Филм
Сарандон и Ланг во серијата за Џоан Крафорд и Бет Дејвис
Од неделата на американската кабелска телевизија FX почнува прикажувањето на серијата на режисерот Рајан Марфи под насловот „Кавга: Бет и Џоан“, драматизација на соперништвото меѓу двете филмски диви Бет Дејвис, чијшто лик го толкува Сузан Сарандон, и Џоан Крафорд која ја толкува Џесика Ланг, за време на снимањето на филмот „Што се случи со Бејби Џејн?“.
На премиерата на серијата одржана во средата 70-годишната Сузан Сарандон за Reuters изјави дека можела да се идентификува со Бет Дејвис, бидејќи „себеси никогаш не се гледала како една од убавиците“, а 67-годишната Џесика Ланг рече дека ликот на Џоан Крафорд целосно е спротивен од нејзиниот приватен карактер. Имено, Крафорд израснала со насилна мајка и била опседната со одржувањето на имиџот на филмска ѕвезда, и постојано живеела во страв од сиромаштија.
Ланг забележа притоа дека проблемот на актерките, иако дејствието на серијата е сместено во шеесеттите години од минатиот век, значително не се измениле.
„Тие проблеми се многу актуелни. Подеднакво е актуелно она низ што жените минувале и тогаш и денес… всушност ништо не се изменило. Серијата претставува микрокосмос на она низ што жените генерално минуваат во текот на процесот на стареење…, стануваат невидливи, непривлечни и непосакувани“, смета Ланг.
Сарандон, пак, смета дека границата за годините кога Холивуд ги отфрлал актерките како стари крпи денес незначително е симната. Смета и дека денес мајчинството нема на актерката да ѝ ја упропасти кариерата. Го наведе притоа својот пример, нејзината кариера процутел откако навршен четириесет.
Џоан Крафорд и Бет Дејвис биле големи ривалки и пред почетокот на снимањето на филмот „Што се случи со Бејби Џејн?“, нискобуџетен психолошки трилер/хорор за остареана актерка, којашто ја толкува Дејвис, која во старата холивудска вила ја држи во заточеништво својата сестра параплегичарка која ја толкува Крафорд, Филмот е снимен во 1962 година, во времето кога и двете актерки Холивуд помалку почнал да ги заборава. Бет имала 54, а Џоан 58 години.
Меѓутоа, филмот постигнал изненадувачки успех, добивајќи пет номинации за Оскари, и ги оживеал кариерите на двете актерки кои веќе биле во надолна линија.
Авторот на серијата Рајан Марфи вели дека станува збор за приказната за две сопернички којашто истовремено е тажна, емотивна и болна и деликатна.
„Тоа е потресен портрет на две жени кои биле жртви на мажите, медиумите и филмските студија…, поточно, една поучна феминистичка приказна“, смета Марфи додавајќи оти му изгледа оти прашањето на сексизмот, мизогинијата и дискриминацијата кон годините кај жените во Холивуд не е значително променета.
Покрај Сарандон и Ланг, во серијата од осум епизоди играат и Кетрин Зита-Џонс, којашто ја толкува Оливија де Хавиленд, Стенли Тучи кој го игра Џек ворнер, Алфред Молина како Роберт Олдрич, Кети Бејтс и друго. Извршен продуцент ќе биде Бред Пит./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
„Лена и Владимир“ награден на Julien Dubuque International Film Festival
13. издание на Меѓународниот филмски фестивал Julien Dubuque (JDIFF) ги објави своите победници, a „Лена и Владимир“, во режија на Игор Алексов, ја однесе дома главната награда за најдобар долгометражен игран филм.
На фестивалот, кој се одржа од 24-28 април во Дубјук, Ајова, беа прикажани преку 150 филмови од целиот свет, вклучително и 31 долгометражен филм во конкуренција, а филмот „Лена и Владимир“ на фестивалот го промовираа актерот Тони Наумовски и режисерот Игор Алексов.
„Лена и Владимир“ е приказна за двајца бегалци од општеството кои доживеале огромна трагедија, а чии патишта случајно се вкрстуваат. Тие наоѓаат утеха и поврзаност, формирајќи врска што им носи исцелување. Филмот е финансиски поддржан од Агенцијата за филм на Македонија и Филмскиот центар на Србија (Терирем продукција).
Главните улоги ги толкуваат: Сара Климоска и Тони Наумовски, а во филмот се појавуваат и Дениз Абдула, Луран Ахмети, Петар Мирчевски, Петре Арсовски, Благоја Чоревски, Kирил Коруновски. Сценариото е на Александар Русјаков. Продуценти се Дејан Илиев (ДМФ Филм) и Илија Циривири (МИНД Продукција). Кинематографер е Душан Кардалевски, сценографијата е на Влатко Зафирковски, а монтажер е Мартин Иванов, Музиката е на Дарко Спасовски и Горан Керкез, костимограф е Раде Василев, дизајнер на маска е Горан Игњатовски, а кастинг директор е Катерина Грубач.
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.
Култура
Светска премиера на „Киука – Пред летото да заврши“ во Кан – филмот е копродукција помеѓу Грција и Македонија
„Киука – Пред летото да заврши“ (Kyuka Before Summer’s End) во режија и по сценарио на Костис Харамуданис, кој е реализиран како билатерална копродукција помеѓу Грција и Северна Македонија и е поддржан од Агецијата за филм на Република Северна Македонија, својата светска премиера ќе ја има на Канскиот филмски фестивал како дел од 32. издание на програмата ACID, што ќе се одржи од 15 до 24 мај оваа година. На „Куика“ му е доверена честа да ја отвори оваа програма.
„Лист продукција“ е македонски копродуцент на дебитантскиот филм на режисерот Харамуданис со Марија Димитрова и Игор Иванов како копродуценти, а Херетик од Грција е главен продуцент со Данае Спатхара, Јоргос Карнавас и Константинос Контовракиси како продуценти.
„Киука – Пред летото да заврши“ е приказна за едно трочлено семејство, кое како и секое лето, плови со својата едрилица до островот Порос, каде што таткото Бабис и децата Константинос и Елса, кои се веќе на прагот пред полнолетството, го минуваат годишниот одмор. Додека пливаат, се сончаат и создаваат нови пријателства на островот, децата случајно ја запознаваат Ана, жената што ги родила и ги напуштила уште во најраното детство, со што ќе почне едно горко-слатко патешествие на созревање под летното сонце, а долгогодишната огорченост на Бабис избива на површина.
Програмата на ACID (Association for the Distribution of Independent Cinema – Асоцијација за дистрибуција на независен филм) на Канскиот филмски фестивал е креирана во 1993 година и прикажува 9 долгометражни филма, фикција и документарци. Овие филмови се избираат од стотиците пристигнати филмови од цел свет од страна на петнаесетина филмаџии, членови на асоцијацијата.
Снимањето на филмот се одвиваше во октомври 2022 година во Атина и на островот Порос, а постпродукцијата се работеше на релација Атина – Скопје.
Главните улоги во филмот ги играат Симеон Цакирис, Елса Лекаку, Константинос Георгопулос, Афродита Капокаки и Елена Топалиду.
Македонската екипа во овој филм ја сочинуваат Михаил Димитров, Игор Поповски и студиата за постподукција „Аудио хаус“ и „Слобода филм“.