Русија на самитот на земјите со најброзрастечки економии во светот BRICS (Бразил, Русија, Индија, Кина и Јужноафриканската Република) кој ќе се одржи на 15-ти и 16-ти јули во Бразил, ќе предложи создавање енергетска асоцијација на групата којашто ќе вклучува и банка за резерви на енергенси и институт за енергетски политики, изјави во четвртокот помошникот на рускиот претседател Владимир Путин пред почетокот на неговата латиноамериканска турнеја.

Во текот на шестдневното патување, рускиот претседател Владимир Путин ќе се сретне со историскиот водач на кубанската револуција Фидел Кастро, ќе учествува на самитот на организацијата на земјите на набјрозрастечките економии BRICS (Бразил, Русија, Индија, Кина и Јужноафриканската Република) и ќе присуствува на финалето на Светското фудбалско првенство во Рио де Жанеиро.Помошникот на рускиот претседател Јуриј Ушаков изјави дека на самитот на BRICS ќе бидат третирани прашањата за глобалните прашања за перспективите на соработката на земјите учесници во трговско-инвестициската и кредитно финансиската сфера, пренесува РИА Новости. „Русија има намера да предложи разгледување голем број конкретни теми, во прв ред формирање енергетска асоцијација на BRICS чиишто активности ќе бидат насочени кон обезбедување енергетска сигурност на земјите членки“, изјавил Ушаков на брифингот за новинарите во Москва.Москва притоа ќе предложи и спроведување сеопфатно истражување и анализа на трендовите на глобалниот пазар на јагленоводороди. „Во рамките на оваа асоцијација е замислено да биде создадена банка на резервите на енергенсите и институт за енергетски политики на BRICS“, прецизирал Ушаков. Додал и дека засега нема некои конкретни предлози. „Одлуката за структурата на асоцијацијата сé уште не е јасна. Во моментов зборуваме за тесна соработка на земјите на BRICS во енергетскиот сектор и изложување конретни предлози, особено за формирање на асоцијацијата (за енергија)“, додал советникот на рускиот претседател Путин. Посочил дека станува збор за заедничка иницијатива на државните агенции и бизнисот „којашто веќе претходно е прелиминарно дискутирана на владино ниво“. Претходно во понеделникот, висок кинески функционер за Reuters соопшти дека групата водечки економии во формирање постигнала широк консензус за формирање развојна банка којашто би требало да биде основана на претстојниот состанок на врвот на групата. Капиталот на новата банка ќе изнесува 100 милијарди американски долари, а банката ќе го симболизира сé поголемото влијание на економиите во формирање во глобалната финансиска архитектура во којашто долг период преку Меѓународниот монетарен фонд (ММФ) и Светската банка, доминираат САД и Европа.Новата развојна банка би требало, исто така, да ја покрие сé поголемата побарувачка за финансирање на проекти коишто не го сервисирале споменатите постојни меѓународни финансиски институции, инаку сé почесто изложени на жестока критика поради мешањето во внатрешната политика на кредитираните земји.Преговорите за оваа институција се провлекуваа изминатите две години, а повремено беа оптоварувани од желбата на Кина да си осигури поголемо влијание преку поголем удел во капиталот на банката.Банката ќе мора да ја ратификуваат законодавните тела на земјите членки на BRICS, а првите кредити ќе може да ги одобри по две години, рече минатата седмица за Reuters бразилски дипломат. Според него, челниците на земјите, исто така, ќе мора да донесат одлука дали седиштето на банката ќе биде во Њу Делхи, Шангај, Јоханесбург или во Москва.  Бразил нема да понуди седиште, поради претстојните претседателски избори, поради што преговорите можат да се забават. /крај/мф/сн

Извор: Макфакс