Економија
Да се оживуваат неискористените индустриски капацитети
За можностите што ги нуди општина Гостивар за забрзан економски развој, преку влез на нови инвестиции, со што ќе се отварат нови работни места и ќе се подобри животниот стандард на граѓаните, разговарале во четврток министерот за економија, Ваљон Сараќини и градоначалникот, Невзат Бејта.
Министерот Сараќини и градоначалникот Бејта го посетија АДГ „Маврово“ во стечај, како една четирите локациите во општината, наменети токму за привлекување на т.н. brownfield инвестиции, односно инвестиции кои што се реализираат во веќе постоечки, но неискористени капацитети, кои што се во сопственост на разни субјекти од државата.
„Brownfield инвестициите се нов модалитет кон кој Владата работи за привлекување на инвестициите, тие се поранешно индустриско земјиште, кое е сега слободно, не се користи, но има потенцијал да биде повторно развиено за нови потреби“, изјави Сараќини.
Според него, ова е подеднаква можност и за домашните деловни субјекти кои би сакале да почнат или да прошират дел од бизнисот, да ги искористат можностите што Владата ги нуди.
Министерот Сараќини појасни дека преку процес на рекомпонирање, реструктуирање, реновирање и воведување на нови процеси за работа, за производство или извршување друг вид дејност овие индустриски локации, претставуваат шанса за нови бизнис можности, можен профит на празни или неискористени имоти, но и бенефити за општината и регионот каде се наоѓаат, како и пристап до нови пазари за инвеститорите.
„На територијата на Република Македонија постојат над 400 единици на ресурси, односно потенцијални локации кои се наoѓаат на листата на просторни капацитети наменети за т.н. brownfield инвестиции, изготвена од страна на Владата на Република Македонија. Станува збор за Регистар на хали, со вкупна површина на објекти околу 1.700.000 метри квадратни, а вкупниот број на површини наменети за ваков тип инвестиции изнесува околу 4.700.000 метри квадратни“, рече Сараќини.
Регистарот е објавен на веб-страната на Агенцијата за привлекување странски инвестиции, со детален приказ на капацитетите, како и со сите модалитети за одредениот капацитет.
„Поддршката на граѓаните на Гостивар е континуирана, особено што целта на оваа денешна средба е оживувањето на старите неискористени објекти, кои ги има многу на територијата на Гостивар, а подолго време не се во употреба, а можат да придонесат за побрз економски развој. Со помош на Министерството за економија ќе ги вознобновиме овие капацитети, па од нив ќе се родат нови објекти, кои ќе придонесат за нови вработувања, но и ќе ја разубават општината“, рече градоначаникот Невзат Бејта./крај/со/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Вицегувернерката Митреска: Народната банка го поттикнува зеленото кредитирање
„Народната банка ги препозна ризиците од климатските промени на долг рок, зазеде проактивен став и како една од своите стратегиски цели ги постави зголемената свесност за климатските промени и придонесот кон зелената одржлива економија“, посочи вицегувернерката на Народната банка, Ана Митреска, во интервју за „Блумберг Адрија“, при што истакна дека „зелената агенда“ е вградена во Стратегискиот план на Народната банка. Во период од четири години нивото на „зелените кредити“ е зголемено за околу 2,5 пати.
Митреска посочи дека заради поддршка на зелените финансии и за справување со климатските ризици, Народната банка донесе среднорочен план којшто предвидува конкретни акциски планови или активности во повеќе сфери на работењето на Народната банка, како регулативата, супервизијата, финансиската стабилност, истражувањето и меѓународната соработка.
„Неодамна донесовме и конкретни насоки за банките коишто треба да претставуваат еден вид мапа за начинот на кој треба да се однесуваат банките во однос на мерењето, оценувањето и управувањето со ризиците од климатските промени. Уште пред неколку години го променивме концептот на инструментот за задолжителна резерва заради поттикнување на зеленото кредитирање. Во рамките на институцијата работиме и на политиката на одржливост на банката, што значи подобрување на нашиот корпоративен профил во однос на одржливоста како концепт“, посочи Митреска, истакнувајќи дека Народната банка применува систематизиран пристап кога станува збор за зелената економија и справувањето со ризиците од климатски промени.
„Кредитите со зелена компонента се кредити коишто се насочени кон зголемување на енергетската ефикасност, и на корпоративниот сектор, и на населението, вложување, односно инвестиции во проекти коишто се однесуваат на обновливи извори на енергија, проекти коишто подразбираат користење одржливи материјали, одржливи решенија“, објасни Митреска и посочи дека станува збор за кредитирање коешто е насочено кон инвестициите наменети за заштита на животната средина и ублажување на ефектите од климатските промени врз околината.
Економија
Од полноќ нови цени на горивата
Регулаторната комисија за енергетика донесе oдлука со која се врши намалување на малопродажните цени на нафтените деривати во просек за 0,09 % во однос на одлуката од 15.4.2024 година.
Од 23.4.2024 година, од 00.01 часот, максималните цени на нафтените деривати ќе изнесуваат:
Моторен бензин ЕВРОСУПЕР БС-95 – 87,50 (денари/литар)
Моторен бензин ЕВРОСУПЕР БС-98 – 90,00 (денари/литар)
Дизел-гориво ЕВРОДИЗЕЛ БС (Д-Е V) – 76,00 (денари/литар)
Масло за горење екстра-лесно 1 (ЕЛ-1) – 76,00 (денари/литар)
Мазут М-1 НС – 44,554 (денари/килограм)
Малопродажните цени на ЕВРОДИЗЕЛОТ (Д-Е V) и на екстра-лесното масло за домаќинство на (ЕЛ-1) се намалуваат 1,50 денар/л.
Малопродажната цена на бензинот ЕВРОСУПЕР БС-95 се зголемува 1,00 денар/л, а малопродажната цена бензинот ЕВРОСУПЕР БС-98 се зголемува 1,50 денар/л.
Малопродажната цена на мазутот М-1 НС се зголемува 0,252 денари/кг и ќе изнесува 44,554 денари/кг.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините 0,608 %, кај дизелот намалувањето е 5,088 %, кај екстра-лесното масло намалувањето е 4,799 % и кај мазутот намалувањето е 1,138 %.
Курсот на денарот во однос на доларот во изминатиот период по кој беа формирани цените со претходната пресметка е повисок 1,618 %.
Економија
МЗШВ: Кон 4.033 одгледувачи на говеда исплатени 100 милиони денари дополнителни субвенции за обележани говеда
Министерството за земјоделство, шумарство и водостопанство ги информира сточарите, одгледувачи на говеда, дека денеска Агенцијата за финансиска поддршка во земјоделството и руралниот развој ја реализираше исплатата на дополнителните директни плаќања за обележани грла говеда постари од 12 месеци.
Исплатени се 4.033 одгледувачи на говеда, со вкупна вредност на поддршка од 100 милиони денари.
Висината на директните плаќања изнесува 2.600 денари по женско грло, кое на денот на поднесувањето на барањето има наполнето 12 месеци.
Како корисници на оваа подмерка се јавуваат земјоделските стопанства корисници на основните директни плаќања за обележани грла говеда постари од 12 месеци, а кои сопственото производство на млеко го имаат предадено на регистриран откупувач на сурово млеко или продале или заклале говеда во преработувачки капацитети.