АД ЕСМ попладнево соопшти дека не доставиле понуда до универзалниот снабдувач „ЕВН хоум“ за снабдување на домаќинствата и малите потрошувачи. Од ЕСМ велат дека ова е затоа што одлуката на Владата во однос на препорачаната цена и количините струја биле за шест месеци, а тендерот на „ЕВН хоум“ е за 12-месечен период.

„Одлуката од Владата на Република Северна Македонија во однос на препорачаната цена и количини на електрична енергија со кои АД ЕСМ треба да се јави на тендерот на ‘ЕВН хоум’ за 2022 се однесува на 6-месечен период, а актуелниот тендер на ‘ЕВН Хоум’ е распишан за 12-месечен период. Од тие причини АД ЕСМ денеска не поднесе понуда“, стои во соопштението од ЕСМ.

Од таму посочуваат дека ќе се јават на следниот тендер на универзалниот снабдувач, кој треба да биде за периодот јануари – јуни 2022 година.

Вчера, министерот за економија, Крешник Бектеши, изјави дека цената на струјата во следните шест месеци од 2022 нема да се зголеми повеќе од 10 проценти.

Многуројни показатели потврдуваат дека македонската економија е стабилна и е подготвена за справување со сите глобални предизвици што претстојат. Потврда за тоа е и растот на БДП во третото тримесечје од 3 отсто. Покрај домашниот бруто-производ, расте и извозот кој во првите 10 месеци од годинава е зголемен 29 отсто во однос на минатата година. Ова се показатели дека Владата предводена од СДСМ, институциите, преземаат соодветни и ефикасни економски мерки и политики, изјави пратеничка на СДСМ, Марија Георгиевска.

Дополнително, рече таа, Народната банка официјално потврди дека денарот е стабилен и дека граѓаните не треба да се вознемируваат од информациите што тенденциозно се појавија на одредени медиуми.

„СДСМ како одговорна, социјалдемократска партија во континуитет презема мерки, што значат вистинска грижа за граѓаните и заштита на нивниот економски стандард.
Во таа насока е и одлуката на Владата за замрзнување на цените на основните продукти до 31 јануари 2022 година, кои нема да смее да бидат повисоки од цените што биле на 1 декември оваа година“, истакна пратеничката од СДСМ.

Најави дека и во 2022 година ќе продолжи растот на платите и на пензиите.

„Веќе од јануари минималната плата ќе изнесува 18.000 денари, а со новата методологија за законско усогласување, пензиите двапати во годината ќе растат помеѓу 400 и 600 денари, во зависност од висината на конкретната пензија. Буџетот е ликвиден, државата има доволно пари за помош на граѓаните и компаниите за надминување на претстојните предизвици“, додаде Георгиевска.

Најави дека ќе следува субвенционирање на трошоците за електрична енергија за ранливите категории граѓани и семејства.

Сето ова, како што рече, е во насока на зајакнување на економскиот стандард на граѓаните во време кога целиот свет се соочува со енергетска и економска криза.

Фармерите што од почетокот на годината до крајот на септември 2021 година набавиле педигрирани, хибридни чистокрвни свињи или, пак, пчелини матици од одобрени одгледувачници, ќе може да поднесат барање за добивање финансиска поддршка преку мерката „Инвестиции во модернизација на земјоделски стопанства“, информираат од Агенцијата за финансиска поддршка во земјоделството и руралниот развој.

Директорот на Агенцијата за финансиска поддршка во земјоделството и руралниот развој, Никица Бачовски, информира дека средствата се обезбедени преку Програмата за рурален развој, а право на аплицирање имаат сите земјоделски стопанства што се запишани во Единствениот регистар на земјоделските стопанства.

„Сите што се регистрирани земјоделци и набавиле пчелини матици ќе може да добијат подддршка до 600.000 денари за корисник, а поддршка до 6.500.000 денари за корисник ги следува сите што имаат набавени чистокрвни или хибридни свињи назимки или нерези. Финансиската поддршка се исплаќа по принцип на кофинансирање на веќе завршени и исплатени инвестиции од страна на корисникот во висина од 50 % од вредноста на одобрени прифатливи трошоци за реализација на инвестицијата. Ставката за кофинансирање се зголемува на 55 % поврат на прифатливата сума во случаи кога инвестицијата е реализирана од страна на млад земјоделец. До 60 % од прифатливите трошоци се прифатливи за сите фармери што имаат инвестиции во подрачја со ограничени можности, а 75 % поврат на прифатените средства за реализираната инвестиција ги следува фармерите што имаат инвестиции во недостапни рурални заедници“, информира Бачовски.

Сите заинтересирани потребно е барањата да ги поднестат електронски по извршената регистрација на веб-страницата на АФПЗРР – www.ipardpa.gov.mk, e- baranje.ipardpa.gov.mk. Заедно со барањето потребно е да се прикачат и сите задолжителните потребни документи што се бараат во согласност со овој јавен повик.

Електронски пополнетото барање, заедно со целкоупната пропратна документација, треба да се заверат со потпис и печат од барателот и целокупната документација во оригинал се доставува во затворен плик со назнака на предната страна на пликот во горниот лев агол „ Не отворај“. На пликот треба да стои барање за исплата и архивски број на барањето. Документацијата може да се достави по пошта или лично во писарницата на АФПЗРР.

Еден барател може да поднесе само едно барање за една мерка или најмногу две барања за ралични мерки земајќи ги предвид и преостанатите мерки од Програмата за рурален развој за 2021 година.

Краен рок за доставување на барањата е 31.12.2021 година.