Славниот лондонски театар „Shakespeare’s Globe” на 23-ти април ја одбележува 450-годишнината од раѓањето на најголемиот англиски драматург и поет Вилијам Шекспир, со почеток на турнејата и ќе трае точно две години до 23-ти април 2016 година, на 400-годишнината од смртта на Шекспир.

Податок за точниот ден на раѓањето на Бардот, како што Шекспир го нарекуваат во Англија, не е зачуван, Познато е само дека бил крстен на 26-ти април. Според традицијата овој ден се прославува заедно со денот на смртта на англискиот книжевник, 23-ти април, кој се совпаѓа со празникот на свети Џорџ, светецот заштитник на Англија.

„Тие ќе патуваат со бродови, возови, џипови, автобуси, авиони и ќе настапат на различни места, од рурални области до национални театри, од палати до плажи”, се вели во соопштението на театарот.

Улогата на Хамлет во постановката на Доминик Дромгул и Бил Бакхерст наизменично ќе ја толкуваат Лади Емерув и Нам Хајат. Другите актери, исто така, ќе се менуваат, минувајќи на пат по околу два месеца. Според раководството на „Shakespeare’s Globe”, идејата за патешествието и актерските перформанси пред нови и нови луѓе било многу значајно за Шекспир, така што светската турнеја на „Хамлет” потполно претставува изразување на почит кон авторот. Се додава дека станува збор за скап проект, па во моментов театарот продолжува со собирање финансиски средства за поддршка на турнејата.

Првата вистинска турнеја во историјата на овој стар и познат театар ќе започне на 23-ти април 2014 година, на самиот ден кога е роден Вилијам Шекспир во далечната 1564 година во местото Стратфорд на Авон, Театарската трупа Globe, којашто на турнејата ја сочинуваат 16 лица, 12 актери и четворица сценски работници, планира две години да мине во авиони, возови, бродови и автобуси за со една од неговите најпознати и најизведувани трагедии ги посети сите земји во светот, вкупно 205.

„Мислам дека таквата налудничава идеја е одлична, дека тоа е добар начин за привлекување на вниманието, интересот и одушевувањето поради амбициите и енергичноста на трупата”, изјави неодамна за британски The Guardian уметничкиот директор на Globe, Доминик Дромгул.

Истакна дека ниедна земјa не смее да биде изоставена. „Доколку планот е да се минат сите земји во светот, тогаш ќе гостуваме токму во сите”, вели Дромгул. Тоа го вклучува, како што појаснува, и земјите од поранешниот Советски сојуз, Јужна и Северна Кореја, којашто трупата одвај чека да ја посети, а нема да биде заобиколен ниту Антарктик.За таквиот проект „Хамлет” е идеалниот избор, смета Дромгул. „Станува збор за светски познато, моментално најпрепознатливо дело коешто има капацитет да поставува прашања, предизвикува и инспирира каде и да е на светот”, додаде директорот на Globe.

Претставата премиерно ќе биде изведена во театарот Globe на 23-ти април 2014 година, каде што воедно ќе биде одиграна и последната претстава од турнејата, точно две години подоцна на 23-ти април 2016 година.

Веќе се познати и последните две станици на големиот проект, 204-та изведба ќе биде во Долината на големата раседлина (Great Rift Valley) во Кенија „исходиштето на човечкиот живот на земјата ” а 205-та во дворецот Хелсингор во Данска, место во коешто Шекспир го смести дејствието на својата трагедија. На патот до остварувањето на својата амбициозна идеја, трупата Globe ќе го одигра „Хамлет” во театри, на градски плоштади, на плажи и во џунгли. Сепак, патот нималку нема да биде лесен.

По Европа, каде што трупата планира да гостува во по четири земји за само пет дена, заминуваат на Карибите, во Северна и во Јужна Америка, па долж западниот брег на Африка до Австралија и Пацификот. Потоа следат Индонезија, Јапонија, Кина и Азија, па по должината на источниот брег на Африка ќе стигнат до Хелсингор, од каде се враќаат во Лондон. „Логистички, тоа би можело да биде многу тешки издржливо”, предупредува Дромгул.

Иако станува збор за експеримент без преседан, ова не е првпат трупата Globe да се впушта во спектакуларен обид за поврзување на сите народи на светот низ дела на најголемиот писател на англиски јазик и најизведуваниот драматичар во светот. Минатото лето во рамките на Културната олимпијада во рамите на настаните поврзани со Олимписките игри во Лондон 2012, кога Globe организираше светски фестивал посветен на Шекспир (World Shakеspeare Festival) кој во 70 претстави на 37 светски јазици собра илјадници актери од сите делови на светот. Нивните претстави, меѓу другите, се изведуваа и на знаковниот јазик, на маорски и во хип-оп верзии.

Проектот постигна неверојатен успех, привлекувајќи повеќе од 100 илјади посетители за само шест седмици, од кои 80 отсто театарот Globe на брегот од Темза го посетија првпат во животот. „Тоа беше толку фантастично искуство што заклучив дека секако ни е потребна уште една луда идеја”, појасни Дромгул.

Патувачкиот „Хамлет” ќе има малку помал број ликови од вообичаеното – осум, а на турнејата ќе тргнат 12 актери коишто ќе се менуваат во повеќе од двоиполчасовната изведба на најдолгото дело на Шекспир. „Турнеите ни се во крвта. Тоа е она што го правела и трупата на Шекспир, тоа е она што ние го правиме, и многу е забавно”, објаснува Дромгул.

Денешниот театар Globe со целосно име „Шекспировиот театар Глоб” (Shakespeare’s Globe Theatre) изграден е на местото од дрвениот елизабетански театар изграден во 1599 година во Саутварк крај Темза. Театарот изгорел, а неговата точна локација не беше позната се` до 1989 година, кога се откриени остатоци од неговите темели. Новиот театар е изграден според планот од елизабетинската ера и беше отворен во 1997 година./крај/мф/сн