Daily news
Јосифовски: Претходната власт не направи ништо за гасоводот, а институциите се некоректни
Обидот за преземање на „Макпетрол“ е некорекно и непристапно, а Македонија не е правна земја земајќи ги предвид фактите дека понудата за преземање на оваа компанија не беше отфрлена, туку разгледана. Вака првиот човек на „Макпетрол“, Андрија Јосифовски, ги оценува состојбите со обидот за преземање на компанијата од страна на офшор-компании.
„Нас нè зачуди односот на двете институции надлежни за конкретниот случај бидејќи не постапи корекно како што би постапиле институции во нормална држава. Акционери од „Макпетрол“ побараа да извршат увид во документацијата, што не им беше дозволено. Предметот сè уште не е затворен. Надлежните институции доставија извештај, но не го решаваат прашањето. Ова носи големи загуби на компанијата. Конкретно, ако сакаме да продадеме имот, не можеме да го направиме тоа бидејќи треба да повикаме собрание на акционери, а тоа чини пари. Ние сме трпеливи и чекаме, а ќе бараме и одговорност. Нема сила која може да го уништи „Макпетрол“, тоа можат да го мислат само болни умови“, вели генералниот менаџер и претседател на Управниот одбор на „Макпетрол“, Андрија Јосифовски.
Во однос на изградбата на гасоводот, кој веќе со години е најавуван од страна на градоначалниците, а е актуелна тема пред локалните избори, Јосифовски вели дека претходната власт речиси не направила ништо во однос на ова прашање.
„Гасоводот е секогаш најавуван, но не е никогаш реализиран. Досегашните власти не направија ништо. Изграден е само 200 километри гасовод, кој од страна на државата беше платен 76,6 милиони долари. Единствени на пазарот што може да го реализира овој проект е компанијата АД „Гама“, а политичарите нека не се лажат дека некој друг може да го направи тоа. АД „Гама“ е команија која има сооднос 50-50 акции што ги поседува државата“, додава Јосифовски.
Компанијата „Макпетрол“ прославува 70 години постоење, а брои над 1.800 вработени. Јосифовски вели дека за продажбата наголемо „Макпетрол“ има селективен пристап, низ годините тендерите биле местени, а условите не биле соодветни. Првиот човек на компанијата вели дека „Макпетрол“ има позитивен финансиски резултати кои се зголемуваат секоја година.
Кристијан Ландов
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.