Економија
Министерот Славески на годишното собрание на ЕБОР во Лондон

Делегација на Министерството за финансии, предводена од министерот Трајко Славески, во петок и сабота учествува на Годишното собрание на Европската банка за обнова и развој, што оваа година се одржува во Лондон
Претпладнево македонскиот министер за финансии, Трајко Славески во интервју за новинската мрежа Bloomberg ги презентирал економските случувања во Република Македонија, како и мерките што ги презема Владата за намалување на негативните ефекти од светската економска криза, информираат од неговиот кабинет Исто така, министерот Славески остварил средба и со претставници инвестициската банка HSBC, банка која е највисоко рангирана финансиска институција во светот во секторот за емисија на обврзници од страна на државите на меѓународниот пазар во изминатите години, како и оваа 2009 година. HSBC, инаку, од страна на Министерството за финансии како најповолен понудувач беше избрана за подготовка на процесот за издавање на новата македонска еврообврзница. За време на средбата било разговарано за водењето на целокупниот процес на издавање на еврообврзницата, како и за најповолниот момент за емисија, имајќи ги во предвид пазарните услови. Славески во Лондон се сретнал и со првите луѓе на инвестициската куќа Fortis, која беше една од купувачите на еврообврзницата што Република Македонија ја издаде во 2005 г., при што беа презентирани перформансите на државата, како и опцијата за издавање нова еврообврзница. Претпладнето министерот Трајко Славески остварил средба и со високи претставници од кредитната рејтинг агенција Fitch, на која разговарал за кредитниот рејтинг на Република Македонија, како и за генералните трендови кои влијаат врз целокупното деловно опкружување во регионот на Југоисточна Европа и перцепцијата кај инвеститорите. Попладнево, пак, министерот Славески ќе учествува на заседанието на Бордот на гувернери на ЕБОР, при што тема на дискусија ќе биде „Борба со кризата, промовирање на обновата и продлабочување на транзицијата”. А за утре е предвидено тој да има обраќање пред Бордот на гувернери на ЕБОР, а ќе оствари средба и со инвестициската банка Credit Suisse. Исто така, утре Славески ќе се сретне и со претседателот на ЕБОР, Томас Миров, со гувернерот на Банката при Советот на Европа, Рафаел Аломар, како и со потпретседателот на Европската инвестициска банка, Дарио Сканапиецо.Во рамки на Годишното собрание на ЕБОР, министерот Славески и директорот на Агенцијата за привлекување странски инвеститори Инвест Македонија, Виктор Мизо, ќе одржат презентација на Република Македонија пред повеќе заинтересирани инвеститори и меѓународни финансиски институции.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Дурмиши за новата потрошувачка кошничка: ќе служи за градење политики поврзани со минималната плата и ќе се усогласи со европските стандарди

На четвртата седница на Економско-социјалниот совет, министерот за економија и труд, Бесар Дурмиши ја истакна важноста од повторното активирање на трипартитниот дијалог меѓу Владата, синдикатите и работодавачите, кој претставува суштински механизам за социјална кохезија и економски напредок. Тој ги поздрави новите претставници на Конфедерацијата на слободни синдикати, со што, како што рече, се враќа легитимитетот на Советот.
Министерот информираше дека е успешно завршена постапката за утврдување на репрезентативноста на синдикатите – прашање што подолг период го блокираше нормалното функционирање на ЕСС. Воедно, се предложени измени на Законот за работни односи, со кои прагот за репрезентативност се намалува од 10 на 5 проценти, со цел да се поттикне поинклузивен и плуралистички социјален дијалог.
Дурмиши го претстави и процесот за изработка на нова, официјална методологија за пресметка на потрошувачката кошничка, заснована на проверливи и релевантни податоци од Анкетата за потрошувачка на домаќинства, спроведена од Државниот завод за статистика. Новата кошничка ќе служи како основа за градење политики поврзани со минималната плата и социјалните трансфери и ќе биде усогласена со европските стандарди.
Економија
Трипуновски: Откупните цени за пиперката се зголемени – прва класа ќе се откупува по 45 денари за килограм

Откупните цени за пиперката се зголемени – прва класа ќе се откупува по 45 денари за килограм, изјави министерот за земјоделство, шумарство и водостопанство, Цветан Трипуновски.
„На состанокот се договорија откупните цени по класи за пиперката. За прва класа откупната цена на пиперката изнесува 45 денари, за прва-втора класа е 35 денари, за втора класа откупната цена изнесува 20 денари, а за трета класа откупната цена ќе биде 15 денари”, појасни министерот.
Тој посочи дека тоа се почетните цени со кои што ќе започне откупот на пиперката за реколтата 2025 година.
„Пиперката во Македонија се одгледува во два региони – струмичкиот и прилепскиот регион. Бербата треба да биде во договорен период за да не се соочиме со зголемена количина на берба на пиперка во текот на денот и да имаме застој во откупот”, додаде министерот Трипуновски.
Министерот истакна дека оваа година откупните цени за пиперката се зголемени во однос на минатата година.
„Текот на откупот ќе го следиме преку Државниот инспекторат за земјоделство. Како Министерство стоиме на располагање, а трендот на зголемување на земјоделското производство треба да продолжи и понатаму”, посочи тој.
Економија
Владата работи на зголемување на просечната плата, најави Мицкоски

Претседателот на Владата, Христијан Мицкоски, одговарајќи на новинарско прашање во врска со растот на платите во државата, со оглед на најновите статистички податоци, според кои просечната нето плата бележи раст и изнесува 45.800 денари, изјави:
„Прво што сакам да кажам е дека и тоа не е доволно. Дека треба да биде уште поголема просечната плата, и во таа насока продолжуваме, како Влада, да работиме. Но и самиот факт и бруто и нето, од просечната плата растат повеќе од 11% е демант за сите оние, би рекол, некрофили во рамките на опозицијата, кои што изминатиов период континуирано конструираа и лиферуваа лаги во јавноста, дека платите не растеле, дека платите стагнирале итн. Но овие податоци коишто пристигнуваат се само доволен доказ дека тие, освен тоа што не говорат вистина, шпекулираат, конструираат и креираат невистини. Друго ништо не можат да сработат и токму затоа таква е состојбата во опозицијата, и токму затоа народот ја изгуби довербата во нив.“
Владата продолжува да работи, рече премиерот, за граѓаните да имаат уште повисоки примања.
„И нормално, ние како Влада продолжуваме и понатаму да работиме за уште повисоки примања на работниците, затоа што тоа е наша цел, да испорачаме тоа што граѓаните од нас очекуваат.“, објасни Мицкоски.