Daily news
Водата од чешма е побезбедна од флашираната
Луѓето често пати мислат дека нешто не е во ред со водата од чешма затоа што е евтина. Но, според сигурноста, водата од чешма е далеку подобра од флашираната.
Водата во шише лесно може да се контаминира. Постојат повеќе шанси да пронајдете штетни материи во флашираната вода отколку во онаа од чешма, вели професорот Пол Л. Јангер од Универзитетот во Глазгов и автор на книгата „Water: All That Matters”.
Американската Environmental Working Group (EWG) пред неколку години спроведе истражување во кое беше откриено дека состојките во флашираната вода драстично не се разликуваат од оние во обичната вода од чешма. Како што тогаш пишуваше examiner.com, истите валкани и нездрави супстанци кои може да се најдат во водата од чешма може да се најдат и во водата од шише.
Своевремено EWG истражи 200 популарни брендови на вода од САД и откри 38 загадувачи во 10 најпопуларни брендови на флаширана вода. Во САД биле откриени дури и канцерогени супстанци во водата во шише, а најлоши на тестовите се покажале флашираните води на големите трговски синџири.
Прашањето е зошто и покрај тоа се повеќе луѓе купуваат флаширана вода?
Иронично, како што пишува examiner.com водата од славина е регулирана, а флашираната вода не е. Според пишувањето на Washington Reuters, Американците се спремни да платат долар повеќе за флаширана вода која е поскапа од онаа во чешма. Еден од најдобрите начини да обезбедите чиста вода секако е вградување на филтер на славините во куќата.
Слична теза за квалитетот на флашираната вода објави и Business insider, минатата година. Флашираната вода е значително поскапа од онаа од чешма, а освен тоа има поголема веројатност да биде контаминирана или да стане извор на зараза.
Водата од чешма мора секојдневно да се проверува и за тоа постојат инспекции, според пишувањето на Business insider, а водата во шишиња се контролира еднаш месечно. Водата од чешма содржи хлор што спречува ширење на штетните супстанци и бактериски инфекции. Но, еднаш наполнетото и затворено шише со вода може во магацините да стои со месеци пред да се продаде, а во себе не содржи хлор.
Откако шишето е отворено, не е можно да остане стерилно и затоа се препорачува да се испие водата веднаш или најдоцна за еден ден.
Компанијата Mintel која се занимава со истражување на пазарот во Велика Британија, утврдила дека речиси една четвртина од луѓето кои дома пијат флаширана вода го прават тоа затоа што ја сметаат за подобра од онаа во чешма.
Заклучокот е дека флашираната вода не е нужно чиста, а освен тоа што може да биде полоша од онаа од чешма, може да биде и иста како неа. Според banthebottle.net, американската агенција за јавно здравје, Food and Drug Administration (FDA) дозволува одреден број пестициди во водата во шише, а луѓето ја купуваат затоа што веруваат дека е сосема чиста.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.