Македонија
Елизабета Чингаровска ја призна вината за „Талир“ и доби условна казна
Елизабета Чингаровска од ВМРО-ДПМНЕ ја призна вината во случајот „Талир“ и се спогоди со специјалното јавно обвинителство. Судот денеска ја осуди на две годишна условна казна која нема да се изврши ако таа во наредните 5 години не стори ново кривично дело.
„Чингаровска беше последнообвинета за случајот и таа не знаела од каде потекнуваат парите кои влегувале во партијата. Од тие причини таа ја призна вината и се спогоди се специјалното јавно обвинителство“, потврди нејзиниот адвокат Дејан Павлоски.
Чингаровска беше обвинета во случајот „Талир“ за перење пари. Во истиот случај, за првпат и ВМРО-ДПМНЕ како правно лице е обвинето за незаконското финансирање на партијата.
Во овој случај првообвинет е Никола Груевски, потоа Кирил Божиновски, Миле Јанакиески, Илија Димоски, Леко Ристоски и Елизабета Чингаровска која сега ја призна вината.
Според обвинението, Груевски во периодот од 2009 година до 2015 година обезбедувал пари од анонимни лица и од фирми за да ја финансира политичката партија. Во ова му помагале Божиновски и Јанакиески кои вршеле притисок на претставници од фирми кои добивале тендери од државата, да обезбедат пари во кеш за партијата, како противуслуга за добиените тендери.
Груевски не ги враќал овие пари во буџетот како што предвидува Законот за финансирање на политичките партии. На овој начин, партијата се стекнала со околу 4,6 милиони евра.
„Со цел да се прикрие дека ваквите средства потекнувале од кривично дело, обвинетите Груевски, Божиновски, Јанакиески и Чингароска, организирале средствата да бидат уплатени на жиро сметката на политичката партија ВМРО-ДПМНЕ преку ПП10 уплатници во кои биле внесени невистинити податоци дека уплатата ја вршат лицата наведени во уплатниците, иако тоа не било случај“, се вели во обвинението.
Откако вака „испраните“ пари легнувале на сметката на партијата, Илија Димовски, Чингароска, Ристоски и Јанакиески, како овластени потписници на сметката на политичката партија, парите ги пуштале во оптек, односно ги подмирувале тековните трошоци на партијата и купувале имот.
За овој предмет притвор се бара за Никола Груевски, кој избега од државата и доби азил во Унгарија. Во понеделник ќе се знае дали и некој од останатите лица ќе се спогоди со СЈО и ќе ја признае вината за да добие пониска казна.
Во меѓувреме, предметот „Талир“ чека на оценка во Кривичниот суд, а потоа ќе биде закажана главна расправа.
Освен за незаконското финансирање на партијата, предметот „Талир“ содржи и второ обвинение, за начинот на кој е купено земјиштето и градено седиштето на ВМРО-ДПМНЕ. И во овој случај, првообвинет е Груевски, а потоа Кирил Божиновски. Судот на барање на СЈО го замрзна сиот имот на ВМРО-ДПМНЕ, вклучително и Белата палата, додека трае постапката.
Ова е четврт случај на спогодба со СЈО. Претходно, за случајот Таргет – Тврдина се спогоди Елена Џиланова, поранешна началничка на Единица за телекомуникации при Одделот за оперативно техничка поддршка на операции во УБК, која доби условна 6 месечна казна затвор, која нема да се изврши доколку осудената во наредните две години не стори ново кривично дело. За случајот „Насилство во Општина Центар“, во текот на главната расправа, вина признаа двајца обвинети, Томислав Лазаров и Јордан Ристевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Општина Центар: Отстранети двете паднати дрвја
Општина Центар известува дека екипите на ЈП „Паркинзи на Општина Центар“ и ЈП „Паркови и зеленило“ навремено интервенираа и ги отстранија двете дрвја кои паднаа во близина на ООУ „Киро Глигоров“.
Благодарение на нивната брза реакција, улицата е целосно расчистена и повторно ставена во функција, додаваат од општината.
Македонија
Приведени две лица од раководството на ЈП „Комунална хигиена“
Приведени се две лица од раководството на Комунална хигиена, соопштија од Основното јавно обвинителство.
Како што додаваат од таму, лицата се приведени во врска со сомненија за кривично дело од член 230 од Кривичниот законик, или како што појаснуваат, станува збор за загрозување на животната средина и природата со отпад.
„Приведени се и задржани две лица од раководството на ЈП „Комунална хигиена“ – Скопје, во врска со сомненија за кривично дело од член 230 од Кривичниот законик“, соопштија од обвинителството.
Дел од медиумите пренесоа дека е приведен директорот на „Комунална хигиена“ Сабахудин Рустеми кој е кадар на ДУИ.
Македонија
Алиу: Континуирано ја унапредуваме јавната здравствена инфраструктура, обезбедена хипербарна комора во ГОБ „8 Септември“
Министерот за здравство Азир Алиу и заменик-министерот Јовица Андовски заедно со премиерот Христијан Мицкоски денес ја посетија ГОБ „8 Септември“, каде што беше направен увид на новата хипербарна комора. Опремата е обезбедена со поддршка од компанијата „Зегин“ во рамките на заеднички проект со болницата.
„Хипербарната кислородна терапија им помага на пациентите со хронични рани и рани што тешко заздравуваат, како што се дијабетично стапало, изгореници, состојби со нарушена микроциркулација и други индикации што ги третираат повеќе медицински специјалности. Упатувам искрена благодарност до компанијата за нејзината општествената одговорност, како и до менаџментот и медицинскиот персонал на болницата за професионалната подготовка и интеграција на комората во системот на болничкото работење“, истакна министерот Алиу при посетата.
Комората е поставена во одделот за физикална терапија и рехабилитација, а ќе им биде на располагање и на одделите за пластична хирургија, дерматологија и на други болнички оддели во согласност со потребите и медицинските индикации.
„Ова е пример како со партнерства можеме да ја унапредиме јавната здравствена инфраструктура од аспект на модерна опрема, која ќе го зголеми квалитетот на услугите што ги добиваат пациентите. На овој начин директно влијаеме врз исходите на лекувањето, ги намалуваме ризикот од компликации, престојот во болница и трошоците, а на пациентите им даваме поголема шанса за побрзо и поквалитетно оздравување“, посочи Алиу.

