Daily news
Популарната литература и фаворизираните наслови најбарани во првите два саемски дена
Разновидни изданија, оптимална посетеност, инцидентно, и креативно уредени штандови, вообичаен џагор на посетителите, возбуда кај издавачите што подготвуваат промоции, и очекувано најголема продажба на преводи од бестселери, ја оформува општата слика за текот на годинешниот Саем на книгата.
Најголемата книжевна манифестација од изложбен карактер кај нас,традиционално опфаќа најмногу домашни книгоиздателства. Оние странските се, малку на број, и нудат профилирана литература со религиозни и други теми.
Освежување на саемот е креативноста на неколку издавачки куќи, што внеле новини во уредувањето на штандовите, декорирани и со плакати од најавените промоции, дигитални детали и присуство на писатели што непосредно можат да ги потпишат книгите на потенцијалните купувачи. Наспроти овие, повеќе се оние издавачки куќи што “времето не ги менува“ кога е во прашање иновативноста.
Што се однесува до продажбата според издавачите, нема значителна промена и се движи во иста линија од година во година. Независно од фаворитите што ги нудат секој во својот домеин, и натаму најпродавани остануваат преводите од делата на авторите како Ден Браун, високо продавани и во светот. Од домашната литература, се продаваат делата на наградените автори, и секако ниските цени ги привлекуваат и купувачите на книги за најмладите.
Голем интерес и масовна продажба во овие два дена постигнуваат насловите „Фајронт во Сараево“ на Неле Карајлиќ како и книгата на монтипајтоновецот Џон Клис.
Според Гоце Дртковски од книгоиздателството „Љубовта е петтиот елемент“, недостигаат дела што треба да ја афирмираат нашата земја, Тој е горд на обемното издание на англиски јазик „Македонски водич“ кое е подготвено ентузијастички од тим од 40 луѓе во период од 5 години.
– Гајдот за Македонија, е исклучително издание, работено е со тим 40 луѓе, истражувањата се правени 15 години, а текстовите и фотографиите се подготвувани 5 години. Беше промовирано на Охридско лето, но неговото историско значење допрва треба да се валоризира. Овие изданија се работат или со милионски суми, или со многу желба, знаење и ентузијазам како во нашиот случај. Горди сме на ова издание, уште повеќе што е на англиски јазик, и може да биде одличен референт за убавините на нашата земја. Со оглед на тоа што Македонија е млада држава посебно треба да внимава со книжевната продукција, бидејќи литературата на суптилен начин ја формира сликата за нашата земја.
Некои издавачи сметаат дека промоциите во рамките на Саемот се непотребни, а продажбата на домашната и преводната литература е иста.
– Интересот е стандарден, особено во првите два дена и не можеме да очекуваме некоја значителна продажба. Тоа што не радува, барем за нашата издавачка куќа, што интересот на посетителите е подеднакво насочен и кон домашната и кон преводната литература. Тука особено мислам на наградените изданија,како што е романот на Давор Стојановски, што ја доби наградата Роман на годината на Утрински весник, потоа романите на Лидија Димковска, Оливера Ќорвезировска, и други. Сметам дека промоциите во рамките на Саемот се сосема непотребни. Посетеноста не е променета и некако е идентична секоја година, смета Ненад Стевовиќ од издавачката куќа „Или-Или“.
Организаторите во обид да ја привлечат и најмладата публика, годинава организирале креативни катчиња за деца. Во наредните денови се предвидени уште 40 промоции што ќе се одржат во промотивниот центар во втората саемска хала.
Очигледно општата политичка состојба во земјава, не влијае врз бројноста на посетителите, но иако станува збор за културен настан, ведрина и позитивни насмевки на лицата тешко се забележува. Крај/мф/ав
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.