Економија
Македонија 2025 со грант за бизнис обука за македонски менаџери
Организацијата Македонија 2025 во вторникот соопшти дека во соработка со Сојузот на Стопански Комори на Македонија и Бизнис школата Ричард Ајви од Канада, по седми пат по ред го организира Проектот Лидер.
Проектот Лидер е проект кој се одржува од 1991 во околу 30 различни земји во светот, и е наменет за претставници на мали и средни претпријатија, како и на претприемачи со развиена бизнис идеја или кои допрва сакаат да развијат. Програмата и обуките ќе се спроведуваат по начинот на работа на Бизнис школата Ричард Ајви, односно преку интерактивно тимско работење на 8 реални примери – Case Studies во чии рамки ќе се обработат теми како што се претприемништво, стратешко одлучување, маркетинг стратегија, услови и техники на финансиско работење, креирање на додадена вредност на бизнис плановите и други.„Проектот Лидер претставува обука за сет на технички вештини кои што учесниците може да ги процесираат и применат во нивните секојдневни предизвици или можности во претпријатијата.“ – објаснува Луси Ли, извршен директор на Проектот Лидер за 2013 година. Куртис Артур, фасилитатор на Проектот Лидер за 2013 беше воодушевен од македонските ученици и нивната желба да стекнат нови вештини и знаења. „Извонредна е можноста да дојдеме и да им помогнеме на луѓето да се фокусираат на својата страст и да им помогнеме да успеат. Македонија е прекрасна земја со огромни можности, пазар кој сеуште може да се развива и луѓе кои сакаат да успеат, но истовремено сакаат да придонесат и за успехот на својата земја,“ додава Артур. Дневните модули се состојат од студија на случај, работилница и презентација на резултатите. Секој ден, по завршувањето на модулите се предвидени индивидуални, еден-на-еден консултации за компаниите со обучувачите, во кои фокусот на работење би бил реален аспект од работењето на компанијата за кој е потребно подобрување: бизнис развоен план, разработка на стратегија, маркетинг план, развој на човечки ресурси и др. Минатогодишните учесници се презадоволни од тренинзите и успеале да најдат нивна практична примена во секојдневното работење. „Прв пат се случува да имаме предавачи и луѓе кои го споделуваат нивното искуство со нас директно и импресиониран сум што ни помогнаа како компанија да ја прошириме нашата визија за експанзија и реорганизација“, вели Игор Николоски, учесник на Проектот од компанијата IT Logistics. Отворениот повик за аплицирање за овогодинешниот проект завршува на 18 април. Интензивните десетдневни тренинзи ќе се одржат од 5 – 16 Мај, секој работен ден од 10:00 до 14:00. /крај/
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Вицегувернерката Митреска: Народната банка го поттикнува зеленото кредитирање
„Народната банка ги препозна ризиците од климатските промени на долг рок, зазеде проактивен став и како една од своите стратегиски цели ги постави зголемената свесност за климатските промени и придонесот кон зелената одржлива економија“, посочи вицегувернерката на Народната банка, Ана Митреска, во интервју за „Блумберг Адрија“, при што истакна дека „зелената агенда“ е вградена во Стратегискиот план на Народната банка. Во период од четири години нивото на „зелените кредити“ е зголемено за околу 2,5 пати.
Митреска посочи дека заради поддршка на зелените финансии и за справување со климатските ризици, Народната банка донесе среднорочен план којшто предвидува конкретни акциски планови или активности во повеќе сфери на работењето на Народната банка, како регулативата, супервизијата, финансиската стабилност, истражувањето и меѓународната соработка.
„Неодамна донесовме и конкретни насоки за банките коишто треба да претставуваат еден вид мапа за начинот на кој треба да се однесуваат банките во однос на мерењето, оценувањето и управувањето со ризиците од климатските промени. Уште пред неколку години го променивме концептот на инструментот за задолжителна резерва заради поттикнување на зеленото кредитирање. Во рамките на институцијата работиме и на политиката на одржливост на банката, што значи подобрување на нашиот корпоративен профил во однос на одржливоста како концепт“, посочи Митреска, истакнувајќи дека Народната банка применува систематизиран пристап кога станува збор за зелената економија и справувањето со ризиците од климатски промени.
„Кредитите со зелена компонента се кредити коишто се насочени кон зголемување на енергетската ефикасност, и на корпоративниот сектор, и на населението, вложување, односно инвестиции во проекти коишто се однесуваат на обновливи извори на енергија, проекти коишто подразбираат користење одржливи материјали, одржливи решенија“, објасни Митреска и посочи дека станува збор за кредитирање коешто е насочено кон инвестициите наменети за заштита на животната средина и ублажување на ефектите од климатските промени врз околината.
Економија
Од полноќ нови цени на горивата
Регулаторната комисија за енергетика донесе oдлука со која се врши намалување на малопродажните цени на нафтените деривати во просек за 0,09 % во однос на одлуката од 15.4.2024 година.
Од 23.4.2024 година, од 00.01 часот, максималните цени на нафтените деривати ќе изнесуваат:
Моторен бензин ЕВРОСУПЕР БС-95 – 87,50 (денари/литар)
Моторен бензин ЕВРОСУПЕР БС-98 – 90,00 (денари/литар)
Дизел-гориво ЕВРОДИЗЕЛ БС (Д-Е V) – 76,00 (денари/литар)
Масло за горење екстра-лесно 1 (ЕЛ-1) – 76,00 (денари/литар)
Мазут М-1 НС – 44,554 (денари/килограм)
Малопродажните цени на ЕВРОДИЗЕЛОТ (Д-Е V) и на екстра-лесното масло за домаќинство на (ЕЛ-1) се намалуваат 1,50 денар/л.
Малопродажната цена на бензинот ЕВРОСУПЕР БС-95 се зголемува 1,00 денар/л, а малопродажната цена бензинот ЕВРОСУПЕР БС-98 се зголемува 1,50 денар/л.
Малопродажната цена на мазутот М-1 НС се зголемува 0,252 денари/кг и ќе изнесува 44,554 денари/кг.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините 0,608 %, кај дизелот намалувањето е 5,088 %, кај екстра-лесното масло намалувањето е 4,799 % и кај мазутот намалувањето е 1,138 %.
Курсот на денарот во однос на доларот во изминатиот период по кој беа формирани цените со претходната пресметка е повисок 1,618 %.
Економија
МЗШВ: Кон 4.033 одгледувачи на говеда исплатени 100 милиони денари дополнителни субвенции за обележани говеда
Министерството за земјоделство, шумарство и водостопанство ги информира сточарите, одгледувачи на говеда, дека денеска Агенцијата за финансиска поддршка во земјоделството и руралниот развој ја реализираше исплатата на дополнителните директни плаќања за обележани грла говеда постари од 12 месеци.
Исплатени се 4.033 одгледувачи на говеда, со вкупна вредност на поддршка од 100 милиони денари.
Висината на директните плаќања изнесува 2.600 денари по женско грло, кое на денот на поднесувањето на барањето има наполнето 12 месеци.
Како корисници на оваа подмерка се јавуваат земјоделските стопанства корисници на основните директни плаќања за обележани грла говеда постари од 12 месеци, а кои сопственото производство на млеко го имаат предадено на регистриран откупувач на сурово млеко или продале или заклале говеда во преработувачки капацитети.