Економија
СДСМ: Нема кратење на средства за земјоделците

Антинародното и антизападно раководство на ВМРО-ДПМНЕ, партијата што со години ги уценуваше и малтретираше земјоделците и го погазуваше нивниот труд, денес преку ширење лажни вести, продолжува да работи против интересите на земјоделците, обвини СДСМ.
„Категорично тврдиме дека не е точно дека се кратат буџетски средства како што денеска тврди врвот на ВМРО-ДПМНЕ. Напротив во делот на водостопанството, со ребалансот на Буџетот се обезбедуваат дополнителни средства во МЗШВ за капиталниот Проект за наводнување на јужната долина на Вардар фаза 2 во износ од над 23 милиони денари. Со ова обезбедување на средства се исполнуваат сите услови за старт на градежните активности за овој капитален проект кој ќе го реши проблемот со наводнувањето за регионот на општина Валандово во вкупен износ од над 2000 хетари.
Капиталните инвестиции во системите за наводнување се врвен приоритет на оваа Влада, па во моментот како никогаш до сега во тек се градежни работи на повеќе локации како оние на Браната Конско, системот Равен Речица и други.
Дополнително, обезбедени се нови 20 милиони евра за капитални проекти од областа на водоснабдувањето кои ќе отпочнат со реализација веќе од следната година.
Истовремено, обезбедени се дополнителни средства за шумската полиција од пет милиони денари, нови два милиони денари се издвојуваат за секторот за евроинтеграција и меѓународна помош, како и дополнителни 2 милиони денари повеќе за фитосанитарната лабораторија.
Единственото кратење на средства на расходната страна на буџетот е кратењето на средства предвидени да се реализират од заеми, односно, скратени се 310 милиони денари од заем кои биле предвидени да се потрошат за хидросистемот Злетовица и околу 40 милиони од 200 те предвидени во проектот Наводнување на Јужната Долина на Вардар.
Тоа се заемски средства што се ставаат на располагање во моментот кога се отпочнува со реализација на конкретните проекти. Значи нема кратење на буџетски средства.
Во однос на буџетот на Платежната агенција, направено е пренамена на средства од мерка 2а – финансиска поддршна на рурален развој во мерка финансиска поддршка во земјоделството во износ од 200 милиони денари. Значи нема кратење на средства во руралната програма туку пренамена од една мерка во друга.
Ракодството на ВМРО-ДПМНЕ создава штети, прави манипулации и грубо лаже! Владата на чело со Премиерот Зоран Заев го има земјоделството за врвен приоритет.
Доказ за неспособноста и незнаењето е и работата на Цветан Трипуноски, кој остави распадната инспекциска служба по неговото раководење со Државниот инспекторат за земјоделство, а денес како државен советник во Министерството за земјоделство, шумарство и водостопанство кој наместо да испорача резултати излегува на прес конференции и грубо манипулира и лаже!
Дополнително, во интерес на земјоделците, со цел да се обезбеди рентабилно производство пониски трошоци и сигурен пласман, Владата предводена од СДСМ донесе низа интеревентни мерки во интерес на земјоделците. Се како нова субвенција од 1 денари за предадено грозје од сортите смедеревка и вранец, нова субвенција од 2 денари за килограм, за правните лица откупувачи на сливи регистрирани за преработка на земјоделски производи и правни лица регистрирани за вршење на трговија со земјоделски мерки. Оваа година, се зголеми субвенцијата за предадени домати од 3 на 7 денари за килограм, и се постигна договор вишокот домати да го откупат преработувачките капацитети, а се со цел стабилизирање на откупот.Се донесоа сет мерки за зголемување на конкурентноста и одржливоста на домашното производство на пченица и други полјоделски култури.
Оваа година се постина највисока просечна откупна цена за тутунот од 217,6 денари за килограм. Лани и оваа година се постигна највисока просечна откупна цена на грозјето. Конкретно просечната откупна цена на вранецот оваа одина достигна 13,55 денари за килограм, а на смедеревката 12,25 денари за килограм. Со цел намалување на производствените трошоци, до крајот на оваа година во функција ќе биде ставена мерката за зелена евтина нафта“ соопшти СДСМ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Нови правила за одобрување возила од 1 септември

Министерството за енергетика, рударство и минерални суровини (МЕРМС) одржа работен состанок со над 40 овластени застапници и импортери на возила во Македонија.
На средбата присуствуваа министерката Сања Божиновска, директорот на Државниот пазарен инспекторат Влатко Стојкоски, претставници на Биро за метрологија и Царината како и професорот Дарко Данев кој ги презентираше измените во постапките за одобрување на возила, кои ќе стапат на сила од 1 септември 2025 година.
Овие измени се однесуваат на постапките за: одобрување на тип на возило, единечно одобрување на возило, идентификација и оцена на техничката состојба и издавање на потврди за исполнетост на техничките барања за возилата.
Клучната промена е тоа што, по 17 години од донесувањето на Законот за возила, истиот конечно ќе почне да се применува согласно европските стандарди.
„Го зајакнуваме системот на доверба меѓу институциите и импортерите, со јасни правила и навремена услуга за граѓаните. Ова е значаен чекор за приближување кон европските стандарди и подобрување на квалитетот на услугата која ја добиваат нашите граѓани“, изјави министерката Божиновска.
Клучни промени во постапките за одобрување на возила:
· Одобрување на тип на возило за сите негови варијанти и изведби според WVTA документот, освен ако импортерот не побара поинаку.
· Единечно одобрување ќе се врши исклучиво за возила за кои не е одобрен типот во РСМ и немаат одобрение за тип во ЕУ преку Биро за метрологија. Возила со претходно одобрен тип во ЕУ или во РСМ немаат потреба од посебна постапка за единечно одобрување и директно одат во постапка за идентификација и оцена на техничката состојба.
· Импортерите имаат обврска да издаваат потврди за исполнетост на техничките барања за сите возила за кои постоиевропско одобрение на тип (WVTA) или национално одобрување на тип. За останатите возила за кои немаат возила не постои одобрение на тип во РСМ или не постои одобрение на тип во ЕУ, импортерите немаат обврска да ги издаваат потврдите, ваквите возила ќе обезбедуваат потврди од независни институции прифатени од Бирото за метрологија.
· Грубата пресметка вели дека 1,3 милиони евра годишно досега оделе за TÜV потврди кои не требало да се бараат и тоа најголемиот дел од средствата оделе кај странски компании на кои им се плаќало – процесот сега ќе се регулира преку овластените застапници, домашни македонски компании.
· Роковите за одобрување на тип во Бирото за метрологија ќе бидат скратени двојно, за побрза и поефикасна постапка.
· Цените на услугите од Биро за метрологија ќе се регулираат со нов правилник.
· Потврдите за исполнетост на техничките карактеристики кај застапниците ќе чинат 40-50 евра.
Министерството нагласува дека соработката со застапниците е клучна за успешна примена на Законот и изграден функционален систем на доверба.
„Градиме партнерски однос со импортерите како клучен елемент во процесот на усогласување со европските стандарди. Граѓаните треба да се чувствуваат заштитени и поддржани при секоја постапка за одобрување на возила“, додаде министерката Божиновска.
Економија
Лагард предупредува: Економијата на ЕУ зависи од странските работници

Претседателката на Европската централна банка (ЕЦБ), Кристин Лагард, изјави дека приливот на странски работници во изминатите години значително ја поттикнал економијата на еврозоната, помагајќи да се надомести намаленото работно време и падот на реалните плати.
Говорејќи на годишниот симпозиум на Федералните резерви на САД, што се одржува во Џексон Хол, сојузната држава Вајоминг, Лагард нагласи дека миграцијата кон Европската Унија довела до рекорден број жители и покрај негативниот природен прираст.
„Странските работници дадоа значителен придонес за европската економија. Тие овозможија да се компензираат структурните предизвици, како што се пократкото работно време и пониските плати во одредени сектори“, изјави Лагард.
Таа додаде дека иако растот на бројот на работници ја поддржа економската стабилност, одредени влади на земјите-членки воведуваат ограничувања за нови мигранти, поради зголемено незадоволство кај дел од локалното население.
Според Лагард, оваа динамика ќе остане еден од клучните фактори во обликувањето на идните економски и социјални политики во Унијата.
Економија
Македонија е големо градилиште, над 1.200 проекти во општините, велат Перински и Николоски

Во моментов целата Македонија е едно големо градилиште, а само во општините се реализираат повеќе од 1.200 активни проекти поддржани од Владата и Министерството за транспорт, истакна Александар Николоски, потпретседател на ВМРО-ДПМНЕ и министер за транспорт, на Саем-Отчетот на градоначалниците на ВМРО-ДПМНЕ.
„Тоа се само проекти преку Министерството за транспорт, а да не зборуваме за големите инфраструктурни проекти како автопатите Охрид-Кичево, Кичево-Букојчани, Букојчани-Гостивар, Гостивар-Тетово, Прилеп-Битола, како и експресните патишта Прилеп-Градско и Куманово-Крива Паланка. Сега започнатите проекти се завршуваат, а граѓаните гледаат резултати“, рече Николоски.
Министерот подвлече дека ова ја враќа самодовербата кај граѓаните и покажува дека Македонија е способна да води големи проекти.
„Не е само патната инфраструктура, туку и железничките линии, аеродромите, авио линиите и обновливите извори за енергија. Во помалку од година дена завршивме еден проект со вредност од половина милијарда евра“, додаде тој.
Министерот за локална самоуправа, Златко Перински, истакна дека Владата финансирала околу 1.200 проекти во сите општини.
„На првиот повик беа пријавени 288 проекти, од кои 137 се завршени. На вториот повик беа поднесени 887 апликации, а прифатени беа 828 проекти. Кумулативно, тоа се околу 1.200 проекти кои се реализираат со помош на централната власт“, рече Перински.
Министерот додаде дека општините се соочувале со големи предизвици и немале поддршка од претходната власт.
„Ние им помогнавме да ги детектираат проблемите, да обезбедат одржливост и да ги реализираат поголемите проекти. Секој градоначалник се бори да направи што е можно повеќе, а по изборите се надеваме дека мотивацијата ќе биде уште поголема“, рече Перински.