Заменик-претседателот на Владата, задолжен за економски прашања, координација на економските ресори и инвестиции, Фатмир Битиќи, се обрати на настанот по повод промоцијата на ТОП 100 најуспешни компании на Стопанската комора на Северо-Западна Македонија.

„Со голема чест и задоволство стојам денеска овде пред вас, прво затоа што долго време јас бев дел од заедницата од која денес ќе бидат претставени 100-те најуспешни компании, а второ, затоа што овој настан не е само доказ за вашиот претприемачки дух, туку и одраз на синергијата помеѓу приватниот сектор и економските политики на Владата. За вас, најуспешните ТОП-100, зборуваат бројките, кои укажуваат на стабилност и константен раст на компаниите, споредено со показателите од 2021 година. Минатата 2022 година која беше одбележана со економска и енергетска криза, најдобрите 100 оствариле приход од една милијарда и 374 милиони евра, со нето добивка од 100 милиони евра, притоа реализирајќи инвестиции од 64,6 милиони евра и вработувајќи 9.441 граѓани на нашата земја“, рече Битиќи.

Според него, влегувањето во нови инвестициски циклуси и задржувањето на пазарната позиција кај домашните компании, бара и позитивен економски контекст, кој е во делот на одговорноста на Владата и нејзините економски политики за поддршка на стопанството.

„Секојдневно расте бројот на домашни компании кои преку Законот за финансиска поддршка на инвестиции се охрабрени да инвестираат, до сега, од 2017 година до 2022 година, Владата има поддржано 919 домашни компании за нивните инвестициски циклуси со реализирани 500 милиони евра инвестиции, а за што се поддржани со околу 100 милиони евра, што е некаде околу 20 отсто. Оваа година потпишавме нови рекордни 289 договори по Законот за финансиска поддршка на инвестиции со компании кои предвидуваат инвестиции од 366 милиони евра и ќе се креираат нови 4.439 работни места“, потенцираше Битиќи.

Со писмо адресирано до министерот за животна средина и просторно планирање, г-ѓата Каја Шукова, Еуромакс Ресоурцес ги расчистува сите дилеми и заблуди кои во изминатиов период се создадоа во однос на работата на идниот рудник за бакар „Иловица- Штука“ и уште еднаш бара од надлежните органи да го разгледаат и да одговорат на барањето за спојувањето на концесиите „Иловица 6“ и „Иловица 11“ за кое нема никакви законски пречки да биде позитивно.

Во писмото, потпишано од највисоките членови на раководниот тим на Еуромакс Ресоурцес, Тимоти Морган Вин, претседател на Одборот на директори и главен извршен директор и Николас Треанд, извршен директор, компанијата нагласува дека во процесот на експлоатација на минералните суровини во рудникот нема да се користи цијанид, ниту било каква цијанидна супстанција. Компанијата се заложува да инвестира во најсовремени технологии кои овозможуваат управување со отпадот според методологијата за „суво јаловиште“ односно јаловината би била со слична текстура на обичната почва, како и плановите за инвестирање во нов водоводен систем за локалните села и населението.

„Во ова писмо ја нагласуваме нашата заложба дека во процесот на експлоатација нема да има употреба на цијанид. Повторувам, нема да има употреба на цијанидна супстанција во која било форма. Што се однесува до загриженоста за управувањето со јаловина, веќе имаме исклучително безбеден дизајн за управување со јаловина. Сепак, со оглед на неодамнешните важни технолошки подобрувања, ќе нарачаме студија за спроведување на капацитет за управување со „сува јаловина“. Доколку е остварливо, тоа значи уште едно постепено подобрување на безбедноста, дополнително намалување на ризикот од дефекти на браната, загадување на околните води или оштетување на околниот биодиверзитет и елиминирање на потенцијалното прелевање на јаловината. Во секој случај, нема да има брана со висок ѕид што ќе задржува огромна количина [загадена] вода. За да обезбедиме безбедно и стабилно водоснабдување за домаќинствата, ние се обврзуваме да инвестираме во нов водоводен систем за локалните жители да имаат чиста вода; и се обврзуваме да изградиме цевковод од акумулацијата Турија до Иловица, обезбедувајќи сигурно снабдување со вода за жителите да не останат без вода во текот на топлите лета“, истакна Тимоти Морган – Вин, претседател на Одборот на директори и главен извршен директор на Еуромакс Ресоурцес Лтд.

Нашата примарна цел е да ги ублажиме стравувањата околу спроведувањето на нашиот проект, истакна Николас Треанд, извршен директор на Еуромакс Ресоурцес Лтд, изразувајќи уверување дека планот за отворање на рудникот не само што ќе придонесат позитивно за економскиот раст, туку и ќе се усогласат со целите на еколошките активисти кои се залагаат за транзиција кон зелена енергија.

„Според Светската банка, зголемената побарувачка за „зелена“ технологија и производство на обновлива енергија, заедно со софистицираните решенија за складирање енергија, се предвидува да доведе до пораст од 500% на производството на критични минерали и метали потребни до 2050 година, вкупно околу 3 милијарди тони. Според сегашниот проект, рудникот Иловица Штука ќе произведува 24.000 тони бакар годишно. Нагласувајќи ја важноста на нашиот проект за рударство, од витално значење е да се забележи дека во текот на неговиот животен век, тој ќе игра клучна улога во исполнувањето на овие растечки глобални барања. Рударската индустрија значително еволуираше во последниве години, водена од принципите на одговорно рударство. Ние се придржуваме до современите технологии кои даваат приоритет на заштитата на животната средина, ги подобруваат работните услови и поддржуваат значителна општествена одговорност. Ќе го повторам она што Тим веќе го кажа многу јасно, рудникот Иловица Штука ќе биде без цијанид, со методологија на сув талог за управување со јаловина, нема да има опасност од прелевање, сегашното водоснабдување нема да биде во опасност и ќе инвестираме во нов цевковод кој обезбедува побезбедно и стабилно снабдување со вода за локалното население“, истакна извршниот директор, Николас Треанд.

Меѓу највисоките приоритети на компанијата останува и одржувањето на соработката и комуникацијата со локалното население. Реализацијата на овој проект не значи сценарио или-или. Сосема спротивно, напредокот во современите технологии го отвора патот за соживот и истовремен развој и на рударската индустрија и на земјоделството под поволни услови, нагласи Дамиан Петровски, извршен директор на Еуромакс Ресоурцес ДОО Скопје.

„Во согласност со оваа визија, нашата компанија се обврзува да биде поддршка за локалното земјоделство. Нашата посветеност планираме да се материјализира преку различни начини, вклучително и финансиска помош за набавка на напредни земјоделски машини. Ја препознаваме клучната улога на технологијата во современото земјоделство и, како дел од нашите заложби, имаме за цел да го олесниме пристапот до најсовремените алатки и знаења кои можат значително да го подобрат локалното производство“, рече Петровски.

Од овие причини компанијата повикуваме властите да го разгледаат нашето писмо и очекуваме во најскоро време соодветна одлука за нашето барање за спојување на концесиите.

„Предметот предолго е заглавен во управните и судските постапки. Сметаме дека во најдобар интерес на жителите, државата и проектот е да се донесе брза одлука за иднината на овој проект – или регионот ќе добие мега инвестиција што ќе го поттикне економскиот развој во годините што доаѓаат, или ќе бидеме принудени да разгледаме други решенија за заштита на нашата инвестиција“, порача на крајот претседателот на Одборот на директори и главен извршен директор, Тим Морган – Вин.

Реализацијата на планот за изградба на рударскиот комплекс „Иловица – Штука“ означува значителна инвестиција во износ од 340 милиони евра. Оваа иницијатива ветува дека ќе генерира приближно 1.000 директни работни места во фазата на изградба и 500 директни работни места за време на работата на рудникот. Покрај неговото непосредно влијание врз вработувањето, проектот е ќе даде значителен придонес во бруто домашниот производ на земјата, вбризгувајќи средства и во државниот и во општинскиот буџет. Позитивен ефект ќе има врз локалните бизниси, кои ќе имаат значителни придобивки. Проекциите сугерираат годишен прилив од околу 74 милиони евра во овие локални претпријатија.

ПР

Министерството за земјоделство, шумарство и водостопанство ги известува сточарите, дека Агенцијата за финансиска поддршка во земјоделството и руралниот развој го објави повикот за поддршка за исплатена нето – плата за чување и напасување на добиток.

Како корисници на оваа мерка се јавуваат земјоделските стопанства регистрирани во Единствениот регистар на земјоделски стопанства при МЗШВ.

Поддршката која се дава преку оваа мерка е во висина од 100% од просечна месечна нето плата во дејноста од период 01.01.2022 до 31.12.2022 година, како трошок за чување и напасување на добитокот (овци, кози и/или говеда) на пасиште (вклучително и ливади) кое се наоѓа во населени места со надморска височина поголема од 700 метри, односно регистрираните одгледувалишта каде се одгледува добитокот да се наоѓаат во населени места со надморска височина поголема од 700 метри и во висина од 60% од просечна месечна нето плата во дејноста од период 01.01.2022 до 31.12.2022 година, како трошок за чување и напасување на добитокот (овци, кози и/или говеда) на пасиште (вклучително и ливади) кое се наоѓа во населени места со надморска височина под 700 метри односно регистрираните одгледувалишта каде се одгледува добитокот да се наоѓаат во населени места со надморска височина помала од 700 метри.

Максималната вредност на прифатливи трошоци е не повеќе од 360.000 денари по вработено лице, најмногу за 20 вработени лица. За над 10 вработени лица, поддршката се намалува за 50%.

„Ги информираме сточарите дека крајниот рок за доставување на барањата е до 20 декември 2023 година. Своите барања за исплата пополнети заедно со целокупната потребна документација треба да се достават до Агенцијата за финансиска поддршка во земјоделството и руралниот развој, преку пошта или лично во писарницата на Агенцијата“, велат од МЗШВ.