Култура
Премиера на балетот „Заспаната убавица“

Балетот „Заспаната убавица“ премиерно ќе биде изведен во петок, со почеток во 20 часот, во рамките на манифестацијата Мајски оперски вечери.
Балетот „Заспаната убавица“ премиерно ќе биде изведен во петок, со почеток во 20 часот, во рамките на манифестацијата Мајски оперски вечери. Во главните улоги настапуваат Марија Кичевска и Сергеј Сидорски од Украина, кореограф на претставата е Виктор Јеременко, а сценограф и костимограф Миодраг Табачки. Со оркестарот на МОБ ќе диригира Ричард Бернас од САД.Оваа претстава нашиот Балет за првпат ја изведе за време на двомесечната турнеја во Италија, a во петок за првпат пред македонската публика.„Поводот поради кој ја поставивме оваа претстава е промовирање на нашите млади солисти, комплетирање на железниот репертоар, но и продолжување на соработката со гостите. Екипата е стандардна и веќе има постигнато резултати,“ изјави Горан Божинов, директор на Балетот.„Првпат во оваа претстава настапив во Германија, а со Сергеј заедно игравме и во Италија. Се чувствувам задоволна и подготвена успешно да ја одиграм улогата,“ изјави балерината Марија Кичевска која доби покана и да настапува во Националната опера во Украина.„Оваа претстава е долга и трае четири часа, бидејќи живееме во 21 век ја скративме на два чина и една пауза. Претставата не ја изгуби смислата на либретото, но е подинамична. Се надеваме дека ќе постигнеме успех,“ изјави кореографот Виктор Јеременко кој до сега поставил четири претстави на сцената на МОБ. „Овој проект е амбициозен, бидејќи имавме само два месеци за да се подготвиме.Задачата беше покомплексна, бидејќи кратењата се однесуваа на музичкиот и играчкиот дел. „Заспаната убавица“ е еден од најамбициозните проекти и се надевам дека Македонскиот балет успешно ќе успее да ја изведе премиерата,“ изјави сценографот и костимографот Миодраг Табачки кој до сега работел на пет проекти со МОБ и на низа драмски претстави. крај/сж
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Култура
Промоција на „Ќумур смоквин млеч“, дебитантската стихозбирка на Стефан Спасовски

В четврток од 20:00 часот, во кафе-книжарницата „Буква“ ќе се одржи промоцијата на „Ќумур смоквин млеч“, збирката првенче на младиот поет Стефан Спасовски. Преку разговор и читање на дел од песните ќе биде претставена стихозбирката.
Промотор ќе биде Андреј Медиќ Лазаревски, кој во својот текст за стихозбирката пишува: „’Ќумур смоквин млеч’ е стегната и јасна стихозбирка, со избистрен јазик, структурно одлично обмислена, интертекстуална и интердискурзивна книга. Таа е во широк дијалог со современата, пред сѐ, македонска книжевност, рефлектирајќи прашања кои се земени од општото, традиционалното и перенијалното, вметнувајќи ги во личните прашања, современиот контекст на светот во кој живееме и длабоко интимните проблеми и ставови.“
„Ќумур смоквин млеч“ беше наградена со Антев часовник од Меѓународната поетско-културна манифестација „Анте Поповски – Антево перо“ за необјавена поетска збирка од млад автор и организаторите на манифестацијата за стихозбирката велат дека е интересно патување по сетилните меридијани на поетовата млада душа.
Стефан Спасовски е студент на Катедрата за македонски јазик на Филолошкиот факултет „Блаже Конески” во Скопје. Дел е од тимот на кафе-книжарницата „Илика“, а во Здружението за афирмација на младинската култура „Култура Бета“ работи врз јазично уредување и редакција на текстовите. Бил дел од уредничкиот одбор на студентското списание „In medias reѕ“. Се занимава со пишување есеи и поезија. Има учествувано на повеќе поетски читања („Поетска епизода“, Скопски поетски фестивал…).
Култура
Гала концерт на отворено „Од #MOБ за Скопје“

Националната опера и балет на 5 јули со почеток во 21 часот на Плоштадот Мајка Тереза (на платото пред МОБ) ќе одржи гала концерт „Од #MOБ за Скопје“,
Концертот ќе се одржи во чест на 200 годишнината од раѓањето на Јохан Штраус, еден од најзначајните композитори на виенската класика. Ќе настапи оркестарот при МОБ составен од 80 музичари, под диригентска палка на маестро Винценц Праксмарер и солистите Бригита Симон и Иван Наумовски, со репертоар составен од најпознатите валцери, арии и маршеви на Штраус.
Овој уникатен концерт е организиран во соработка со Австриската Амбасада во Скопје, со поддршка од институциите и приватниот сектор и ќе биде сниман и директно пренесуван на каналот на МРТ1.
Култура
Проекција на седум кусометражни играни филма во Кинотеката

На 2 јули (среда) со почеток во 20 ч., во летното кино „Мирно лето“ на Кинотеката на РСМ ќе се одржи проекција на седум кусометражни играни филмови работени според сценарија на македонски писатели.
На програмата се филмовите: „Сонце зад решетки“ од 1957 г., по сценарио и во режија на Славко Јаневски; „Твојот роденден“ од 1961 г., по сценарио на Илхами Емин, во режија на Здравко Велимировиќ; „Невољите на покојникот К. К.“ од 1963 г., по сценарио на Коле Чашуле, во режија на Здравко Велимировиќ; „Давид, Голијат и петел“ од 1960 г., по сценарио и режија на Славко Јаневски; „Лифт горе, лифт долу“ од 1967 г., по сценарио на Ташко Георгиевски, во режија на Душан Наумовски; „Човекот во црно“ од 1970 г., по сценарио на Мето Јовановски, во режија на Бранко Ставрев и „Споменик“ од 1968 г., по сценарио на Бошко Смаќоски, во режија на Вељо Личеноски.
Проекцијата е организирана од Кинотеката на РСМ, во соработка со Друштвото на писателите на Македонија, а селектор на програмата е вонр. проф. д-р Атанас Чупоски, вработен како филмолог советник во Кинотеката и член на ДПМ.