Македонија
(Видео) Павле Богоевски најави оставка

Пратеникот Павле Богоевски најави дека ќе поднесе оставка по скандалот со аудиоснимката објавена на руската мрежа „Вконтакте“, а на која се тврдеше дека Богоевски е снимен како нарачува кокаин. Богоевски потврди дека тоа е неговиот глас, но рече дека не нарачувал кокаин, туку масло од канабис.
Богоевски ја најави оставката на Комисијата за мандатно-имунитетни прашања, со која претседава, а на која денеска на дневен ред е одземањето на пратеничкиот мандат на поранешниот премиер Никола Груевски, откако ВМРО-ДПМНЕ побара прва точка на дневен ред да биде аферата на Богоевски во согласност со етичкиот кодекс на пратениците.
Тој во емотивен говор порача дека одлуката за оставка ја донел веднаш по скандалот, во моментот кога самиот се пријавил во полицијата, но чекал Собранието да ги изгласа безбеднoсните рефрми, а тој да биде присутен, а втората причина е седницата за одземањето на мандатот на пратеникот во бегство, Никола Груевски.
Оставката што ја најави Богоевски ќе важи по гласањето на седница за предлогот за одземање на мандатот на Груевски.
Богоевски ги повика своите колеги од пратеничката група на ВМРО-ДПМНЕ етички да гласаат за одземање на мандатот на Груевски.
„Сега не е прашањето веќе за Павле Богоевски, туку дали пратениците од ВМРО-ДПМНЕ ќе постапат етички и ќе гласаат за одземање на мандатот на Никола Груевски бидејќи ако нема место во Собранието за пратеник што нарачувал масло од канабис за медицинска употреба на блиска личност, тогаш сигурно нема место во Собранието за некој што со парите на граѓаните избега во Унгарија“, рече Богоевски.
По завршувањето на обраќањето, тој ја прекина седницата и рече дека во продолжение ќе претседава неговата заменичка.
Говорот беше проследен со аплауз од пратениците.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
На Табановце се чека околу 45 минути, зголемена фреквенција на возила поради летните одмори

Сообраќајот на државните патишта се одвива непречено, по наместа влажни коловози.
Интензитетот на сообраќај на патните правци надвор од градските средини е зголемен. Поради летните одмори се бележи зголемена фреквенција на возила на ГП Табановце, времето на чекање за влез и излез од државата е околу 30-45 минути. На останатите гранични премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Викендов сончево време со услови за локален пороен дожд

Утре и во деновите од викендот ќе преовладува сончево и потопло време со мала до умерена облачност. Ќе има услови за локална појава на пороен дожд и грмежи, информира УХРМ.
В понеделник на повеќе места ќе биде нестабилно со пороен дожд и грмежи, а од вторник се очекува стабилизирање на времето.

Извор: УХРМ
Македонија
Исчистен паркот спроти „Нова Македонија“

Денеска, во раните утрински часови во координирана акција на инспекциските служби на Општина Центар и Министерството за внатрешни работи, беше расчистен јавниот простор спроти зградата на „Нова Македонија“, познат и како Паркот на новинарите.
Акцијата беше спроведена по теренска проценка и по пријава од страна на центарци, кои изразија сериозна загриженост за безбедноста и изгледот на просторот. Жителите пријавија случаи на нарушување на јавниот ред и мир, поставени шатори и физички пресметки, за кои постојат и видео-снимки кои се доставени до општината.
Градоначалникот Горан Герасимовски потенцира дека јавните простори мора да се користат согласно нивната намена и ги охрабрува сите граѓани навремено да пријавуваат неправилности до надлежните служби.
„Притоа, се водевме и од социјалната димензија на проблемот – на терен беше затекнато и едно лице со посебни потреби, што дополнително ја нагласува потребата од институционална поддршка. Иако Министерството за социјална политика, демографија и млади не беше дел од денешната акција, сметаме дека е морално и неопходно да се вклучи во понатамошниот процес за да се обезбеди соодветна грижа за ранливите категории. Јавниот простор мора да остане чист, безбеден и достапен за сите“, изјави Герасимовски.