Економија
Вработените во „Фени“ пак на улица, преку протести бараат поголема плата и исплата на К 15 од 2022 година

Вработени во „Еуроникел“, поранешна „Фени“, повторно протестираат како пред шест години кога беше прогласен стечај, па потоа фабриката ја презеде швајцарскиот фонд ГСОЛ преку македонскиот претставник „Еуроникел индустри“. Бараат поголеми плати, исплата на заостанатата рата од К 15 за 2022 година, покачување на К 15 за оваа година и негова еднократна исплата.
Денешниот протест го нарекоа предупредувачки и најавија дека ќе протестираат пред влезот на фабриката секој ден во периодот од 13 до 14 часот до исполнување на барањата.
Одлуката за протест Синдикатот едногласно ја донел на 1 јуни.
„Од страна на членовите на собранието беше изразено огромно незадоволство од дадениот одговор по однос на барањата, што резултира со носење едногласна одлука за почнување протести без запирање на производствениот процес, со место на одржување пред капијата за влез во фабриката, и тоа секој работен ден во траење од еден час, помеѓу 13 и 14 часот“, стои во известувањето од Синдикатот.
Од „Еуроникел“ немаше официјална реакција по денешниот прв предупредувачки протест.
Вработените пред еден месец алармираа за состојбите во фабриката. Укажаа дека стравуваат оти ќе биде затворена бидејќи не се носат руда и репроматеријали, нема производство и се шират муабети за нов стечај по што следуваа состаноци со дел од управата, на кои беа пренесени истите барања како и од денешниот протест.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Скенирањето сметки на апликацијата „МојДДВ“ е со прекини, УЈП извести за технички проблеми

Управата за јавни приходи извести дека мобилната апликација „МојДДВ“ во моментов работи со прекини. Тимот на УЈП интензивно работи на отстранување на проблемот, со цел апликацијата да биде целосно функционална.
„Ги информираме корисниците дека, согласно член 6 од Законот за враќање на дел од износот на ДДВ на физичките лица, фискалните сметки можат да се скенираат во рок од 10 дена од датумот на нивното издавање. Тоа значи дека сите сметки, кои се во рамки на овој рок, ќе можат да бидат скенирани веднаш штом апликацијата повторно биде ставена во функција. Ги молиме сите корисници за трпеливост и разбирање. Тимот на Управата за јавни приходи е целосно ангажиран и работи на надминување на техничките пречки“, соопшти Управата за јавни приходи.
Од таму не откриваат за какви технички проблеми се работи, ниту пак кога очекуваат да бидат надминати.
Економија
Мицкоски најави нова инвестиција во Штип

Претседателот на Владата на Република Северна Македонија, Христијан Мицкоски денес одговарајќи на новинарско прашање во однос на најавата на директорот на Технолошко-индустриските развојни зони за 4 нови странски инвестиции, изјави:
„Во текот на вчерашниот ден, во разговор со директорот, имаме добра вест, нова инвестиција, потврдена во индустриската зона во Штип. Фабрика којашто ќе вработи до 150 луѓе. Фабрика којашто ќе инвестира некаде околу 35 милиони евра. Којашто во својот пик за три години од денес ќе извезува 300 милиони евра коишто ќе влезат во Бруто домашниот производ и ќе произведува батерии и тоа е добро. И тоа е добро, а за сите овие други, да имаме и потврди и полека ќе ги објавуваме. Ова е веќе договорено со инвеститорот и заради тоа го кажав, инаку фабриката е од земја од Европска Унија, да немаме дилема.“
Економија
Дизелот поевтинува за 2,5 денари

Од ноќеска на полноќ дизелот ќе поевтини за 2,5 денари, додека цените на бензините остануваат исти, соопшти Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ).
Од 28.6.2025 година од 00:01 часот максималните цени на нафтените деривати ќе изнесуваат:
– Моторен бензин – ЕУРОСУПЕР БС – 95 – 77,50 (денари/литар)
– Моторен бензин – ЕУРОСУПЕР БС – 98 – 79,50 (денари/литар)
– Дизел гориво – ЕУРОДИЗЕЛ БС (Д-Е V) – 70,50 (денари/литар)
– Масло за горење – Екстра лесно 1 (ЕЛ-1) – 72,00 (денари/литар)
– Мазут М-1 НС – 40,188 (денари/килограм)
Малопродажната цена на ЕУРОДИЗЕЛ (Д-Е V) се намалува за 2,50 ден/лит.
Малопродажната цена на Мазутот М-1 НС, се намалува за 1,499 ден/кг.
Малопродажните цени на бензините ЕУРОСУПЕР БС-95 и ЕУРОСУПЕР БС-98 и на Екстра лесното масло за домаќинство на (ЕЛ-1), не се менуваат.