Економија
Сараќини се сретна со претставници на Занаетчиската комора
Министерот за економија Ваљон Сараќини и претставници на Занаетчиската комора на Република Македонија и регионалните занаетчиски комори одржаа прес-конференција на тема „Поддршка на занаетчиството – проект за автентични ракотворби“.
Министерот за економија Ваљон Сараќини и претставници на Занаетчиската комора на Република Македонија и регионалните занаетчиски комори одржаа прес-конференција на тема „Поддршка на занаетчиството – проект за автентични ракотворби“.„Главната цел е поддршка на автентичните ракотворби, која ќе можат да ја користат регистрираните занаетчии преку аплицирање за грантови од 5.000 евра за набавка на алати и опрема, како и стручно оспособување на занаетчиите. За овој проект наскоро ќе биде објавен јавен повик, кој ќе трае до 1 ноември 2012 година“, изјави министерот Сараќини.Тргнувајќи од фактот што занаетчиството, заедно со претприемништвото се високо позиционирани во агендата на економската политика во Република Македонија, а во регионалните и општинските комори во Македонија во моментов има околу 6.000 регистрирани занаетчии, Владата усвои и Национална стратегија за развој на занаечиството 2012-2020 година, во која посебно се зацртани: регулаторната гилотина за поедноставување на прописите и намалување на трошоците за занаетчиите, образование и обуки во занаетчиството, помош (кофинансирање) за проекти за поддршка и промоција на занаетчиството, односно финансиска поддршка на проекти за организирање на форуми, обуки, промотивни активности (саеми, манифестации и др.)„Занаетчиите, заедно со малите и средните претпријатија учествуваат со 99 % од вкупниот број на постојни претпријатија, со што се потврдуваат како важни учесници во економијата како целина и важни креатори на општествениот производ“, објасни министерот Сараќини.Извршниот директор на Занаетчиската комора на Република Македонија Оливија Штерјова го изрази задоволството што занетчиството сè повеќе е присутно во владините политики за разлика од минатото.„До неодамна, занаетчиството беше маргинализиран сектор, следен со стереотипи, со имиџ на традиционално производство и неатрактивно занимање. Последните две години Владата има проактивен пристап кон занаетчиството и презема низа активности за негов развој“, рече Штерјова. „Денеска, министерот за економија го промовира проектот ’Автентична ракотворба 2012’ кој го оценуваме како квалитетен, зашто дава директна финансиска помош за занаетчиите и има за цел да ги подобри конкурентноста и одржливоста на занетчиството, конкретно домашното уметничко ракотворење“, рече таа.Претставниците од коморите укажаа на потребата оваа група на занаети да добива поддршка, бидејќи е насочена кон софистицирана побарувачка на пазарот и изработува производи кои имаат високоуметничка и културна вредност, што е во согласност и со европската практика, за да се дојде до изработка на атрактивни производи наменети и за меѓународниот пазар. /крај/со/ст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Вицегувернерката Митреска: Народната банка го поттикнува зеленото кредитирање
„Народната банка ги препозна ризиците од климатските промени на долг рок, зазеде проактивен став и како една од своите стратегиски цели ги постави зголемената свесност за климатските промени и придонесот кон зелената одржлива економија“, посочи вицегувернерката на Народната банка, Ана Митреска, во интервју за „Блумберг Адрија“, при што истакна дека „зелената агенда“ е вградена во Стратегискиот план на Народната банка. Во период од четири години нивото на „зелените кредити“ е зголемено за околу 2,5 пати.
Митреска посочи дека заради поддршка на зелените финансии и за справување со климатските ризици, Народната банка донесе среднорочен план којшто предвидува конкретни акциски планови или активности во повеќе сфери на работењето на Народната банка, како регулативата, супервизијата, финансиската стабилност, истражувањето и меѓународната соработка.
„Неодамна донесовме и конкретни насоки за банките коишто треба да претставуваат еден вид мапа за начинот на кој треба да се однесуваат банките во однос на мерењето, оценувањето и управувањето со ризиците од климатските промени. Уште пред неколку години го променивме концептот на инструментот за задолжителна резерва заради поттикнување на зеленото кредитирање. Во рамките на институцијата работиме и на политиката на одржливост на банката, што значи подобрување на нашиот корпоративен профил во однос на одржливоста како концепт“, посочи Митреска, истакнувајќи дека Народната банка применува систематизиран пристап кога станува збор за зелената економија и справувањето со ризиците од климатски промени.
„Кредитите со зелена компонента се кредити коишто се насочени кон зголемување на енергетската ефикасност, и на корпоративниот сектор, и на населението, вложување, односно инвестиции во проекти коишто се однесуваат на обновливи извори на енергија, проекти коишто подразбираат користење одржливи материјали, одржливи решенија“, објасни Митреска и посочи дека станува збор за кредитирање коешто е насочено кон инвестициите наменети за заштита на животната средина и ублажување на ефектите од климатските промени врз околината.
Економија
Од полноќ нови цени на горивата
Регулаторната комисија за енергетика донесе oдлука со која се врши намалување на малопродажните цени на нафтените деривати во просек за 0,09 % во однос на одлуката од 15.4.2024 година.
Од 23.4.2024 година, од 00.01 часот, максималните цени на нафтените деривати ќе изнесуваат:
Моторен бензин ЕВРОСУПЕР БС-95 – 87,50 (денари/литар)
Моторен бензин ЕВРОСУПЕР БС-98 – 90,00 (денари/литар)
Дизел-гориво ЕВРОДИЗЕЛ БС (Д-Е V) – 76,00 (денари/литар)
Масло за горење екстра-лесно 1 (ЕЛ-1) – 76,00 (денари/литар)
Мазут М-1 НС – 44,554 (денари/килограм)
Малопродажните цени на ЕВРОДИЗЕЛОТ (Д-Е V) и на екстра-лесното масло за домаќинство на (ЕЛ-1) се намалуваат 1,50 денар/л.
Малопродажната цена на бензинот ЕВРОСУПЕР БС-95 се зголемува 1,00 денар/л, а малопродажната цена бензинот ЕВРОСУПЕР БС-98 се зголемува 1,50 денар/л.
Малопродажната цена на мазутот М-1 НС се зголемува 0,252 денари/кг и ќе изнесува 44,554 денари/кг.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините 0,608 %, кај дизелот намалувањето е 5,088 %, кај екстра-лесното масло намалувањето е 4,799 % и кај мазутот намалувањето е 1,138 %.
Курсот на денарот во однос на доларот во изминатиот период по кој беа формирани цените со претходната пресметка е повисок 1,618 %.
Економија
МЗШВ: Кон 4.033 одгледувачи на говеда исплатени 100 милиони денари дополнителни субвенции за обележани говеда
Министерството за земјоделство, шумарство и водостопанство ги информира сточарите, одгледувачи на говеда, дека денеска Агенцијата за финансиска поддршка во земјоделството и руралниот развој ја реализираше исплатата на дополнителните директни плаќања за обележани грла говеда постари од 12 месеци.
Исплатени се 4.033 одгледувачи на говеда, со вкупна вредност на поддршка од 100 милиони денари.
Висината на директните плаќања изнесува 2.600 денари по женско грло, кое на денот на поднесувањето на барањето има наполнето 12 месеци.
Како корисници на оваа подмерка се јавуваат земјоделските стопанства корисници на основните директни плаќања за обележани грла говеда постари од 12 месеци, а кои сопственото производство на млеко го имаат предадено на регистриран откупувач на сурово млеко или продале или заклале говеда во преработувачки капацитети.