Ноќта кон неделата во Скопје на 7-ж8-годишна возраст почина познaтиот композитор и музички продуцент Димитар Масевски, кој важешe за еден од основоположниците на македонската забавна музика.

Димитар Масевски е роден во Скопје во 1937-та година. Од рано детство сакал да свири на мандолина, на инструментот на кој свирел неговиот татко. Во повоените години се запишува во Средното музичко училиште. Веќе во втората година од средното обрзование тој почнува да ги пишува првите авторски песни. Во 1956-та, по смртта на таткото, Масевски е принуден да го напушти школувањето и се вработува во Забавниот оркестар на Радио Скопје како музичар на удиралки.

Професионалниот ангажман на Масевски во МРТВ е повеќекратен. Првенствено тој е еден од клучните личности во продуцентската дејност. Во 1967 година, по едногодишниот престој во Белград, Масевски на покана од Драган Бојаџиев – Батко и композиторот Благоја Ивановски, основачите на Музичката продукција на МРТВ, се враќа во Скопје и ја започнува дејноста како продуцент за забавна музика. Така, 1970-те е периодот на интензивна музичка продукција и популаризација на забавната музика во Македонија. Во тој период, заедно со авторот и продуцент Славе Димитров, Масевски има продуцирано околу две илјади композиции од кои 80 отсто од македонски автори и изведувачи. На тој начин Масевски вложува огромен ангажман за грижата и афирмацијата на постојните и нови автори, текстописци, аранжери и плејада пејачи како Нина Спирова, Зоран Георгиев, Диме Поповски, Зоран Милосављевиќ, Сашка Петковска, Верица Ристевска, Драган Мијалковски и други. Голем број од овие интерпретатори членуваат и во неговиот прв вокален ансамбл „Димас”.

Оттогаш, од 1967 година па до своето пензионирање во 2002 година, Масевски останува во МРТВ, на различни позиции и раководни позици, како уредник на Музичката продукција; уредник на Забавната редакција на Телевизија Скопје; уредник на Забавната програма на МТВ; советник на директорот на Македонската телевизија и советник на генералниот директор на МРТВ.

Сиот свој работен стаж го посветува на афирмацијата на македонската забавна музика низ продукцијата на телевизиски емисии преку аудио и видео компоненти. Со свои идеи, сценарија за емисии и видео-спотови, во интерес на севкупната програма, Масевски како уредник (продуцент) на Редакцијата за забавна програма е главната личност во креирањето и изгледот на музичките програми на МТВ. Шест емисии во кои како уредник се јавува токму Масевски се добитници на највисоки телевизиски признанија. Најпрестижни се Сребрената и Бронзената роза освоени на Светскиот фестивал за телевизиски емисии во Монтре, Швајцарија, на авторот Дарко Марковиќ – „Каша – миш-маш” и „Фестивал”. Другите наградени емисии и спотови се „Шоу-машина“, на Дарко Марковиќ, наградена на фестивал во Порторож, Словенија; „Музичка цртанка со Леб и сол“, за која ја доби Специјалната награда за оригинална идеја; телевизискиот спор „Скопје“ за истоимениот хит на Леб и сол, чии автори се Столе Попов и Горан Стефановски; „Полн пансион“, исто така, со Леб и сол на Слободан Унковски и Горан Стефановски, освојувал на Прва награда на тв фестувалот во Неум; спотот „Бонбониера – Кревети“ со Леб и сол на Слободан Унковски, кој доби Прва награда во Белград за ТВ спот.

Димитар Масевски е добитник на повеќе годишни награди на МРТ за квалитетно и професионално ангажирање, како и на Орден на трудот со сребрени зраци.

Во 1960 година е примен во Друштвото на композиторите на Македонија како еден од најперспективните македонски композитори на популарната музика. Како музички уредник во МТВ, Масевски е автор на телевизискиот фестивал за забавни мелодии ТВ Спот. Исто така, тој е еден од иницијаторите и организатори на возобновениот Скопски фестивал.

Музичкото творештво на Димитар Масевски опфаќа околу петстотини композиции. Во историјата на македонската забавна песна Масевски ќе остане забележан и со песната „Последна солза” во интерпретација на Блага Видец како прва песна испеана на македонски јазик на Југословенската забавна сцена на Фестивалот на Југословенската радиодифузија во Белград во салата на Домот на синдикатите на 22-ри јуни 1957 година.

Исто така, Масевски е автор и на првата детска песна на македонски јазик „Рингишпил” изведена од Блага Видец и Никола Автовски на јавна емисија на Радио Скопје. Според жанрот, композициите на Масевски опфаќаат три музички области: забавна-популарна, народна и детска. Во жанрот на забавната музика е и музиката за ТВ драми и серии, театарски претстави.

Композициите од жанрот на забавната музика се најмногу ориентирани кон лесната шлагерска мелодија. Масевски е еден од првите композитори на забавна музика кои црпат инспирација од богата ризница на македонскиот фоклор. Неговата „Како сонцето што зајдува” и композицијата „Село мое” на Слободан Николовски-Боде се, всушност, првите етно-поп песни во македонската забавна музика. Според тематиката која ја обработуваат забавните песни на Масевски може да се поделат на: – родољубиви („Партизанска ноќ”, „Христијан” итн.) и – лирски („Последна солза”, „Гриша”, „Љубен си”, „Ангела” итн.)

Масевски има компонирано и инструментални композиции кои се верзии на неговите вокални песни: „Остани мој”, „Молчи молчи”, „Зимски здив” и „Визија на мојата среќа”. Звуците на мелодиите, како „Љуби ме Мирјанке”, „Молчи молчи љубов моја”, „Ангела”, „Бела хризантема”, „Приспивна за реката”, „Моја добра гитаро”, „Лет на гулаб бел” итн. се несомено македонски евергрин мелодии. И денес кога ќе ги слушнеме будат спомени за едно време во кое авторите создавале со голем ентузијазам и верба во опстанувањето на македонската забавна песна.

Како автор Масевски има соработувано со голем број пејачи, а неретко тој открива и афирмира нови пејачки имиња на домашна сцена кои стануваат популарни и остануваат до ден денес македонски музички легенди , како како на пример: Зоран Георгиев, Зафир Хаџиманов, Нина Спирова, Даниела Панчетовиќ, Сашка Петковска, Драган Мијалковски, Верица Ристевска, Јанко Узунов, потоа Силви бенд, Росана Сариќ, Лидија Кочовска, …

Од текстописците Димитар Масевски најмногу соработувал со Ѓоко Георгиев, Љупчо Стојановски, Јован В. Павловски, а од аранжерите со: Драган Ѓаконовски, Славе Димитров, Корнелие Ковач, Перо Готовац, Живоин Глишиќ, Дамир Имери, Тодор Трајчески и други.

Во периодот од 1968 до 1988 година Димитар Масевски ја има напишано музиката за сите серии во продукција на тогашната Телевизија Скопје , како што се: „Волшебниот воз“, „Детективи“, „Волшебното самарче“, „Курирот на Гоце“, „Белото циганче“, „Шути и рогати“, „Итар Пејо“ итн. Во тој период, исто така, Масевски компонира музика и за телевизиски филмови и драми, театарски претстави и претстави за деца, како „Коприварник“, „Тумбарник, „Далгарник“…

Во 1985 година започнува да компонира народна музика во духот на староградската песна. Има создадено околу 100 композиции од кои најголемиот број се изведени на домашните фестивали притоа и наградени. Особено популарна е песната „Љубов голема” или „За многу години, Македонци” во интерпретација на Виолета Томовска и Наум Петрески. Во последните десеттина години Масевски во целост и се посветува на новосоздадената народна песна.

Неговата последна композиција е „Свечена песна за Св.Климент Охридски” напишана за хор,солисти и камерен оркестар, изведена во Охрид со Славица Петровиќ-Галиќ, Маријан Николовски и Камерен оркестар.

На годинешниов „Скопски фестивал 2015“ како на еден од неговите основоположници и најзаслужни личности за неговото возобновување, организаторот – неговата матична куќа МРТВ на бардот на македонската музика му ја додели наградата „Животно дело“ за особени заслуги во развојот, афирмацијата и популаризацијата на македонската забавна музика./крај/мф/сд

Извор: Макфакс