КСП Центар-Јадро продолжува со својата онлајн-програма со дискусија за видео уметноста, експерименталениот документарен филм и специфичниoт визуелен јазик што овие медиуми го продуцираат.

Дискусијата ќе се одржи на 14 септември 2020 (понеделник) со почеток од 19 часот на Фејсбук профилот на КСП Центар-Јадро со дискутантката Вероника Камчевска. По дискусијата, публиката ќе може да учествува со свои коментари и прашања.

Жанрот познат како видео-уметност, е нов вид на современа уметност кој се изразува со разни комбинации на подвижни слики и музика кои го редефинираат нашето чувство за време и простор. Овој жанр стана популарен во 60-тите и 70-тите години на минатиот век со широко распространетата достапност на ефтини видео-ленти и леснотијата на нејзиното прикажување преку мониторите на комерцијалните телевизии.

Видео-уметноста стана главен медиум за уметниците кои сакаа да го искористат скоро универзалното присуство на телевизија во современото западно општество. Методот на видео уметноста стана привлечен и популарен на цел спектар на уметници – експериментални филмаџии, фотографи, перформативни артисти итн.

Вероника Камчевска е видео автор и истражувач на мултимедијални форми и нивни влијанија врз создадени реалитети како последица на симулирани вредности на време и простор. Досега има работено на уметнички и инсталациски видео композиции, како и на експериментален документарен филм. Нејзинaта интервенција врз подвижните слики го симболизира фиктивниот простор и промената настаната по пат на субјективно авторско делување, кое во себе ја содржи одговорноста за значењето на примарната слика и генезата како фиксна и непроменлива. Со користење на дигитални алатки, Камчевска создава трансформации на виртуелно осмислени видео концепти и модели. Има учествувано на повеќе домашни и меѓународни филмски фестивали.

Дискусијата е дел од годишната програма на КСП Центар Јадро која е финансиски поддржана од Министерство за култура / Ministria e Kulturës

„Убава слики, убава дружба и многу инспирација“, „Трпејца е прекрасна“… Вакви се импресиите на учесниците на Третата уметничка колонија ТРПЕЈЦА 2020, која заврши во саботата.

Четири дена во подрачното училиште „Наум Охридски“ но и во неговата околина уметниците: Наташа Попоска – Карче, Хава Реџепи, Ристо Андреев, Горан Јованов и Ѓоко Симјаноски преку своите уметнички креации создадоа дела кои ќе останат забележани во трајната меморија на колонијата.

Колонијата во Трпејца и уметниците – колеги со своето присуство ги почести и познатиот уметник Владимир Темков кој 30 години организира колонија во Кавадарци,а беше на пропатување за Поградец – Албанија каде учествуваше на тамошната колонија.

Поддршка на Колонијата со по едно свое дело дадоа и уметниците: Ставре Димитров – Стадим и Живко Поповски – Цветин. Цвеќињата на мирот на Цветин ќе ги красат просториите на училиштата во Пештани и Трпејца.

Организаторот здружението „За Трпејца со љубов“ со поддршка на Општина Охрид најавува изложба на дела од колонијата – догодина на десеттото издание на манифестацијата „На зајдисонце“ во Трпејца.

Шестото издание на електронскиот музички фестивал „Проект калабалак“ се одржа во саботата под силни протоколи на заштита од коронавирусот.

Публиката беше во значително намален број поради ограничувањата за присуство на настани, а пред настанот им се мереше и температура на сите посетители.

Организаторот, здружението на граѓани „Experience in music“ им овозможи одлична атмосфера и забава на посетителите под отворено небо на паркингот „Орел“.

Фестивалот успеа да собере 800 посетители според рестрикциите во однос на бројот на посетители, поради тоа што максимално се почитуваа здравствените протоколи за одржување вакви настани.

Легендата на белградската и балканска техно-сцена Марко Настиќ и грчкиот диџеј Dino MFU беа ѕвездите на неколкучасовниот музички спектакл, со поддршка на најдобрите домашни диџеи – веќе докажаниот и еден од најдобрите во Македонија – диџеј Никифор, диџеј Ампов и диџеј Marsabb.

Целта на „Проект калабалак“ по шести пат беше да се реализира спектакл кој ќе предизвика поинакво музичко доживување за љубителите и познавачите на електронската музика.

Првото издание беше во 2015 година и остави голем впечаток кај љубителите на електронската музика од Источна Македонија.

Фестивалот се одржува со поддршка на општината Радовиш и на Министерството за култура.