Економија
Македонија треба што поскоро да отвори дистрибутивен центар во Русија
Македонските стопанственици сметаат дека што поскоро треба да се отвори дистрибутивен центар во Руската федерација и оти со тоа ќе се зголеми трговската соработка меѓу Македонија и Русија.
Македонските стопанственици сметаат дека што поскоро треба да се отвори дистрибутивен центар во Руската федерација и оти со тоа ќе се зголеми трговската соработка меѓу Македонија и Русија.
На денешниот иницијативен состанок за отворање дистрибутивен центар на македонските стоки во руската област Самара, во организација на Стопанската комора на Македонија и Македонско-руската стопанска комора, беше истакнато дека земјоделството е најатрактивен сектор и главна шанса за развивање на соработката со Самарската област.
Центарот како што беше речено е посебно поволен за винарите.
„Треба да се направи притисок врз нашата Влада за да се реши проблемот со визите, но и да се овозможат услови за безцаринска размена. Македонското стопанство со ниту една гранка не може да влијае на руската економија. Затоа и треба да се преземат сите мерки за максимално олеснување на соработката“, рече Богоја Блажески, сопственик на „Сигурносни појаси“ од село Белчишта, Охридско, кој воедно веќе неколку години е и иницијатор за отворање дистрибутивен центар за македонските стоки во Самарската област.
Според неговите досегашни искуства рече дека не е лесно да се работи со Руската Федерација, но смета дека е многу благодарно и оти маките и вложените напори секогаш се исплатуваат.
Извршниот директор на Македонско-руската стопанска комора Дејан Бешлиев, посочи дека Самарската област е увозно зависна од прехранбени продукти и токму затоа фокусот треба да се стави на агрокомплексот.
„Транспортот воопшто не претставува проблем зашто освен автопатната мрежа, исклучително се развиени и железничкиот и воздушниот сообраќај“, рече Бешелиев.
Самарската област е една од економски најразвиените во Русија. Има резерви на нафта, природен гас и хидроенергија, богата е со сулфур, креда, глина и други природни богатства.
Најразвиени како што посочи Јелисавета Георгиевска, извршен директор на Стопанската комора се машинството, хемиската индустрија и обоената металургија.
Стопанството го сочинуваат 400 големи и средни претпријатија и преку 4.000 мали фирми. Просечната плата е 435 евра, а бројот на жители што гравитира во оваа област надминува 20 милиони.
Трговската соработка меѓу Македонија и Русија е во континуиран раст, но константно се зголемува и трговскиот дефицит на македонска страна. Во 2010 година покриеноста на увозот со извозот изнесуваше 4,8 отсто, во 2009 4,6 отсто, а во првиот квартал 5,3 отсто.
Покрај објективните фактори за ваквиот трговски дебаланс во кој се вбројуваат структурата на размената, непреференцијална трговија, отежнатиот транспорт, влијание имаат и субјективните фактори, а тоа според Георгиевска е нашата недоволна иницијативност да се искористат постојните ресурси што ги нуди рускиот пазар./крај/бд
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Вицегувернерката Митреска: Народната банка го поттикнува зеленото кредитирање
„Народната банка ги препозна ризиците од климатските промени на долг рок, зазеде проактивен став и како една од своите стратегиски цели ги постави зголемената свесност за климатските промени и придонесот кон зелената одржлива економија“, посочи вицегувернерката на Народната банка, Ана Митреска, во интервју за „Блумберг Адрија“, при што истакна дека „зелената агенда“ е вградена во Стратегискиот план на Народната банка. Во период од четири години нивото на „зелените кредити“ е зголемено за околу 2,5 пати.
Митреска посочи дека заради поддршка на зелените финансии и за справување со климатските ризици, Народната банка донесе среднорочен план којшто предвидува конкретни акциски планови или активности во повеќе сфери на работењето на Народната банка, како регулативата, супервизијата, финансиската стабилност, истражувањето и меѓународната соработка.
„Неодамна донесовме и конкретни насоки за банките коишто треба да претставуваат еден вид мапа за начинот на кој треба да се однесуваат банките во однос на мерењето, оценувањето и управувањето со ризиците од климатските промени. Уште пред неколку години го променивме концептот на инструментот за задолжителна резерва заради поттикнување на зеленото кредитирање. Во рамките на институцијата работиме и на политиката на одржливост на банката, што значи подобрување на нашиот корпоративен профил во однос на одржливоста како концепт“, посочи Митреска, истакнувајќи дека Народната банка применува систематизиран пристап кога станува збор за зелената економија и справувањето со ризиците од климатски промени.
„Кредитите со зелена компонента се кредити коишто се насочени кон зголемување на енергетската ефикасност, и на корпоративниот сектор, и на населението, вложување, односно инвестиции во проекти коишто се однесуваат на обновливи извори на енергија, проекти коишто подразбираат користење одржливи материјали, одржливи решенија“, објасни Митреска и посочи дека станува збор за кредитирање коешто е насочено кон инвестициите наменети за заштита на животната средина и ублажување на ефектите од климатските промени врз околината.
Економија
Од полноќ нови цени на горивата
Регулаторната комисија за енергетика донесе oдлука со која се врши намалување на малопродажните цени на нафтените деривати во просек за 0,09 % во однос на одлуката од 15.4.2024 година.
Од 23.4.2024 година, од 00.01 часот, максималните цени на нафтените деривати ќе изнесуваат:
Моторен бензин ЕВРОСУПЕР БС-95 – 87,50 (денари/литар)
Моторен бензин ЕВРОСУПЕР БС-98 – 90,00 (денари/литар)
Дизел-гориво ЕВРОДИЗЕЛ БС (Д-Е V) – 76,00 (денари/литар)
Масло за горење екстра-лесно 1 (ЕЛ-1) – 76,00 (денари/литар)
Мазут М-1 НС – 44,554 (денари/килограм)
Малопродажните цени на ЕВРОДИЗЕЛОТ (Д-Е V) и на екстра-лесното масло за домаќинство на (ЕЛ-1) се намалуваат 1,50 денар/л.
Малопродажната цена на бензинот ЕВРОСУПЕР БС-95 се зголемува 1,00 денар/л, а малопродажната цена бензинот ЕВРОСУПЕР БС-98 се зголемува 1,50 денар/л.
Малопродажната цена на мазутот М-1 НС се зголемува 0,252 денари/кг и ќе изнесува 44,554 денари/кг.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините 0,608 %, кај дизелот намалувањето е 5,088 %, кај екстра-лесното масло намалувањето е 4,799 % и кај мазутот намалувањето е 1,138 %.
Курсот на денарот во однос на доларот во изминатиот период по кој беа формирани цените со претходната пресметка е повисок 1,618 %.
Економија
МЗШВ: Кон 4.033 одгледувачи на говеда исплатени 100 милиони денари дополнителни субвенции за обележани говеда
Министерството за земјоделство, шумарство и водостопанство ги информира сточарите, одгледувачи на говеда, дека денеска Агенцијата за финансиска поддршка во земјоделството и руралниот развој ја реализираше исплатата на дополнителните директни плаќања за обележани грла говеда постари од 12 месеци.
Исплатени се 4.033 одгледувачи на говеда, со вкупна вредност на поддршка од 100 милиони денари.
Висината на директните плаќања изнесува 2.600 денари по женско грло, кое на денот на поднесувањето на барањето има наполнето 12 месеци.
Како корисници на оваа подмерка се јавуваат земјоделските стопанства корисници на основните директни плаќања за обележани грла говеда постари од 12 месеци, а кои сопственото производство на млеко го имаат предадено на регистриран откупувач на сурово млеко или продале или заклале говеда во преработувачки капацитети.