Младинскиот културен центар од Скопје објави конкурс за учесници за циклус работилници за филмска и театарска критика, како дел од проектот „Гледај.мк“.

Работилниците ќе се реализираат во периодот од април до октомври 2018 година, ќе бидат еднодневни и ќе се одржуваат еднаш месечно. Во периодот меѓу работилниците, учесниците ќе работат на развивање на своите вештини за креативно пишување и критичко размислување заедно со тим од ментори.

Право да учествуваат на конкурсот имаат сите лица, кои на денот на објавување на овој конкурс имаат помеѓу 16 и 30 години и можат да учествуваат на сите работилници. Предност при селекцијата на учесници ќе имаат лица, кои до сега немаат објавувано сопствени рецензии и кои ќе имаат доволно слободно време за да учествуваат на работилниците, но и на активностите вон работилниците – следење филмови и претстави, фестивали, скрининзи.

Работилниците ќе се одржуваат во Скопје, во просториите на МКЦ, во неработни денови – сабота или недела, и ќе бидат најавувани барем една недела пред нивното одржување.

Одбраните учесници ќе добијат: учество на 5 еднодневни викенд работилници во наредните неколку месеци, развивање на вештините за креативно пишување и критичко следење на филмски и театарски дела, под будното менторско око на проф. Ана Стојановска, Влатко Галевски и Васко Маглешов, редовно објавување на рецензиите на gledaj.m, објавување на најдобрите рецензии во месецот во печатеното издание на Филм+, бесплатни карти за филмови и претстави, дружење со останатите учесници-вљубеници во театарот и филмот и гости-предавачи од Македонија и странство, можности за посета на домашни и странски филмски и театарски фестивали и поврзани настани.

Од одбраните учесници ќе се очекува учество на сите 5 работилници, пишување на најмалку 3 рецензии месечно, учество на месечни состаноци на групата, заеднички скрининзи, посетување на скрининзи, премиери, фестивали. Секој одбран учесник ќе треба да уплати сума за котизација од симболични 500 денари и да пополни изјава за учество. Средствата од прибраната котизација ќе се искористат за да се понудат дополнителни содржини и активности на учесниците.

Формуларот за учество е достапен на следниот линк.

Македонската филхармонија и Здружението на џез-уметниците на Македонија, на 12 април (четврток) во 20 часот, ќе одржи електроакустичен концерт на Џијан Емин. На концертот ќе биде изведена нова авторска музика на македонскиот композитор, аранжер и инструменталист Џијан Емин, која ќе ја изведат 40-ина музичари, членови на Македонската филхармонија, а еден дел ќе биде составен од најактивните џез-музичари во Македонија.

Насловот на концертот на некој начин го објаснува и самиот концепт на концертот. Како што вели Џијан Емин, тој му дава одредена очекувана естетика, која можеби веќе создава и одредена музичка слика кај слушателите.

„Кај мене, пак, се јавува простор за послободно музичко изразување и желба за музика што се создава во самиот момент на случувањето користејќи ја моќта на организираната импровизација. Секако, за терминот електронски да биде оправдан, ќе се користат благодатите на модерната технологија, но овој пат на неконвеционален начин со директно аплицирање на оркестарските подгрупи и солистите со чиј процес ќе добиеме нови звучни слики и текстури“, вели Емин.

Во четврток, на 29 март, со претставата „Синиот портокал“ од Џо Пенхол во режија на Александар Ивановски, театарот „Јордан Х.К-Џинот“ Велес ќе гостува во Културно-информативниот центар на Македонија во Софија.

„Синиот портокал“ е драма за современата психијатрија, за застарените методи на лекување и беспомошноста на докторите да ги лекуваат своите пациенти без седативи.

„Во време на глобализација кога сакаме да ги надминеме табуата за разликата во бојата на кожата, националноста и културните наследства кои ги носиме во себе, оваа претставата топло ја брани неправдата која ја нанесуваме некогаш преку негативна, а некогаш преку позитивна дискриминација“, велат од велешкиот театар.

Драматург на претставата е Катерина Момева, сценографијата е на Филип Коруновски, а автор на музиката е Сашко Костов. Во претставата настапуваат актерите Фаик Мефаилоски, Самоил Стојановски и Жарко Спасовски.

„Синиот портокал“ е трета продукција од Програмата на Велешкиот театар за 2017 година и е една од најизведуваните претстави со над 30 изведби на репертоарот на театарот. Претставата досега беше изведена и во Центарот за култура во Радовиш, фестивалот „Војдан Чернодрински“ во Прилеп, „Скопско лето“, Македонското културно лето во Албанија, фестивалот „Св.Јоаким Осоговски“ во Крива Паланка, како и на фестивалот „Ин Виница веритас“ во Виница.