помош од нас, голманите“, рече голманот Дарко Арсиќ.
Дуелот со Спортинг може да биде пресвртница во сезоната за Металург во Лигата на шампионите. Евентуална победа ќе ја подигне самодовербата, а со пораз шансите за висок пласман во групата ќе бидат сведени на минимум.
„Монпелје и Мотор Запорожје се фаворити за првите две позиции, ова сега е трето коло и ништо не е загубено. Нашиот план е преку овие мечеви во Лигата на шампионите и СЕХА лигата е да формираме играчи, а тоа е малку подолг процес кој бара трпение“, рече помошникот на Червар.
Натпреварот Металург-Спортинг Лисабон ќе се одигра в сабота од 17:30 часот, во арената „Борис Трајковски“.
Ненад Цветанов
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.