Daily news
Јохан Тарчуловски ветува интернет за пензионерите и сензорски соби за децата со пречки во развојот
Кандидатот за градоначалник од ВМРО-ДПМНЕ, Јохан Тарчуловски, ветува дека ќе ја направи Кисела Вода модерна и мултифункционална општина.
„Нудиме програма што носи просперитет и развој. Програма со која секоја педа од Кисела Вода е опфатена. Програма со која и руралниот и урбаниот дел од општината ќе блеснат во полн сјај, кој го заслужуваат. Со чесна работа, искрена мисла и чисто срце, заеднички и сложно Кисела Вода ќе ја внесеме во новата ера“, порача Тарчуловски набројувајќи ги потоа најважните проекти од програмата.
Меѓу нив се изградба на две нови детски грaдинки во населбите Расадник и Драчево, комплетно опремени со најсовремена опрема и специјализирани сензорски соби за децата со пречки во развојот.
Изградба на нова училишна спортска сала во ООУ „Рајко Жинзифов“.
Бесплатни градинки и дневен престој за децата од еднородителски семејства, со цел заштита на оваа кревка и ранлива категорија.
Изградба на спортско-рекреативниот комплекс „Славија“ на местото на сегашното фудбалско игралиште, во населеното место Пржино. Комплекс што ќе содржи фудбалски, кошаркарски, ракометни, тениски терени, како и патека за трчање.
Финансиска помош на спортските клубови за поттик на нивниот развој.
Со проектот „Спортуваме и другаруваме“ активно ќе ги вклучиме во спортот и децата со посебни потреби преку приспособени спортски содржини.
Изградба на три тениски терени, пет кошаркарски игралишта, како и фитнес-терени на отворено на неколку локации на територијата на општина Кисела Вода.
Изградба на велосипедска патека и субвенции до 3.000 денари за велосипеди.
Изградба на монтажна катна гаража во населбата Расадник, како и нов детски парк.
Изградба на повеќе мини детски паркови во урбаните делови на општината.
Деловно-технолошки инкубатор преку кој ќе им се обезбеди помош на лицата до 29 години за започнување и развој на својот бизнис и поттик и финансиска поддршка за нивните иновативни проекти.
Со воведување регистар за компании и невработени ќе го зајакнеме економскиот стандард на нашите граѓани и општината на тој начин што ќе посредуваме за вработување на жителите од Кисела Вода во компаниите што гравитираат на нашата територија.
Активирање на пензионерските клубови со воведување бесплатен интернет во нив. Ќе изградиме пензионерски катчиња во парковите со поставување шаховски ѕидани маси и пинг-понг маси.
Бесплатни екскурзии за пензионерите на Кисела Вода, како и натпревари помеѓу пензионерските клубови.
Изградба на третата фаза од најфреквентниот булевар Борис Трајковски, на потегот од Пинтија до Маркова Река во соработка со Градот Скопје.
Донесување неколку клучни детаљни урбанистички планови и финализирање на легализацијата на дивоградбите.
Реконструкција и асфалтирање на речиси сите улици, улички и локални патишта во општина Кисела Вода.
Зазеленување на општината преку хортикултурно уредување на старите и градење нови паркови.
Изградба на парк за домашни миленици.
Изградба на нови водоводни мрежи, атмосферски и фекални канализации.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.