Култура
Спектаклот „Трилогија Романа“ ќе го отвори Охридско лето
Со проектот „Трилогиjа Романа“ од Оторино Респиги во продукција на шпанската компанија „Ла фура дел Баус“ од Шпанија ќе се отвори Охридско лето
На отворањето ќе настапи Македонската филхармонија со која ќе диригира Андреас Везе.Оваа изведба ќе биде дел од светската премиера на ова дело кое на 17 јуни ќе биде изведено во Валенсија, на 2 јули во Рим и на 12 јули во Античкиот театар на 51-вото издание на фестивалот во Охрид.„Трилогија Романа“ содржи три дела, и тоа „Фесте Романе“, „Фонтане ди Рома“ и „Пини ди Рома“. „Музиката на Респиги дозволува музичарите со своите инструменти да бидат големите протагонисти, со својата кореографија која произлегува од велелепноста на партитурата. Околу музичарите се монтирани екрани кои ја примаат светлината од видео-проекторите и произведуваат слики на вода, скулптури, борови и сенки во постојано движење. Целиот проект е реализиран на начин да централната улога ја има имагинацијата. Публиката да си ги визуелизира светлосните линии кои доаѓаат од звучните бранови произведени од симфонискиот оркестар, а во исто време да ги реинтерпретираат идеите кои на Респиги му поминале низ глава додека ги компонирал овие три грандиозни партитури. Музика и светло. Слики и движење“, изјави Гордана Јосифова-Неделковска, селектор на музичката програма на „Охридско лето“.„Овде ќе се претставиме со достоен спектакл. Ние сме театарска компанија која повеќе се занимава со авантура отколку со театар. Во светот станавме познати по тоа што одевме спроти принципот на гравитација. Сакаме да направиме актерите и пејачите да летаат и работиме со елементи кои се од традицијата на Медитеранот оганот, водата и земјата. Во Охрид ќе се претставиме со нешто револуционерно што првпат ќе се види на овој фестивал. Музичарите од оркестарот нема да бидат седнати како што е вообичаено. Забележав дека овде на Балканот длабоко ја чувствуваат музиката и дури седат не се мирни, па затоа на овој проект ќе направиме да скокаат и да летаат. Она што ги спојува Валенсија, Рим и Охрид е водата, оганот и воздухот“, изјави Карлос Падриса, уметнички директор на компанијата „Ла фура дел Баус“ од Барселона. „ Значајно е да бидеме дел од овој спектакл, а со тоа да бидеме и дел од случувањата во светот. Сите композиции во „Трилогија Романа„ ги имаме свирено, но како поединечни композиции. Се работи за исклучително интересни композиции и комплексни партитури но ќе биде интересно обединети да се изведат. Овој предизвик ќе го прифатиме и ќе се обидеме да го изведеме на највисоко ниво“, рече Маја Чанаќевиќ, директор на Македонската филхармонија.„Ла фура дел Баус“ е компанија која од основањето во 1979 г. пристапува кон нови предизвици во областа на сценските уметности, а до сега организирала перформанси во многу земји како Бразил, Колумбија, Австралија, Кина, Русија, Италија, Шпанија, Холандија и други. Годинава ќе заживее четири стари опери и ќе има свои настапи во Дубаи, Исланд и Кореа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Марко Бањоли во Чифте амам
На 23 април во 19 часот во Националната галерија на Македонија – Чифте амам, Скопје ќе се отвори мултимедијалната изложбата „Тркало на времето“ на истакнатиот италијански уметник Марко Бањоли.
„Со оваа изложба ја објавуваме одлуката на Советот на Остен „Земја во фокус“ на Остен Биеналето Скопје 2024 да биде Италија“, велат од Остен.
Изложбата е организирана во соработка со Зеринтија, Асоцијација за современа уметност, а со поддршка на Италијанска амбасада во Скопје и Италијанскиот културен институт во Белград.
Култура
Настап на Дуња Иванова и концерт посветен на Кире Костов во изведба на Биг бендот на фестивалот „Крај Вардарот џез“
Во рамки на втората фестивалска вечер на „Крај Вардарот Џез“, утревечер на 23 април во Македонската филхармонија со почеток во 20 часот на пијано ќе настапи Дуња Иванова.
Нејзиниот концертен настап „Мирисот на липите“ ќе биде проследен со текст и нарација на Тина Иванова. Музичко-поетски проект, кој раскажува приказна за познатите урбани и скриени места на Општина Центар. Липите на улицата „Орце Николов“, панкот од гаражите на „Плочник“, дружбите во дворот на „Песталоци“, графитите на Кеј, паркот на Горан Стефановски, кафеаната „Наџак“…
Ќе бидат изведени композицијата „Свита за Скопје“ од македонската композиторка Ана Пандевска, и песната „Ние сме од Скопје“ на Мирко Попов, чиј аранжман за пијано го направи Пандевска. Получасовно патување низ симболите на Скопје, погледнати низ интимна, лична перспектива на авторите. Во музиката, како и во нарацијата, провејува нишка на носталгија, а во исто време и крик за подобро утре на градот во кој пораснавме и без чиј воздух не можеме да живееме. „Мирисот на липите“ симболично ќе прикаже, преку звук и говор, еден живот на жител од Центар. Поетскиот наратив е оригинално креиран за овој уметнички перформанс, кој промовира иновативен пристап со содржина која пак, претставува ,,жива“ материја, блиска до човечкото срце.
Минатиот месец за „ПМГ Џез“, како 44 издание, излезе албум во живо, концерт на пијано на Дуња Иванова, кој беше реализиран во рамки на музичката програмата „Крај Вардарот Сесии во Аудиокултура“, која изведе композиции од Ана Пандевска.
Веднаш потоа во 21 часот на истата сцена ќе започне долгоочекуваниот концерт на Биг Бендот со музика од Кире Костов. Концерт посветен на еден од стожерите на современата џез композиција Кире Костов, преку интерпретација на негови избрани дела во современ аранжман од страна на Биг Бендот под диригентската палка на Љупчо Мирковски. Костов е едно од најзначајните имиња во современата џез музика, чија работа опфаќа бројни ангажмани и дела, меѓу кои: солист и диригент на Танцовиот оркестар на РТВ Скопје, наградуван трубач во Југославија, претставник во Биг бендот на Европската радиодифузија, автор на околу педесетина композиции во оркестарска изведба од областа на џезот и 300 песни во популарната музика и реализатор на сите изданија на Скопскиот фестивал од 1991. Подеднакво значајна ќе биде и изведбата на селектираните дела од Костов на еден од нашите најзначајни оркестарски формации, чија историја датира од далечната 1961 година (Биг Бендот на МРТ), кој во 2013 година се возобновува и продолжува да работи во музичка формација водена од Љупчо Мирковски како диригент.
Фестивалот ќе биде заокружен на 27 април во едукативно културниот центар Лабораториум со концертен настап на „Macedonian Free Society“ и со еден од највозбудливите музички проекти „Поетроника“.
Фестивалот е поддржан од Министерство за култура на Р.С. Македонија и се реализира во соработка со Македонска филхармонија и Лабораториум. Концертот „Мирисот на липите“ се реализира со поддршка на општина Центар.
Книги
МАИ ги додели наградите за изданијата меѓу два Саеми на книга
Комисијата за доделување на наградите на Македонската асоцијација на издавачи за периодот меѓу два саема, по разгледувањето на апликациите и на примероците од книгите доставени од издавачите, на состанокот на 15.04.2024 г. донесе одлуки за доделување на наградите на МАИ меѓу двата саема во мај 2023 и април 2024 година.
Признание за најдобра едиција, при што основен критериум бил уредничкиот пристап, концептот на едицијата и унифицираниот изглед/дизајн, со 1. место наградена е едицијата „ПРОаЗА“ („Или-или“), со 2. место едицијата „Бранови“ („Антолог“) и со 3. место едицијата „Современи класици“ („Арс ламина“).
Признание за најдобар оригинален дизајн на корица добија „Не кажувам“ од Петар Андоновски, дизајнирана од Марко Трпески („Полица“), „Базирано врз речиси вистинити настани“ од Ѕвездан Георгиевски, дизајнирана од Наталија Лукомска („Бегемот“) и „Кабинет на чуда со ѕидови од огледала“ од Владимир Јанковски, дизајнирана од Марко Трпески („Антолог“).
Признание за најдобро ликовно-графички уредено издание добија „Варшава го исцртува Скопје“ од Кинга Нетман-Мултановска; автор на дизајнот: Петер Личковски („Бегемот“), „Костимот во Македонија од појавата на фотографијата до денес“ од Зорка Тодорова Младеновиќ; графичко уредување на „Арс ламина“ и „Гени, мени, сени“ од Владимир Лукаш (текст и илустрации), со графичко уредување на „Супрема“.
Признание за оригинални целосно илустрирани книги за деца (сликовници) добија „Си беше еднаш – Најубавите бајки на сите времиња“ (прир. Оливера Ќорвезироска, со илустрации на Наталија Лукомска) („Арс ламина “), „Момчето од зборови / Девојчето од ноти“ од Катерина Николовска („Чудна шума“) и „Рокчето“ од Никола Маџиров, со илустрации на Анета Илиевска („Арс ламина“).
Во категоријата најкреативно издание каде влегуваат оригинални изданија за возрасни или за деца, кои се издвојуваат по својата нестандардност, признанија добија „Момчето од зборови / Девојчето од ноти“ од Катерина Николовска („Чудна шума“), „Шарени ириси“ од Јована Матевска Атанасова, со илустрации на Симонида Филипова Китановска („Арс ламина“) и „Мојата прва библиотека“ од Деспина Мукоска („Арс ламина“).
Признанието за автор на годината го доби Лидија Димковска („Три“).