Daily news
Електронските цигари имаат 10 пати повеќе канцерогени материи од тутунот
Електронските цигари содржат десет пати повеќе канцерогени материи од обичниот тутун, утврдиле јапонските научници.
Електронските цигари содржат десет пати повеќе канцерогени материи од обичниот тутун, утврдиле јапонските научници.
Ова откритие претставува последниот во низата удари на производот кој некогаш беше фален како помалку штетен од пушењето.
Електронските уреди, се’ популарни во светот, особено меѓу младите, дејствуваат така што се загрева ароматизирана течност која содржи никотин, а пареата што се создава се вдишува како кај обичните цигари, но без создавање чад.
Научниците кои ги ангажирало јапонското министерство за здравство откриле канцерогени состојки, како што се формалдехидите и ацеталдехидите во пареата којашто ја создаваат неколку видови течности за електронските цигари, соопшти министерството во Токио.
Формалдехидот, кој е присутен во течностите за балсамирање и во градежните материјали, го имало во многу поголеми концентрации од оние во чадот од обичните цигари, велат јапонските научници.
„Во еден вид електронски цигари, научниот тим откри повеќе од десет пати поголемо ниво на канцерогени супстанции отколку во обичните цигари. Особено големи количествата од тие штетни материи се произведуваат кога ќе се прегрее жицата којашто ја претвора течноста во пареа“, вели за AFP научникот Наоки Кунугита, додавајќи дека количеството на формалдехидите варирало во текот на анализите.
Кунугита и неговиот тим од јапонскиот Национален институт за јавно здравје порачуваат дека електронските цигари не се толку безопасни, како што многу луѓе веруваат.
Во август годинава Светската здравствена организација (СЗО – WHO) ги повика владите во светот да ја забранат продажбата на електронските цигари на малолетни лица, предупредувајќи дека претставуваат сериозна закана за здравјето на фетусот и на младите.
Според американските здравствени власти, пак, бројот на децата кои пробале електронски цигари двојно се зголемил во периодот од 2011 до 2013 година, а изминатата година повеќе од 250 илјади млади Американци, кои никогаш не пушеле, ги пробале електронските цигари.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.