Книги
Ракопис на Џоан К. Роулинг продаден за 470.000 долари

Илустрираниот ракопис од книгата „Приказни за Бардот Бидли“ (Tales of Beedle the Bard), од британската писателка Џоан К Роулинг, авторката на хит серијалот за малиот волшебник Хари Потер, е продадена во вторникот на наддавање во Лондон за 368.800 британски фунти, или 467.000 американски долари, соопшти аукциска куќа Sotheby’s.
Станува збор за една од седумте книги кои Џоан Роулинг своерачно ги напишала и илустрирала. Своевремено овие мали изданија во црн кожен повез, украсени со сребрен орнамент и полускапоцени камења биле подарени од писателката од „сите оние кои имале најблиски врски со книгите за Хари Потер“.
„Во втората половина од денот примерок од книгата ’Приказни на Бардот Бридли’, своерачно напишана и илустрирана од Роулинг беше продаден за 358.750 фунти на анонимен купувач, кој наддаваше по телефон. Примерокот е третиот од седумте кои Роулинг ги направила самата“, се наведува во соопштението објавено на мрежната страница на аукциската куќа Sotheby’s.
Првичната процена на понудениот експонат изнесуваше меѓу 300 и 500 илјади британски фунти.
Продадениот примерок авторката му го подарила на британскиот издавач Бари Канинган, кој ја објави нејзината прва книга за Хари Потер. Книгата содржи посвета и благодарноста за издавачот.
Овој ракопис со серискиот број 3 му бил подарен на издавачот на Роулинг, Бери Канингам, кој ја објави првата книга за Хари Потер. Поткорицата, во чијашто средина е нацртан череп е проследена и со посветата „Бари, човекот кој сметаше дека стегнатиот роман за момчето волшебник со очила би можел да се продава. Благодарам“.
Кафената кожна корица на книгата е украсена од полускапоцени камења и череп изработен од сребро. Сите седум примероци биле издадени во 2007 година за продажба на добротворна аукција, а една од книгите беше продадена во компанијата „Amazon“ за речиси 1,95 милиони фунти, или околу 4 милиони долари според тогашниот курс на американската валута.
Ракописите им биле подарени на шест лица кои имале најнепосредно учество во тоа приказната за момченцето волшебник да стане една од најпознатите на планетава, развивана во осум романи и исто толку филмови./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Книги
Промоција на книгите „Историја на човештвото“ од Џани Родари и „Визуализација на современата македонска книжевност“ од група автори

На 29 април во 18 часот во Студентскиот културен центар ќе се одржи промоција на книгите „Историја на човештвото“ од Џани Родари и „Визуализација на современата македонска книжевност“ од група автори.
Двете изданија се резултат на соработката меѓу студентите и наставниот и соработничкиот кадар од Факултетот за ликовни уметности, Филолошкиот факултет „Блаже Конески“ и Машинскиот факултет при Универзитетот „Св. Кирил и Методиј“ во Скопје.
Издавањето на книгите е поддржано од Инситутот „Данте Алигиери“ во Скопје, Здружението Данте Алигиери во Рим и Министерството за култура и туризам.
Книги
Книгата „Мајсторот“ од Димитар Башевски објавена во Софија

Во издание на издавачката куќа „Изида“ од Софија, деновиве е објавена книгата раскази мајсторот од Димитар Башевски. Тоа е трета книга од Башевски објавена во Бугарија. Претходно објавени се неговите романи „Бунар“ и „Круг“. Преводот на книгата „Мајсторот“ од македонски на бугарски јазик е на Тања Попова.
Во текстот кон објавената книга се вели дека „Димитар Башевски го води читателот на книжевно патување низ длабоките слоеви на човечките емоции и вечните потраги. Со екстремна леснотија и чувство за јазични нијанси, авторот слика живописни слики на љубов, страст и копнеж кои се испреплетени со огромните прашања за смислата на животот и човечкото место во светот“.
Димитар Башевски е автор на дваесеттина книги проза и поезија. Добитник е на највисоките книжевни и општествени награди во земјата. Неговите книги се преведувани и објавувани на повеќе европски јазици.
Книги
МАИ ги додели наградите за изданијата меѓу два Саеми на книга

Комисијата за доделување на наградите на Македонската асоцијација на издавачи за периодот меѓу два саема, по разгледувањето на апликациите и на примероците од книгите доставени од издавачите, на состанокот на 15.04.2024 г. донесе одлуки за доделување на наградите на МАИ меѓу двата саема во мај 2023 и април 2024 година.
Признание за најдобра едиција, при што основен критериум бил уредничкиот пристап, концептот на едицијата и унифицираниот изглед/дизајн, со 1. место наградена е едицијата „ПРОаЗА“ („Или-или“), со 2. место едицијата „Бранови“ („Антолог“) и со 3. место едицијата „Современи класици“ („Арс ламина“).
Признание за најдобар оригинален дизајн на корица добија „Не кажувам“ од Петар Андоновски, дизајнирана од Марко Трпески („Полица“), „Базирано врз речиси вистинити настани“ од Ѕвездан Георгиевски, дизајнирана од Наталија Лукомска („Бегемот“) и „Кабинет на чуда со ѕидови од огледала“ од Владимир Јанковски, дизајнирана од Марко Трпески („Антолог“).
Признание за најдобро ликовно-графички уредено издание добија „Варшава го исцртува Скопје“ од Кинга Нетман-Мултановска; автор на дизајнот: Петер Личковски („Бегемот“), „Костимот во Македонија од појавата на фотографијата до денес“ од Зорка Тодорова Младеновиќ; графичко уредување на „Арс ламина“ и „Гени, мени, сени“ од Владимир Лукаш (текст и илустрации), со графичко уредување на „Супрема“.
Признание за оригинални целосно илустрирани книги за деца (сликовници) добија „Си беше еднаш – Најубавите бајки на сите времиња“ (прир. Оливера Ќорвезироска, со илустрации на Наталија Лукомска) („Арс ламина “), „Момчето од зборови / Девојчето од ноти“ од Катерина Николовска („Чудна шума“) и „Рокчето“ од Никола Маџиров, со илустрации на Анета Илиевска („Арс ламина“).
Во категоријата најкреативно издание каде влегуваат оригинални изданија за возрасни или за деца, кои се издвојуваат по својата нестандардност, признанија добија „Момчето од зборови / Девојчето од ноти“ од Катерина Николовска („Чудна шума“), „Шарени ириси“ од Јована Матевска Атанасова, со илустрации на Симонида Филипова Китановска („Арс ламина“) и „Мојата прва библиотека“ од Деспина Мукоска („Арс ламина“).
Признанието за автор на годината го доби Лидија Димковска („Три“).