ВМРО-ДПМНЕ обвини дека лидерот на СДСМ Зоран Заев и градоначалник на Струмица, збогатил пријатели преку гасификацијата на општината.

„Заев смислил идеална шема преку неговиот пријател Митко Андреевски како да испумпа милиони од џебовите на граѓаните. Андреевски регистрирал фирма на име на неговата сопруга, Билјана Станголева, во семејна куќа на улица „Атанас Раздолов” во скопската населба Драчево која е во сопственост на нејзините родители Станголеви. Значи фирма без имот, регистрирана во куќа, со само еден вработен и главен дистрибутер на гас во Струмица и врти милиони секоја година. Ако е и од Заев, многу е“, рече Дарко Костовски од ВМРО-ДПМНЕ

Појаснуваат дека Митко Андреевски, инаку Претседател на комисијата за енергетика во СДСМ, преку фирмата Си-Ен-Џи набавува и им продава гас на струмичани за цена два ипол пати повисока од онаа што ја купува.

„Партиската фирма на СДСМ во периодот од 2011-та година до денес од општинската каса има инкасирано над 2,5 милиони евра и тоа преку три тендери за набавка на гас кои се единствено направени за набавка на гас во Општина Струмица. Имено, Општина Струмица за 1 м3 плаќа 24 денари, додека пак ЕЛЕМ кој набавува гас за греење за скопјани плаќа 13 денари за 1 м3 и тоа е разлика од 11 денари за метар кубен. На овој начин фирмата на СДСМ Си-Ен-Џи инкасирала над 650.000 евра, пари на граѓаните“, пресмета Костовски.

Порачаа дека Зоран Заев се богати на грб на граѓаните, а ќе сноси одговорност и мора да одговара./крај/со/бб