Свет
Еврозоната ја деблокираше првата транша од помошта за Грција
Третата програма за надворешна финансиска помош на Грција којашто до неодамна се наоѓаше на работ од банкрот и излегување од еврозоната, конечно ѝ е одобрена во средата вечерта, а првата транша ќе ја добие веќе во четврток (20-ти август) утрото.
Министрите за финанси на земјите од еврозоната во средата навечер ја одобрија исплатата на првата помош од третиот пакет во вкупен износ од 86 милијарди евра, што на Грција ќе ѝ овозможи веќе во четврток да ја исплати доспеаната рата по обврзниците кон Европската централна банка (ECB) во износ од 3,4 милијарди евра, соопшти Европскиот механизам за стабилизација (ESM).
Управниот совет на ESM, во кој влегуваат министрите за финансии на 19-те земји членки на монетарната унија, „ја одобри програмата за помош на Грција“, се наведува во соопштението. Грција веднаш ќе добие 23 милијарди евра, потврдиле за AFP добро информирани извори.
Друг извор, пак, за агенцијата РИА прецизирал дека првата транша ќе биде во износ од 13 милијарди евра, за да може уште во првите утрински часови во четвртокот Грција да го исплати долгот кон ЕЦБ и да го избегне повторно техничкиот банкрот. Потоа, не подоцна од крајот на ноември годинава, во зависност од исполнувањето на условите зададени од доверителите, на Атина ќе ѝ бидат ослободени уште 3 милијарди евра.
Покрај тоа, уште 10 милијарди евра наскоро ќе треба да бидат резервирани од посебната сметка на ESM, чијашто намена ќе биде за докапитализацијата на грчките банки. Потребите за докапитализацијата ќе бдиат утврдени подоцна, во зависност од стрес-тестовите и оцената на активите на банките во Грција.
„Сите држави, кои тоа требаше да го направат, ја одобрија програмата на национално ниво. Управниот одбор на Европскиот механизам за стабилност (ESM), кој во име на еврозоната ќе ги издава заемите на Грција, исто така, се согласи за пакетот за поддршка на оваа земјa“, се вели во соопштениeто на ESM.
Максималниот износ на кредитите од третата програма изнесува 86 милијарди евра. Засега се смета дека средствата ќе бидат обезбедени само од ESM, но во еврозоната се надеваат дека, како и во двете претходни програми за финансиска помош на Грција, и во оваа ќе се приклучи Меѓународниот монетарен фонд (ММФ).
Споменатиот износ ќе биде доделен до август 2018 година. „Максимално пондерираниот просечен рок за гаснење на кредитите изнесува 32,5 години“, се додава во соопштението на ESM. Притоа Грција ќе почне да ги плаќа каматите по кредитите постапно, а најдолгиот рок е околу 15 години по завршувањето на кредитот, се наведува во документите на Механизмот.
Се додава и дека ESM ќе ги прибира средствата на пазарите и со нив ќе ја кредитира Грција, како и дека во овој момент не се потребни дополните пари од буџетите на земјите од еврозоната. Стапката по кредитите на ESM ќе биде варијабилна, ќе се состои од трошоците за позајмувањата на Механизмот и од маржи. Во моментов стапката за кредитите на ESM изнесува во просек 1 отсто, во зависност од продуктот на Механизмот. „Сепак, оваа стапка може да биде променлива во зависност од условите на пазарот“, се вели во соопштението на ESM.
Европската комисија, ЕЦБ и ММФ ќе продолжат на квартална основа да го проценуваат исполнувањето на условите од договорот за новиот пакет за помош, особено во спроведувањето на реформите. Износите на траншите од третиот пакет финансиска помош ќе зависта и од евалуацијата и имплементацијата на барањата на доверителите, се наведува уште во материјалите на ESM, во кои увид имал Reuters. Првата процена, како што беше соопштено и претходно, ќе почне во првата половина оваа есен.
Средствата ќе бидат издавани особено доколку се постигнати целите на примарниот дефицит, а потоа и буџетскиот суфицит на земјата, како и реализацијата на низа реформи, меѓу другото во сферата на јавната администрација, пазарот на трудот, реформите во пензискиот и здравствениот систем итн.
Кон крајот на годината треба да биде формиран и посебниот приватизациски фонд во вредност од 50 милијарди евра, во којшто во прв ред би се слевале приходите од приватизацијата на услугите на поморските и воздушните пристаништа и од железничкиот транспорт. Грција управува со фондот, меѓутоа под надзор на меѓународните институции. Банките ќе треба во истиот период да ја завршат докапитализацијата, користејќи ги кредитите од ESM, како и од средствата на имателите на хартии од вредност на банките, но без зафаќање во парите од депозитите од кредитните институции./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
РЕ-Ново
Жена лажирала дури 17 бремености во текот на 24 години, добила 100.000 евра
Италијанка завршила во затвор бидејќи лажирала дури 17 бремености во текот на 24 години за да добие речиси 100.000 евра породилни надоместоци.
Барбара Џоел (50) излажала дека родила пет деца и направила уште 12 спонтани абортуси, а за да успее измамата, носела перници под кошулата за да изгледа како да има труднички стомак, пренесува „Јутарњи лист“.
Го лажирала и начинот на кој оди за да изгледа како да носи дете, а со тоа акумулирала значителен број слободни денови од работа. Џоел ги отфрли сите обвинувања и продолжува да тврди дека нејзините пет деца навистина постојат и дека сите нејзини бремености, вклучително и спонтани абортуси, биле реални.
Џоел тврдеше дека го родила своето последно дете во декември, но полицајците рекоа дека ја набљудувале претходните девет месеци и дека целата бременост била лажна. Таа е обвинета и за кражба на изводи од матичната книга на родените и други документи од клиника во Рим, пренесува италијанскиот весник „Ил Матино“.
Со ваков вид измама се занимава од 2000 година и на тој начин обезбедила бенефиции од над 94.000 евра. Дејвид Пичинато, 55-годишниот партнер на Џоел, наводно ѝ кажал на полицијата сè, а за време на испрашувањето рекол дека „добро знаел“ дека таа никогаш не била бремена.
Се верува дека сведочел против Барбара за да добие помала казна, иако и самиот бил обвинет за помагање во нејзината измама.
„Направила лажни сертификати и ги донела“, наводно им рекол Пичинато на истражителите. „Тоа го знам од 2012 година, односно од почетокот на нашата врска. Џоел беше осудена на една година и шест месеци затвор, но не се појави на изрекувањето на пресудата. Нејзиниот адвокат наводно покажал две потврди, кои потврдуваат дека е болна.
Економија
Еврото го слави својот 25-ти роденден: Треба да се воведе во дигиталната ера
Неопходно е еврото да се внесе во дигиталната ера и да се изгради унија на пазарот на капитал и посилна банкарска унија, најавија европските лидери во пресрет на 25-годишнината на европската валута.
Еврото стапи на сила пред 25 години, на 1 јануари 1999 година, а денес е валута на дваесет земји со 350 милиони жители, од кои Хрватска стана последна членка на почетокот на оваа година.
Претседателот на Еврогрупата Пашал Донохое, претседателката на Европската централна банка (ЕЦБ) Кристин Лагард, претседателката на Европскиот парламент Роберта Мецола, претседателот на Европскиот совет Шарл Мишел и претседателката на Европската комисија Урсула фон дер Лајен ја одбележаа таа годишнина со заедничка напис објавен на веб-страницата на ЕЦБ.
„Заедничката валута го олесни животот“
Во написот објавен вчера, тие пишуваат дека заедничката валута ѝ даде на Европската унија „едноставност, стабилност и суверенитет“ и го олесни животот на европските граѓани кои сега можат лесно да ги споредуваат цените, трговијата и патувањето.
Со текот на годините, еврото се соочуваше со големи предизвици, вклучително и прашања за неговото опстанок, пишуваат европските лидери, нагласувајќи дека „секогаш ќе се најдат вистинските одговори“, како што е усогласениот систем на супервизија на банките по големата криза во 2008 година.
„Денес поддршката за заедничката валута меѓу граѓаните на еврозоната се приближува до рекордни нивоа“, посочија тие, предупредувајќи дека работата „не е завршена“ бидејќи Европа се соочува со нови предизвици со кои поединечни држави не можат да се справат сами.
Унијата се соочува со растечки геополитички тензии, првенствено руската „илегална војна“ против Украина, забрзана климатска криза и невидени предизвици за европската конкурентност од другите делови на светот.
Затоа, прашањата како одбраната, зелената и дигиталната транзиција ќе бидат клучни во иднина. Само за декарбонизација на економиите ќе бидат потребни 620 милијарди евра годишно до 2030 година, предупредија тие.
ЕУ мора да изгради вистинска унија на пазарите на капитал за да ги „мобилизира приватните финансии“, да ја зајакне банкарската унија и да ги реформира фискалните правила. Еврото треба да влезе во „дигиталната ера“ и мора да се подготват темелите за потенцијално „дигитално евро“ кое ќе биде комплементарно на готовината.
Лидерите предупредуваат дека „со неколку земји кои моментално се во процес на пристапување во ЕУ“, алијансата мора да го задржи капацитетот да „дејствува решително“.
„Проширувањето и продлабочувањето меѓусебно не се исклучуваат. Но, проширувањето може да бара промени во организацијата на ЕУ“, се заклучува во написот.
Свет
Убиени 41 член од исто семејство во Газа
Министерството за здравство во Појасот Газа соопшти дека 41 член на исто семејство загинале во израелското бомбардирање на нивната куќа во централниот дел на градот Газа.
Министерството објави список со имињата на 41 член на семејството Малка, од кои сите загинаа во нападот што се случи во зори во населбата Зајтун во Појасот Газа, пренесува AFP.
На ова следуваа реакциите на корисниците на социјалните мрежи на веста за смртта на толку голем број членови на исто семејство, кои споделија список со имињата на загинатите, како што наведоа.
Тие ги осудија злосторствата на окупацијата со која беа истребени цели семејства и избришани од матичната евиденција, наведуваат некои од нив во своите објави.