Култура
Нов стил и стандарди за 65 години Македонска филхармонија
Шеесет и пет години постоење на Македонската филхармонија и 100-годишнината од раѓањето на големиот македонски композитор Трајко Прокопиев ќе ја одбележат новата сезона 2009/2010 на македонскиот ансамбл
Сезоната ќе започне на 1 октомври 2009 година со настапот на светското диргентско име маестро Урош Лајовиц со фантастичната турска пијанистка Ѓулсен Онај како солистка. Концертот, каде ќе се изведе суитата „Лабин и Дојрана”, ќе биде посветен на 100-годишнината од раѓањето на еден од основоположниците на македонската современа музика Трајко Прокопиев. Пијанистката Онај доаѓа во Скопје по настапите на големите музички сцени во Њујорк, Лондон, Берлин. На отворањето ќе биде изведен концерт за пијано и оркестар од Едвард Григ и секогаш атрактивна за слушање суитата „Жар Птица” од Игор Стравински.На 26 Ноември 2009 година, кога се прославува 65-от роденден на Македонската филхармонија, ќе има свечен концерт под диригентската палка на маестро Јануш Пшибилски, каде како солист ке настапи нашата позната пијанистка, амбасадор на културата во Австрија, Елена Мисиркова изведувајќи го концертот за пијано од Властимир Николовски. На програмата на овој концерт ке биде изведена една од најубавите композиции напишани од Чајковски – неговата „Симфонија бр. 5“.„Во текот на целата сезона нашата публика ќе има можност да ужива во прекрасни концерти на кои ќе бидат изведени дела кои одамна ги нема на репертоарот на Македонската филхармонија, композиции кои за првпат ќе бидат изведени, но и композиции кои се дел од стандардниот репертоар на оркестарот и се омилени кај македонската публика. И оваа сезона Македонската филхармонија продолжува со внесување на нови стандарди во областа на класичната музика, со минатогодишните воведувања на нови циклуси – џез-симфониските концерти, циклусот концерти со име ‘големите мајстори’ концертите ‘Љубов’ и ‘Танго’, циклусот на концерти наменети за најмладите. Во новата сезона ќе се напушти циклусот на џез-симфониски концерти, но на сметка на тоа ќе се воведе нов циклус насловен ‘Слушајте филм’, а ќе бидат и изведени две големи вокално инструментални дела: ‘Пасија по Матеј’ напишана од рускиот епископ Иларион Алфеев и ‘Реквием’ од Габриел Форе, што ќе биде и велигденски подарок за публиката”, изјави директорката на Македонската филхармонија Маја Чаначевиќ.На сцената на македонската филхармонија ќе ги видиме и слушаме светски познатите солисти Валери Соколов, Изабел Фауст, Јоханес Мозер, Кристијан Фрон, Милослав Гајдош, Хисако Кавамура, Хонг Жу, Мелина Тодоровска, Емануел Цејсон, Радован Влатковиќ. Оваа сезона се прошири и листата на диригенти кои ќе работат со македонскиот оркестар, па така, освен веќе добро познатите за нашата публика Урош Лајовиц и Јануш Пшибилски, ќе настапуваат и Николас Клиобури, Ричард Бернас, Стефан Лано, Марко Летоња, Иван Репушиќ, нашите Борјан Цанев и Саша Николовски-Ѓумар, а по долги години пауза повторно на диригентскиот пулт ќе застане и Емил Табаков.„Во изминативе две сезони камерниот оркестар на Македонската филхармонија промовираше контуинуран растеж и фантастични концерти, што се покажа и на турнејата во јули годинава во Полска. Во сезоната 2009/2010 за сите љубители на камерното музицирање, овој камерен оркестар ќе им понуди несекојдневни музички доживувања водејќи ги низ различните епохи, стилови и музички форми напишани за камерен оркестар”, додаде Чаначевиќ.Покрај стандардните симфониски концерти, Македонската филхармонија во 2009/2010 повторно подготви изненадување за публиката. Два несекојдневни концерти кои се реткост во рамките и на најголемите симфониски оркестри.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Марко Бањоли во Чифте амам
На 23 април во 19 часот во Националната галерија на Македонија – Чифте амам, Скопје ќе се отвори мултимедијалната изложбата „Тркало на времето“ на истакнатиот италијански уметник Марко Бањоли.
„Со оваа изложба ја објавуваме одлуката на Советот на Остен „Земја во фокус“ на Остен Биеналето Скопје 2024 да биде Италија“, велат од Остен.
Изложбата е организирана во соработка со Зеринтија, Асоцијација за современа уметност, а со поддршка на Италијанска амбасада во Скопје и Италијанскиот културен институт во Белград.
Култура
Настап на Дуња Иванова и концерт посветен на Кире Костов во изведба на Биг бендот на фестивалот „Крај Вардарот џез“
Во рамки на втората фестивалска вечер на „Крај Вардарот Џез“, утревечер на 23 април во Македонската филхармонија со почеток во 20 часот на пијано ќе настапи Дуња Иванова.
Нејзиниот концертен настап „Мирисот на липите“ ќе биде проследен со текст и нарација на Тина Иванова. Музичко-поетски проект, кој раскажува приказна за познатите урбани и скриени места на Општина Центар. Липите на улицата „Орце Николов“, панкот од гаражите на „Плочник“, дружбите во дворот на „Песталоци“, графитите на Кеј, паркот на Горан Стефановски, кафеаната „Наџак“…
Ќе бидат изведени композицијата „Свита за Скопје“ од македонската композиторка Ана Пандевска, и песната „Ние сме од Скопје“ на Мирко Попов, чиј аранжман за пијано го направи Пандевска. Получасовно патување низ симболите на Скопје, погледнати низ интимна, лична перспектива на авторите. Во музиката, како и во нарацијата, провејува нишка на носталгија, а во исто време и крик за подобро утре на градот во кој пораснавме и без чиј воздух не можеме да живееме. „Мирисот на липите“ симболично ќе прикаже, преку звук и говор, еден живот на жител од Центар. Поетскиот наратив е оригинално креиран за овој уметнички перформанс, кој промовира иновативен пристап со содржина која пак, претставува ,,жива“ материја, блиска до човечкото срце.
Минатиот месец за „ПМГ Џез“, како 44 издание, излезе албум во живо, концерт на пијано на Дуња Иванова, кој беше реализиран во рамки на музичката програмата „Крај Вардарот Сесии во Аудиокултура“, која изведе композиции од Ана Пандевска.
Веднаш потоа во 21 часот на истата сцена ќе започне долгоочекуваниот концерт на Биг Бендот со музика од Кире Костов. Концерт посветен на еден од стожерите на современата џез композиција Кире Костов, преку интерпретација на негови избрани дела во современ аранжман од страна на Биг Бендот под диригентската палка на Љупчо Мирковски. Костов е едно од најзначајните имиња во современата џез музика, чија работа опфаќа бројни ангажмани и дела, меѓу кои: солист и диригент на Танцовиот оркестар на РТВ Скопје, наградуван трубач во Југославија, претставник во Биг бендот на Европската радиодифузија, автор на околу педесетина композиции во оркестарска изведба од областа на џезот и 300 песни во популарната музика и реализатор на сите изданија на Скопскиот фестивал од 1991. Подеднакво значајна ќе биде и изведбата на селектираните дела од Костов на еден од нашите најзначајни оркестарски формации, чија историја датира од далечната 1961 година (Биг Бендот на МРТ), кој во 2013 година се возобновува и продолжува да работи во музичка формација водена од Љупчо Мирковски како диригент.
Фестивалот ќе биде заокружен на 27 април во едукативно културниот центар Лабораториум со концертен настап на „Macedonian Free Society“ и со еден од највозбудливите музички проекти „Поетроника“.
Фестивалот е поддржан од Министерство за култура на Р.С. Македонија и се реализира во соработка со Македонска филхармонија и Лабораториум. Концертот „Мирисот на липите“ се реализира со поддршка на општина Центар.
Книги
МАИ ги додели наградите за изданијата меѓу два Саеми на книга
Комисијата за доделување на наградите на Македонската асоцијација на издавачи за периодот меѓу два саема, по разгледувањето на апликациите и на примероците од книгите доставени од издавачите, на состанокот на 15.04.2024 г. донесе одлуки за доделување на наградите на МАИ меѓу двата саема во мај 2023 и април 2024 година.
Признание за најдобра едиција, при што основен критериум бил уредничкиот пристап, концептот на едицијата и унифицираниот изглед/дизајн, со 1. место наградена е едицијата „ПРОаЗА“ („Или-или“), со 2. место едицијата „Бранови“ („Антолог“) и со 3. место едицијата „Современи класици“ („Арс ламина“).
Признание за најдобар оригинален дизајн на корица добија „Не кажувам“ од Петар Андоновски, дизајнирана од Марко Трпески („Полица“), „Базирано врз речиси вистинити настани“ од Ѕвездан Георгиевски, дизајнирана од Наталија Лукомска („Бегемот“) и „Кабинет на чуда со ѕидови од огледала“ од Владимир Јанковски, дизајнирана од Марко Трпески („Антолог“).
Признание за најдобро ликовно-графички уредено издание добија „Варшава го исцртува Скопје“ од Кинга Нетман-Мултановска; автор на дизајнот: Петер Личковски („Бегемот“), „Костимот во Македонија од појавата на фотографијата до денес“ од Зорка Тодорова Младеновиќ; графичко уредување на „Арс ламина“ и „Гени, мени, сени“ од Владимир Лукаш (текст и илустрации), со графичко уредување на „Супрема“.
Признание за оригинални целосно илустрирани книги за деца (сликовници) добија „Си беше еднаш – Најубавите бајки на сите времиња“ (прир. Оливера Ќорвезироска, со илустрации на Наталија Лукомска) („Арс ламина “), „Момчето од зборови / Девојчето од ноти“ од Катерина Николовска („Чудна шума“) и „Рокчето“ од Никола Маџиров, со илустрации на Анета Илиевска („Арс ламина“).
Во категоријата најкреативно издание каде влегуваат оригинални изданија за возрасни или за деца, кои се издвојуваат по својата нестандардност, признанија добија „Момчето од зборови / Девојчето од ноти“ од Катерина Николовска („Чудна шума“), „Шарени ириси“ од Јована Матевска Атанасова, со илустрации на Симонида Филипова Китановска („Арс ламина“) и „Мојата прва библиотека“ од Деспина Мукоска („Арс ламина“).
Признанието за автор на годината го доби Лидија Димковска („Три“).